Agostinho he nọ nọ̀ Brésil dọmọ: “N’whẹ́n to ogle otò lọ tọn de mẹ. Hẹntọnọ wẹ mí yin. N’gbọ bo jo wehọmẹ do nado wazọ́n bo penukundo whẹndo mítọn go.” To whenue Agostinho tindo owhe 33, wẹ e wá plọn wehihia po wekinkan po. E dọmọ “Pinplọn nado yọ́n wehia bo yọnkàn gọalọna mi nado mọ sisi mẹdevo lẹ tọn yí.”

 Agostinho yin dopo to gbẹtọ hugan 250 000 he kunnudetọ Jehovah tọn lẹ gọalọna lẹ mẹ nado yọ́n wehia bo yọnkàn sọn owhe 70 linlán die. Naegbọn Kunnudetọ Jehovah tọn lẹ do dó klasi yọnhia-yọnkàn tọn lẹ ai? Nawẹ mẹlẹ ko mọaleyi sọn azọ́nplọnmẹ mọnkọ mẹ gbọn?

 To 1935, otò 115 mẹ wẹ Kunnudetọ Jehovah tọn lẹ ko to yẹwheho dọ te. Nado jẹ mẹhe nọ do ogbè voovo lẹ dè, mẹdehlan lẹ nọ hò hoyidokanji Biblu tọn he yin lilẹdo ogbè devo mẹ lẹ, podọ to ninọmẹ delẹ mẹ, yé nọ penugo nado ze linlinwe lẹ donukọnnamẹ to ogbè lẹdo lọ tọn lẹ mẹ. Mahopọnna dọ mẹsusu nọ do ojlo hia to Biblu mẹ, e nọ vẹawuna yé nado plọnnu yìta na yé ma yọ́n wehia bo yọnkàn wutu.

 Na mẹsusu ma penugo nado nọ hia Biblu na yede wutu, e nọ vẹawu na yé nado yọ́n lehe yé sọgan yí nunọwhinnusẹ́n Biblu tọn lẹ do yizan mẹ do. (Jọṣua 1:8; Salmu lẹ 1:2, 3) Yé sọ nọ pehẹ avùnnukundiọsọmẹ lẹ nado hẹn azọngban Klistiani tọn yetọn di. Di apajlẹ, eyin mẹjitọ lẹ ma yọ́n wehia, e na biọ vivẹnudido susu to yé si nado na anademẹ sinai do Biblu ji ovi yetọn lẹ. (Deutelonomi 6:6, 7) Podọ mẹhe ṣẹṣẹ lẹzun Kunnudetọ bo ma yọ́n wehia bo yọnkàn lẹ sọgan nọma penugo nado yí Biblu do plọnnu mẹdevo lẹ po kọdetọn dagbe po.

 To gblagbla owhe 1940 po 1950 po tọn lẹ mẹ, Nathan H. Knorr po Milton G. Henschel po, yèdọ awe to mẹhe yin nukọntọ to Kunnudetọ Jehovah tọn lẹ mẹ to ojlẹ enẹ mẹ lẹ, zingbejizọnlin gbọn otò voovo lẹ mẹ nado basi titona azọ́n yẹwhehodidọ tọn. To otò he mẹ mẹhe ma yọ́n wehia bo ma yọnkàn lẹ sù te, yé na tuli alahọ he to lẹdo lọ mẹ lẹ nado ze klasi yọnhia-yọnkàn tọn lẹ dai to agun lẹ mẹ.

 Alahọ lẹ nọ do nudọnamẹ lẹ hlan agun lẹ gando lehe yé na deanana nupinplọn lọ do go. To otò delẹ mẹ, tohọluduta lẹ ko tindo aliho mẹpinplọn tọn po azọ́nwanu he Kunnudetọ lẹ sọgan yizan lẹ po. Di apajlẹ, alahọ Brésil tọn mọ owe nupinplọn tọn delẹ yí sọn tohọluduta dè bo do yé hlan agun lẹ nado yizan na nupinplọn lọ. To otò devo lẹ mẹ, Kunnudetọ lẹ lọsu wẹ dona wleawu nue na yin yiyizan na tito yọnhia-yọnkàn tọn lọ.

 Sunnu, yọnnu, jọja po mẹho po wẹ sọgan yì klasi yọnhia-yọnkàn tọn lọ. Yanwle lọ wẹ nado gọalọna nuplọntọ lẹ nado hiawe to anọ́nù-gbè yetọn mẹ—eyin ehe na tlẹ biọ dọ yè ni do klasi ogbè voovo lẹ tọn ai to agun dopolọ mẹ.

 Nawẹ mẹlẹ ko mọaleyi sọn tito yọnhia-yọnkàn tọn ehe mẹ gbọn? Mẹmẹyọnnu de sọn Mexique dọmọ: “Todin n’penugo nado mọnukunnujẹ zẹẹmẹ nue to Biblu mẹ lẹ tọn mẹ, podọ ehe zọ́n bọ e nọ jẹ ahun mẹ na mi. Na n’yọ́n wehia wutu, e gọalọna mi nado dọho hẹ kọmẹnu ṣie lẹ po awuvivo po, podọ n’penugo bo hẹn owẹ̀n Biblu tọn jẹ mẹsusu de dogọ.”

 E ma yin nue to Biblu mẹ lẹ kẹdẹ wẹ tito yọnhia-yọnkàn tọn lọ gọalọna mẹlẹ nado plọn. Isaac he wá sọn Burundi dọ dọ: “Na n’yọ́n wehia bo yọnkàn wutu, e gọalọna mi nado mọ azọ́nplọnmẹ yí gando họ̀gbigbá go. Họ̀gbigbá wá lẹzun agbasazọ́n ṣie, podọ todin, n’to nukunpedo azọ́n họ̀gbigbá tọn daho lẹ go.”

 Jesusa he nọ nọ̀ Peru tindo owhe 49 to whenue e bẹ klasi yọnhia-yọnkàn tọn jẹeji. E dọmọ: “Taidi yọnnu whési de, n’dona yọ́n akuẹ he yin kinkan do nue n’jlo na họ̀ lọ go po yinkọ nue n’jlo na họ̀ to ahimẹ lọ po tọn. To dai, nuhahun wẹ e yin na mi. N’yọ́n pinpẹn tito yọnhia-yọnkàn tọn lọ tọn taun, e zọ́n bọ n’nọ penugo nado whleahi na whẹndo ṣie po awubibọ po.”

 Ahọluzọnwatọ otò susu tọn ko pà Kunnudetọ Jehovah tọn lẹ na alọ he yé to gigọ́ na mẹlẹ nado yọ́n wehia bo yọnkàn. To egbehe, Kunnudetọ Jehovah tọn lẹ gbẹ́ nọ deanana klasi yọnhia-yọnkàn tọn lẹ bo nọ yí aliho mẹpinplọn tọn kavi owe he ko yin vivọjlado to owhe lẹ gblamẹ zan. Yé ko sọ wleawuna alọnuwe nudi livi 224 bo ko zín in jẹgbonu to ogbè 720 mẹ nado gọalọna mẹlẹ na yé nido yọ́n wehia kavi nado gọalọna mẹhe ma yì wehọmẹ susu lẹ. *