To whenue n’ko nọ jogún-jogún to agbasamẹ na osun 18 godo, to gbèdopo to août 1967, agbasa-hùnmiyọ́n sinsinyẹn de jẹ tuklado mi ji. To wunkẹngbe afọnnu, n’doayi e go dọ afọ ṣie lẹ masọ nọ ze ganji ba. Dotowhé de to Freetown, to Sierra Leone fie n’nọ nọ̀ dohia dọ n’ko bẹ azọ̀n bẹplamẹ ylankan de he nọ dekọtọn do plibọzọ̀n mẹ, ehe nọ saba bẹpla ovi he ma ko do owhe 5 lẹ. Mahopọnna nukunpedomẹgo dotowhé tọn he n’mọyi, afọ ṣie lẹ ma jẹgangan. Vudevude afọ ṣie lẹ vọgán pete bọ n’ma sọgan sọ nọ ṣite do yé ji kavi zinzọnlin ba. Oblọ he n’do to agbasago zọ́n bọ baba ṣie nọ saba zan hogbe mẹdepò tọn lẹ na mi. Na sá wẹ n’nọ sá bo ma gán fọ́n sọn kọmẹ wutu, n’gbọ bo nọ mọ ovọ́ mẹ na dee.

 Yẹn po onọ̀ ṣie po nọ nọ̀ hẹnnu-whé de he gbè mẹsusu yin hẹntọnọ klókló te, podọ finẹ wẹ n’whẹ́n te. Dile etlẹ yindọ mẹlẹ yiwanna mi, n’gbẹ́ jẹdò owanyi baba ṣie tọn, na ewọ ma yiwanna mi wutu. Mẹdelẹ nọ dọ dọ ninọmẹ ṣie ma yin tata, dọ azetọ lẹ sin azọ́n wẹ. Mẹdevo lẹ na ayinamẹ Mama dọ ni ze mi do họntonu owhé he gbè ovi he do oblọ lẹ nọ nọ̀ de tọn bo jo mi do finẹ. Yé lẹndọ mọwiwà na zọ́n bọ ewọ ma nasọ nọ jẹtlukla susu na yẹn tọn wutu ba. Amọ́, onọ̀ ṣie ma kẹalọyi ayinamẹ yetọn podọ e vánkan nado penukundo go e.

 Na n’ma gán ṣite kavi zinzọnlin wutu, n’nọ sá gbọn kọmẹ. Podọ dee dindọn gbọn kọmẹ kavi gbọn nudevo lẹ ji zọ́n bọ n’nọ gbleawu taun. Nado basi hihọ́na agbasa ṣie n’nọ do avọ̀ titli lẹ. N’sọ nọ do afọpa do alọ nado basi hihọ́na alọ ṣie lẹ. To nukọn mẹ, n’wá jẹ nuyizan owhlẹnọ wunmẹ de he nọ basi hihọ́na alọ ṣie lẹ zan ji. Nado sẹtẹn n’nọ ze nuyizan owhlẹnọ lọ do kọmẹ bo nọ tintlin dee hlan nukọn. Enẹgodo, n’nọ dẹ́ do nẹgbè ṣie ji nado bẹ afọ ṣie lẹ pànta fie n’jei. Eyin n’sẹtẹn dopo, n’dona sọ dovivẹnu sinsinyẹn whẹpo do sẹtẹn devo. Ehe nọ zọ́n bọ awà po abọ́ ṣie lẹ po nọ sè vivẹ́ taun. E nọ biọ dọ ma vánkan taun whẹpo do sẹtẹn to aliho ehe mẹ, enẹwutu e ma yá dọ n’ma tọ́n sọn hẹnnu-whé lọ. N’ma penugo nado yì wehọmẹ kavi daihun hẹ ovi devo lẹ. N’nọ hànú dọ nawẹ e na ko ṣí na mi eyin iya ṣie ma to apá na mi.

 N’nọ hodẹ̀ dọ Jiwheyẹwhe ni gọalọna mi bo ma dike ma lẹzun nubiọdutọ blo. N’nọ mọdọ eyin n’dọnsẹpọ ẹ bo nọ sẹ̀n ẹn to aliho he sọgbe mẹ, e na penukundo nuhudo ṣie lẹ go. Enẹwutu to gbèdopo to 1981, n’dowéna dee po awufiẹsa susu po bo tọ́n sọn whégbè bo yì ṣọṣi he to apá mítọn de. N’ma voawu paali na nukun he mẹlẹ yí do to pinpọn mi. Sinsẹ̀ngán lọ ma jọmẹ hẹ mi, podọ e gbẹnuna onọ̀ ṣie sinsinyẹn, na n’sinai do otẹn he mẹ mẹdevo lẹ ko sú akuẹ nado sin wutu. Enẹwutu, n’gbẹ́ dọ n’masọ jei finẹ ba.

 Afọnnu dopo to 1984, whenue n’tindo owhe 18, n’hẹ aga yì fihe n’nọ saba sinai do to fleṣenu to họnu aga tọn de mẹ. Finẹ wẹ n’nọ nọ̀ bo nọ to nuhe to jijọ to gbangba lẹ pọ́n hlan. Amọ́, n’wá de nado jẹte yì kọho, fihe mẹde ma nọ saba nọ. Whenue n’jẹ finẹ, n’pé sunnu awe delẹ he to yẹwhehodọ sọn whédegbè jẹ whédegbè. Yé dọhona mi gando sọgodo dagbedagbe de go, fie ninọmẹ ṣie na diọ te. Yé hia Isaia 33:24 gọna Osọhia 21:3, 4. Enẹgodo, yé na mi alọnuwe de he do sinmẹ voovo lẹ he hosọ etọn yin Dùvivi Ogbẹ̀ Tọn To Aigba Ji Kakadoi! bosọ dopà nado lẹkọwa whedevonu nado plọnnu mi dogọ.

 To dlapọn yetọn awetọ whenu, yé dọna mi dọ emi na plan Pauline wá, enẹ wẹ mẹdehlan he ṣẹṣẹ sẹtẹn wá lẹdo lọ mẹ de, nado zindonukọn to hodọdopọ lọ mẹ hẹ mi. Yé wàmọ nugbo, podọ haṣinṣan he to yẹn po Pauline po ṣẹnṣẹn wá sinyẹn bo taidi onọ̀ de po viyọnnu etọn po tọn. Iya ṣie na mi tuli nado zindonukọn to Biblu pinplọn ṣie mẹ hẹ Pauline, yèdọ “onọ̀ yọyọ ṣie” he nọ do owanyi mẹde-yido-sanvọ́ tọn, homẹfa po homẹdagbe po hia mi bosọ nọ do ojlo hia to dagbemẹninọ ṣie mẹ to whelẹponu. E plọn mi nuhihia. E sọ yí owe lọ Owe Ṣie He Bẹ Otàn Biblu Tọn lẹ Hẹn zan nado plọnnu mi gando Otọ́ owanyinọ he n’jlo na tindo lọ go vudevude.

 Nuhe n’plọn sọn Biblu mẹ lẹ na mi ayajẹ taun. To gbèdopo, n’kanse Pauline eyin n’gán yì opli Kunnudetọ Jehovah tọn lẹ tọn de he nọ yin yiylọdọ Oplọn Agunwe a, to owhé Kunnudetọ Jehovah tọn de tọn gbè, ehe ma dẹn do fihe n’nọ nọ̀. Pauline sọ yigbe. To mardi he bọdego, e wá bo nọtepọn mi na ma do lawu bo sọnú na mí nido zọ̀n yì opli lọ. Mẹde dọ ma dọna Pauline dọ ni dohún na mi, amọ́ n’gblọn dọ, “N’na yí nuyizan owhlẹnọ ṣie lẹ do zinzọnlin yì dọ́n.”

 Whenue mí jlo na dedo, onọ̀ ṣie po kọmẹnu mítọn lẹ po to pinpọn mi bo to nuhà gando go e. Dile n’to tintọ́n sọn kọho lọ tà, kọmẹnu delẹ dawhá do Pauline ji dọ, “Yadona ovi lọ a ka te maa!”

 Pauline yí ogbè fifá do kanse mi dọ, “Jay, be e na pà we ya?” Ojlẹ lọ die na mi nado dohia dọ n’dejido Jehovah go. (Howhinwhẹn lẹ 3:5, 6) Enẹwutu, n’gblọn dọ “Gbau! Nudide yẹnlọsu tọn wẹ.” Kọmẹnu lọ lẹ nabọẹ bo to pinpọn mi bosọ diọ pọndohlan yetọn dile n’to dindọnsẹpọ họngbo lọ. Dile n’to tintọ́n sọn owhé lọ gbè, yé jẹ pẹ́hò ji.

 N’duvivi opli enẹ tọn taun! E wà dagbe na mi! Mẹlẹpo wẹ dokuavọna mi. Mẹdepope ma de mi pò. N’voawu taun. Enẹwutu, n’jẹ opli lọ yì ji to gbesisọ mẹ. Ojlẹ vude to enẹgodo, n’kanse eyin n’gán jẹ opli he nọ yin bibasi to Plitẹnhọ Ahọluduta tọn Kunnudetọ Jehovah tọn lẹ tọn mẹ he mẹsusu nọ wá lẹ yì ji. Na n’yin hẹntọnọ wutu, avọ̀ awe gee wẹ to asi e bọ n’nọ to didiọ po afọpa whégbè tọn dopo po. Etomọṣo, n’kudeji dọ omẹ Jiwheyẹwhe tọn lẹ ma na gbẹ́ mi dai. Podọ yé ma wàmọ nugbo.

 Nado yì Plitẹnhọ Ahọluduta tọn mẹ, n’dona yí nuyizan owhlẹnọ ṣie zan bo sẹtẹn jẹ fie n’na do mọto te bọ mọto lọ na ze mi jẹ popló de kọ̀n, ehe ji Plitẹnhọ Ahọluduta tọn lọ te. Enẹgodo, mẹmẹsunnu lẹ nọ ze mi hẹ popló lọ ji biọ plitẹnhọ lọ mẹ.

 Na n’ko dọ́ dagbewà Jehovah tọn pọ́n wutu, n’jlo na dín fibẹtado to ewọ mẹ. Enẹwutu, n’magbe nado nọ yì opli lẹ to gbesisọ mẹ. (Salmu lẹ 34:8) To jikun whenu, avọ̀ ṣie lẹ nọ yọ̀n bosọ nọ gọ́ na ogbọ̀n, podọ n’dona diọ avọ̀ ṣie eyin n’jẹ plitẹnhọ mẹ; amọ́ enẹlẹ ma nọ dọ nude na mi!

 Otàn ṣie tọ́n to Owhewé Kunnudetọ Jehovah Tọn lẹ Tọn 1985 tọn mẹ. To whenue Josette he yin Kunnudetọ de to Suisse hia otàn ṣie to Owhewé lọ mẹ godo, e yin whinwhàn nado do kẹkẹvi sẹkunọ lẹ tọn afọ atọ̀nnọ he yè nọ yí alọ do kùn de hlan mi, ehe do oglọ́n-nu de he nọ zọ́n bọ ogbọ̀n ma nọ hò do go e gọna miyọ́n he nọ na ohia de to godo etọn. Sọn whenẹnu, n’nọ to yìyì pé po yẹyi daho de po. Kẹkẹvi lọ nọ hẹn awuji yọpọvu lẹ taun, bọ yé nọ dọ dọ emi yiwanna nado nọ pọ́n mi dile n’to kẹkẹvi ṣie dagbedagbe lọ kùn pé. N’ko yin zizedaga sọn kọmẹ bo nọ mọ dee di ahọsi de he mẹlẹ nọ na sisi bo masọ nọ dovọ́na ba.

 E bọawuna mi nado yinukọn to gbigbọ-liho na n’ko to gbẹzan he bọawu zan bosọ wé to walọyizan-liho wutu. Kẹkẹvi lọ hẹn ẹn bọawuna mi nado nọ tindo mahẹ to lizọnyizọn lọ mẹ, bọ n’yí baptẹm to 9 août 1986. Baptẹm diọ gbẹzan ṣie to aliho dagbe mẹ, yèdọ jẹ obá he n’ma tlẹ lẹn paali de mẹ. N’mọ ayajẹ nujọnu tọn po pekọ po bọ mẹdevo lẹ sọ nọ yí nukun nujọnu tọn do pọ́n mi, podọ n’wleawuna jidide to dee mẹ dogọ, na n’yọnẹn dọ n’tindo Otọ́ de he yiwanna mi bọ onú ṣie nọ duahunmẹna mẹhe lẹdo mi lẹ sisosiso wutu.

 Na n’jlo na suahọ Jehovah na nuhe e wà na mi lẹ wutu, n’lẹnnupọndo gbehosọnalitọ whepoponu tọn bibasi ji, amọ́ n’ma yọnẹn eyin e na pà mi. (Salmu lẹ 116:12) N’hodẹ̀ gandego bosọ magbe nado tẹnpọn. To 1^er janvier 1988, n’bẹ gbehosọnalitọ jẹeji, podọ n’gbẹ́ dego kakajẹ egbé. Dona daho de wẹ ehe yin na mi! Mẹmẹsunnu po mẹmẹyọnnu lẹ po nọ gọalọna mi nado nọ jẹ yanwle ṣie kọ̀n to sunmẹsunmẹ. Podọ n’ko mọ godonọnamẹ Jehovah tọn gbọn gbigbọ wiwe etọn gblamẹ.—Salmu lẹ 89:21.

 Taidi gbehosọnalitọ de, n’nọ saba to yìyì pé, podọ ehe nọ wà dagbe na afọ ṣie lẹ dile etlẹ yindọ yé ma nọ ze ganji. To ojlẹ de godo, n’yì dotowhé yọyọ de po todido lọ po nado mọ nukunpedomẹgo he n’do hudo etọn yí bosọ hodo tito zọnlin pinplọn tọn de. Amọ́, yọnnu de he yin doto mẹgopọntọ de to finẹ dọna mi dọ na ma jẹtukla blo na n’na kú to madẹnmẹ wutu. Podọ to whenue azọ́nwatọgbẹ́ etọn de sọ dọ nudopolọ, enẹ hẹn mi gbọjọ taun. Enẹwutu, n’lẹkọyi whé bo hodẹ̀ hlan Jehovah dọ ni gọalọna mi nado duto numọtolanmẹ gbigbọjọ tọn ṣie ji bo mọ nukunpedomẹgo dagbe de.

 Lizọnyizọn lọ taidi nukunpedomẹgo dagbe hugan he n’do hudo etọn. E ko zọ́n bọ n’nọ zan agbasa ṣie ganji. To owhe delẹ godo, dopo to doto mẹgopọntọ he dọ dọ n’na kú to madẹnmẹ lẹ mẹ wá jei bo mọ mi hlan Plitẹnhọ Ahọluduta tọn mẹ. E paṣa ẹ taun nado mọdọ n’gbẹ́ togbẹ̀.

 N’ko dovivẹnu nado nọ hẹn alọnu ṣie ján to sinsẹ̀nzọn Jehovah tọn mẹ mahopọnna ninọmẹ ṣie. Mẹmẹsunnu lẹ nọ pà mi na zohunhun ṣie podọ na n’nọ wá opli lẹ domẹwhenu wutu. N’nọ saba wàmọ na e nọ gọalọna mi nado mọ whenu bo dọnudo mẹmẹsunnu po mẹmẹyọnnu ṣie lẹ po bosọ do ojlo hia to yé mẹ wutu.

 N’ko dọ́ dagbewa Jehovah tọn pọ́n podọ n’ko mọ dona susu lẹ yí to gbẹzan ṣie mẹ. N’ko gọalọna omẹ atọ̀n nado yí baptẹm bọ ehe hẹn ayajẹ wá na mi. Dopo to yé mẹ, yèdọ Amelia ko yì klasi 137​tọ Giliadi tọn. N’ko yì Wehọmẹ Sinsẹ̀nzọn Gbehosọnalitọ tọn whlasusu, yèdọ awuwledainanu dagbedagbe de sọn Jehovah dè! Jehovah ko gọalọna mi nado do ayajẹ dogọ, nado mọdọ n’họakuẹ podọ nado wleawuna jidide dogọ. Todin, mẹlẹ nọ na mi sisi. Winyan dee tọn masọ nọ hù mi ba. N’tindo họntọn susu lẹ to nugbo lọ mẹ, e ma yin to Freetown fihe n’nọ nọ̀ kẹdẹ, amọ́ to otò ṣie blebu mẹ podọ lẹdo aihọn pé.

 Nudi owhe 40 ko juwayi sọn whenue gbọ́n n’plọn dọ Jiwheyẹwhe dopà aihọn yọyọ de tọn, fie oblọ agbasa go tọn lẹ ma nasọ tin te ba. Nugbo lọ dọ opà enẹ na mọ hẹndi dandan gbẹ́ nọ na mi tuli, podọ n’to jejeji nado mọ hẹndi etọn. N’yí homẹfa do to tenọpọn Jehovah Jiwheyẹwhe ṣie, na n’yọnẹn dọ e ma na dọngban. (Mika 7:7) Homẹfa ṣie ko hẹn dona susu wá na mi. Jehovah ko gọalọna mi nado duto nuhahun po avùnnukundiọsọmẹnu susu lẹ po ji. E nọ saba gọalọna mi to ojlẹ sisọ mẹ. Ayajẹ ṣie gọfla bọ n’nọ to nuko na n’ko yin zize sọn kọmẹ, yèdọ sọn fie n’nọ sá gbọn yì otẹn he yiaga taun he n’ma gán ko kudlọ etọn pọ́n paali de mẹ.