DAVID MAZA | OTÀN GBẸZAN TỌN
Whẹndo de Jẹflumẹ, Amọ́ Yé Wá Do Ayajẹ to Godo Mẹ
Whenue n’plọn Biblu bo yí nue n’plọn lẹ do yizan mẹ, n’wá do nue n’ma lẹndọ n’na tindo pọ́n gbede, enẹ wẹ whẹndo ayajẹnọ de. Yẹn po asi e po to pọmẹ hẹ ovi mítọn atọ̀n lẹ jẹ Jehovah sẹ̀n ji to kọndopọ mẹ po ahundopo po.
Amọ́, to ajiji mẹ to 24 avril 2004, nuylankan de jọ bo gbàhundona mí taun.
Whenue asi e Kaye ji viyọnnu mítọn Lauren, n’ma yọ́n lehe n’gán yin otọ́ dagbe de do. Whenue e sọ jivi awetọ, enẹ wẹ visunnu mítọn Michael, nue azọngban otọ́ tọn yin gbẹ́ to fuflú mi. Mẹjitọ ṣie lẹ nọ saba dọjlẹ bo nọ hoavùn whẹwhẹ, podọ yé wá gbẹ́ yede to godo mẹ. Nugbo wẹ dọ n’jlo na yin tatọ́ whẹndo tọn dagbe de, amọ́ n’ma yọ́n lehe n’gán wàmọ gbọn.
Whenue n’to aflanmẹ, ninọmẹ ṣie ylan taun. N’wá pò na ahàn sinsinyẹn nùnù po amasin adínọ zinzan po. Whenue n’tọ́n sọn aflanmẹ, n’ma gán sọ nọ deanana gbẹzan ṣie ganji ba. Akọhiho he yin dopo to jijọ ylankan ṣie lẹ mẹ zọ́n bọ n’bayi nudide ylankan susu. Ninọmẹ ṣie wá ylan sọmọ bọ Kaye jo mi do bo bẹ ovi mítọn awe lẹ sọyi. Enẹ hẹn mi jẹflumẹ pete.
N’kanse Kaye nue n’gán wà na e nido lẹkọwa dè e. E ko jẹ Biblu plọn hẹ Gloria he yin dopo to Kunnudetọ Jehovah tọn lẹ mẹ ji to whenẹnu, enẹwutu nue e dọ poun wẹ yindọ: “Plọn Biblu.” N’ma yọ́n nue enẹ zẹẹmẹdo, amọ́ na n’to ayiha kàn nado plan Kaye lẹkọ wutu, n’yigbe nado dọho hẹ Gloria po asu etọn Bill po.
Hodọdopọ de He Diọ Gbẹzan Ṣie
Whenue Bill po Gloria po wá ‘whé mítọn gbè, haṣinṣan pẹkipẹki he to ṣẹnṣẹn na yé omẹ awe lẹ yinuwado ji e taun. N’wá sè dọ ovi yetọn he to ohá ṣie ji lẹ to gbẹzan dagbe de zan. Whla tintan to gbẹzan ṣie mẹ, n’wá jẹ linlẹn ji dọ Biblu gán gọalọna mẹ nado do ayajẹ to whẹndo mẹ.
To dlapọn enẹ whenu, Bill po Gloria po dọho hẹ mi do nuhahun ṣie lẹ ji. Yé do nue Biblu dọ to Galatianu lẹ 6:7 mẹ hia mi, ehe dọ: “Nudepope he mẹde to dido, enẹ wẹ e na gbẹ̀n ga.” N’dọna dee dọ, ‘Eyin n’ko dike bọ nue wefọ enẹ dọ nọ deanana nudide ṣie lẹ wẹ, n’na ko dapana nuhahun susu!’
Kaye po David po
Dile ojlẹ to yìyì, n’wá mọdọ nue Biblu dọ lẹ yíyí do yizan mẹ ko hẹn gbẹzan ṣie pọnte taun. Yẹn po Kaye po masọ nọ nù azọ̀ ba, podọ n’sọ mọ alọgọ yí nado jo jijọ ylankan devo he n’do lẹ do. To 1985 whenue mí jivi mítọn atọ̀ntọ—enẹ wẹ visunnu mítọn David he mí sù-yín na dọ Davey. To ojlẹ enẹ mẹ, n’ko wá yọ́n lehe n’gán yin otọ́ dagbe de do.
Mí Sẹ̀n Jehovah to Pọmẹ
Yẹn po Kaye po mọdọ nupinplọn ovi mítọn lẹ nado yiwanna Jehovah hẹn mí dọnsẹpọ ẹ dogọ. Nususu wẹ mí plọn sọn owe mítọn lẹ mẹ, dopo to owe lọ lẹ mẹ wẹ Didotóayi Hlan Mẹplọntọ Daho Lọ! Gbọnvona enẹ, whẹndo he to agun mítọn mẹ lẹ ze apajlẹ dagbe dai na míwlẹ po ovi mítọn lẹ po.
Michael po asi etọn Diana po
To nukọn mẹ, ovi mítọn lẹpo jẹ gbehosọnalitọ bayi ji. To bẹjẹeji 2004 tọn, Lauren sẹtẹn yì agun Espagne-gbè tọn mẹ. Michael ṣẹṣẹ tọ́n sọn Bẹtẹli nado wlealọ, podọ ewọ po asi etọn Diana po to awuwle nado yì azọ́ndenamẹ yẹwhehodidọ tọn de mẹ to Guam. Davey he do owhe 19 ko to sinsẹ̀n to République dominicaine.
Homẹ yẹn po Kaye po tọn nọ hùn do ovi mítọn lẹ go, na nudide he yé bayi lẹ wutu. Mí nọ mọdọ 3 Johanu 4 to hẹndi mọ do mí go: “Yẹn ma tindo ayajẹ de he hú ehe: dọ yẹn ni sè dọ ovi ṣie lẹ to zọnlinzin zọnmii to nugbo lọ mẹ.” Mí ma yọnẹn paali dọ oylọ alokan ji tọn dopo gee na wá yinuwado gbẹzan mítọn ji taun.
Adán Sinsinyẹn de Gbò Mí
To 24 avril 2004, yẹn po Kaye po gọna asu po asi po awe devo lẹ tọ́n nado yì dùnú to whèjai. Na fie mí jlo na yì dùnú te lọ dẹn hugan kilomẹtlu 100 wutu, mọto ṣie mẹ wẹ mímẹ ṣidopo lọ lẹ zọ̀n. To whenue mí dùnú fó, n’ze mẹhe pò lẹ do kafe-satẹn de bo yì dín fie n’na glin mọto do. Whenẹnu wẹ alokan ṣie dọnú. Họntọn ṣie de wẹ ylọ mi, podọ ogbè etọn to sisọsisọ.
E dọ: “Nuylankan de jọ. Davey bayi asidan.”
N’kanse e dọ: “Nawẹ asidan lọ sinyẹn sọ?” Podọ n’to budi na nue e na gblọn.
E ma yọ́n lee e na dọ ẹ na mi do. Amọ́ po awuwhiwhle po, e gbọ̀ bo dọna mi dọ Davey ko kú.
Whenue mí dọho fó, n’hodẹ̀ hlan Jehovah bo biọ dọ ni na mi huhlọn. Enẹgodo, n’biọ kafe-satẹn lọ bo dọna mẹhe pò lẹ dọ dee n’te ma yọ́n, enẹwutu e na yọ́n dọ mí ni dedo whégbè. N’jlo dọ ni pò yẹn po Kaye po ṣo, whẹpo n’ma do dọ nue jọ do Davey go na ẹn.
E ma bọawuna mi paali nado kùn mọto na gànhiho dopo daa yì whégbè. N’to sisè dile Kaye yí homẹhunhun do to hodọna mẹhe pò lẹ dọ emi to jejeji na Davey jlo na wá pọ́n mí wutu. Amọ́, whẹpo Kaye na tlẹ do sè dọ visunnu mítọn ko kú, mẹlẹ ko to wekanhlanmẹ homẹmiọnnamẹ tọn lẹ dohlan alokan ṣie ji.
Whenue mí ze asu po asi po diẹ lẹ do ‘whé yetọn lẹ gbè, mí yì whégbè. Kaye pọ́n mi tlintlin bo mọdọ onú sinsinyẹn de ko jọ. Enẹwutu, e kanse mi dọ: “Etẹwẹ jọ?” N’yọnẹn dọ nue n’na dọ bọdego na hẹn Kaye jẹflumẹ taun dile oylọ alokan tọn lọ hẹn yẹnsu jẹflumẹ do to nudi gànhiho awe die wayi.
Lehe Mí Pehẹ Ninọmẹ lọ Do
Adán ko gbò yẹn po Kaye po pọ́n ganji, podọ mí yọnẹn dọ Jehovah nọ penukundo omẹ etọn lẹ go. (Isaia 41:10, 13) Amọ́, whlepọn ehe uwọ kàn dẹpẹ biọ. N’nọ to kinkanse dee dọ, ‘Nawẹ ehe na jọ do Davey he ko wà nususu na Jehovah go gbọn? Naegbọn Jehovah ma bayi hihọ́na ẹn?’
E ma fá do ovi mítọn he pò lẹ lọsu. Onọ̀ nkọ wẹ Lauren yin na Davey, enẹwutu okú etọn hẹn awufiẹsa susu wá na ẹn. Michael lọsu jẹflumẹ taun. Nugbo wẹ dọ e ko yì owhe atọ́n he Michael tlọ́n whégbè, amọ́ to agọe e vivi na ẹn nado mọdọ nọvisunnu emitọn ko whèwhín to gbigbọ-liho.
Tlolo he nulọ jọ wẹ hagbẹ agun tọn lẹ ko to alọgọna mí. Di apajlẹ, etlẹ yin whẹpo Kaye do wá yise nugbo dọ visunnu mítọn ko kú, hagbẹ agun tọn lẹ ko to owhé mítọn gbè wá nado miọnhomẹna mí bosọ gọalọna mí. (Howhinwhẹn lẹ 17:17) N’ma gán wọn owanyi he yé dohia pọ́n gbede!
Yẹn po Kaye po nọ hodẹ̀ bo nọ plọn Biblu bosọ nọ yì opli lẹ to gbesisọ mẹ nado duto awubla mítọn ji. Onú enẹlẹ wiwà ma de awufiẹsa mítọn sẹ̀. Amọ́, mí yọnẹn dọ nujọnu wẹ e yin nado wà nue na na mí huhlọn to gbigbọ-liho lẹ.—Filipinu lẹ 3:16.
Lauren po asu etọn Justin po
Gbọnvona enẹ, Michael po Diana po sẹtẹn wá awà he ji mí te bọ Lauren lẹkọwa agun Glẹnsigbe tọn he mẹ mí te. Na mímẹpo nọpọ́ na owhe kleun delẹ wutu, awufiẹsa mítọn wá jẹ didepo ji. Whenue Lauren wá wlealọ, asu etọn Justin sọ yin asisa alọgọ tọn daho de na mí.
Gbejizọnlin He Vẹawu De
Ojlẹ vude to okú Davey tọn godo, mí ze afọdide devo nado duto ninọmẹ lọ ji—yèdọ nude he vẹawu bo ka wá dekọtọn do dona mẹ. Kaye na dọ lee nulẹ yì do na mì.
“Whenue asu ṣie dọna mi dọ Davey kú, e di na mi dọ n’flẹ jẹ odò he dozinvlu de mẹ wẹ nkọ. Awubla ṣie sinyẹn sọmọ bọ e nọ vẹawuna mi nado wà nue n’nọ wà dai lẹ. N’nọ to avivi mapote. Nado dọ hójọhó, to whedelẹnu n’tlẹ nọ gblehomẹ do Jehovah go podọ do mẹhe pò togbẹ̀ lẹpo go. E wá taidi dọ n’ma tlẹ sọ nọ lẹnnupọn to aliho dagbe mẹ ba.
“N’jlo na yì République dominicaine fie Davey sẹ̀n Jehovah te whẹpo do kú. Etomọṣo n’ma dogán depope, enẹwutu n’mọdọ n’ma gán zingbejizọnlin lọ.
“Họntọn vivẹ́ ṣie de dọna mi dọ họntọn Davey tọn delẹ to République dominicaine lọsu to aluẹmẹ ga, podọ yé jlo na mọ whẹndo Davey tọn. Nue e dọ lẹ na mi huhlọn nado penugo bo do agahun.
“Gbejizọnlin he mí bayi enẹ wẹ nue sin hudo whẹndo mítọn do. E zọ́n bọ mí mọ lee Davey yin gbẹtọ gbigbọnọ de do sọ. Mẹho agun tọn dopo gee he to fie Davey sẹ̀n te dọ dọ e nọ hẹn azọ́n depope he yè de na ẹn di.
“Whenue mí to zọnlinzin gbọn lẹdo he mẹ Davey nọ, mẹlẹ wá mí dè bo dọ nudagbe he Davey ko wà na yé lẹ na mí. N’yọnẹn dọ visunnu ṣie nọ jọmẹ, amọ́ numimọ ehe zọ́n bọ n’sọ mọ lee e dovivẹnu nado hodo afọdomẹ Jesu tọn lẹ do.
Whenue Davey to sinsẹ̀n to République dominicaine
“Mí sọ mọ plọnmẹ Biblu Davey tọn de—enẹ wẹ dawe de he yin ginglọndo akanma etọn ji to ohọ̀ pẹvi de mẹ. Hẹntọnọ de wẹ dawe ehe, amọ́ hagbẹ agun tọn Davey tọn lẹ dọna mí dọ e nọ yinuwa hẹ dawe lọ po sisi po. Ehe zọ́n bọ homẹ ṣie sọ vọ́ hùn dego!
“N’ma ’o zìn gbejizọnlin de he sinyẹn sọ ehe pọ́n. Etomọṣo, gbejizọnlin lọ gọalọna mí nado blawu hẹ mẹdevo he yọ́n Davey lẹ bosọ dọhodo todido sọgodo tọn ji hẹ yé. Ehe de awubla mítọn pò to ojlẹ enẹ mẹ.”
Apajlẹ Davey Tọn Gọalọna Mẹdevo Lẹ
Hosọ de to Fọ́n! 8 janvier 2005 tọn mẹ dọhodo okú Davey tọn po sinsẹ̀nzọn he e wà to République dominicaine po ji. To ojlẹ enẹ mẹ, whẹndo mítọn ma yọ́n lee hosọ enẹ na yinuwado mẹhe na hia ẹ lẹ do ji. Di apajlẹ to mai 2019, mẹmẹsunnu de he nọ yin Nick dọ nue bọdego ehelẹ na mí:
“To vivọnu 2004 tọn, n’to wehọmẹ alavọ tọn, podọ n’ma do yanwle gbigbọmẹ tọn depope. N’masọ do ayajẹ. N’hodẹ̀ hlan Jehovah bo biọ ẹ dọ ni gọalọna mi, na n’ma do yí jọja whenu ṣie zan to aliho dagbe mẹ. E ma dẹn de bọ n’hia numimọ Davey tọn to Fọ́n! mẹ. N’mọdọ gblọndo odẹ̀ ṣie tọn wẹ!
“N’tlọ́n wehọmẹ alavọ tọn bo bẹ gbehosọnalitọ jẹeji. N’sọ bayi tito nado plọn Espagne-gbè, podọ nado sẹtẹn yì tògodo. To nukọn mẹ, n’wá sẹ̀n to Nicaragua bosọ yì Wehọmẹ Wẹndagbe-Jlatọ Ahọluduta lọ tọn lẹ tọn po asi e po. Eyin mẹlẹ kàn nue sisẹ́ mi nado bayi gbehosọnalitọ sè, otàn Davey tọn wẹ n’nọ pìn na yé.”
Mí sọ sè nupaṣamẹ devo whenue mí dukosọna mẹmẹyọnnnu de he nọ yin Abi. Hotẹli dopolọ wẹ mí nọ whenue mí yì Plidopọ Akọjọpli tọn to 2019 to Buenos Aires, Argentine. Owanyi po mẹtọnhopọn etọn po yinuwado mí ji taun. Nuyiwa etọn hẹn yẹn po Kaye po flin Davey.
Numimọ Davey tọn whàn Abi nado biọ sinsẹ̀nzọ́n whenu-gigọ́ tọn mẹ, podọ nado yì sẹ̀n to aigba-denamẹ he to olá de ji
Whenue mí lẹkọyi abò mítọn mẹ to hotẹli lọ, mí do lien, enẹ wẹ nue gán planmẹ yì Fọ́n! he dọhodo Davey ji hlan Abi. To nukunwhiwhe kleun de godo, e na gblọndo. E to jejeji taun nado dọho hẹ mí, enẹwutu mí tẹnpọn bo mọ míde. Whenue mí pé, Abi dọna mí po avi po dọ numimọ Davey tọn wẹ whàn emi nado bẹ gbehosọnalitọ jẹeji to septembre 2011, podọ nado sẹ̀n to aigba-denamẹ he to olá de ji. E dọ dọ, “Whedepopenu he n’pehẹ nuhahun to azọ́ndenamẹ ṣie mẹ, n’nọ gọ̀ hosọ lọ hia.” Etlẹ do vọkan zinjẹgbonu lọ tọn!
Numimọ ehe nkọ lẹ nọ dohia dọ mí yin apadewhe whẹndo lẹdo aihọn pé tọn de. Pipli de ma tin to kọndopọ mẹ to aihọn lọ mẹ dile omẹ Jehovah tọn lẹ te do!
E nọ miọnhomẹna yẹn po Kaye po nado mọdọ numimọ Davey tọn ko yinuwado mẹsusu ji. Na nugbo tọn, jọja vivẹ́ mítọn he to nue go yé pé lẹpo wà to sinsẹ̀nzọn Jehovah tọn mẹ lẹpo nọ yinuwado mẹdevo lẹ ji. Eyin yé ma tlẹ nọ doayi e go, yé nọ yinuwado gbẹzan mẹhe nọ doayi zohunhun yetọn go lẹ tọn ji, podọ apajlẹ yetọn nọ sisẹ́ mẹdevo lẹ nado wà nue go yé pé na Jehovah.
“Yemẹpo Wẹ to Ogbẹ̀ Na Ẹn”
To Luku 20:37 mẹ, Jesu dọ nue Jehovah dọ whenue E ylọ ede dọ: “Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn.” Jehovah ma dọ dọ emi yin Jiwheyẹwhe yetọn whenue yé pò to ogbẹ̀ kẹdẹ gba, amọ́ e gbẹ́ yin Jiwheyẹwhe yetọn whenue yé tlẹ ko kú! Etẹwutu? Jesu dọ whẹwhinwhẹ́n lọ na mí to wefọ 38tọ mẹ: “Yemẹpo wẹ to ogbẹ̀ na ẹn.”
Sọgbe hẹ pọndohlan Jehovah tọn, devizọnwatọ nugbonọ etọn lẹpo wẹ to ogbẹ̀ na ẹn; enẹ do obá he mẹ e magbe jẹ nado fọ́n yé sọnku hia! (Jobu 14:15; Johanu 5:28, 29) N’kudeji dọ Jehovah tindo numọtolanmẹ mọnkọ na Davey, podọ na devizọnwatọ Etọn devo he damlọn to okú mẹ lẹpo.
Ojlo vẹkuvẹku ṣie wẹ nado gọ̀ Davey mọ, amọ́ nue dín n’te hugan wẹ yindọ uwọ po Kaye po ni gọ̀ yede mọ whladopo dogọ. N’ma ko mọ mẹde to awufiẹsa sinsinyẹn mọnkọ mẹ pọ́n. Nue to Luku 7:15 mẹ tindo zẹẹmẹ vonọtaun de na mi, wefọ lọ dọ: “Oṣiọ lọ sọ fọ́n sinai bo jẹ hodọ ji, bọ Jesu ze e na onọ̀ etọn.”
To septembre 2005, n’kọnawudopọ hẹ Kaye to sinsẹ̀nzọn gbehosọnalitọ tọn mẹ. Lẹblanulọkẹyi de wẹ e yin na mi nado bayi gbehosọnalitọ hẹ asi e, ovi mítọn lẹ po alọwlemẹ yetọn lẹ po. Taidi whẹndo he to pọmẹ de, mí nọ nọgodona ode awetọ bosọ nọ ze ayiha mítọn do aihọn yọyọ sọgodo tọn lọ ji, fie mí na gọ̀ Davey vivẹ́ mítọn mọ te.