To whenue apọsteli Paulu kanwehlan Titu to gbọdo glọ, e dọ dọ jọja sunnu lẹ, ehe bẹ Titu hẹn, dona dovivẹnu nado yin “apajlẹ de na nuhe dù azọ́n dagbe lẹ to aliho lẹpo mẹ.” (Tit 2:6, 7) E wá dohia to weta lọ mẹ dọ Jehovah klan omẹ etọn lẹ do wiwe, na yé nido yin “zohunhunnọ na azọ́n dagbe lẹ.” (Tit 2:14) Dopo to azọ́n dagbe ehelẹ mẹ wẹ nado nọ dọyẹwheho bo plọnnumẹ gando Ahọluduta lọ go. Eyin jọja de wẹ a yin, be a gán yí huhlọn towe zan nado sẹ̀n di gbehosọnalitọ alọgọtọ kavi whepoponu tọn ya?—Hwh 20:29.

Eyin a jlo na lẹzun gbehosọnalitọ, basi tito dagbe. (Luk 14:28-30) Di apajlẹ, nawẹ a na penukundo dewe go to akuẹzinzan-liho gbọn? Nawẹ a na jẹ yanwle gànmẹ tọn towe kọ̀n gbọn? Biọ alọgọ Jehovah tọn to odẹ̀ mẹ. (Slm 37:5) Dọhodo tito towe ji hẹ mẹjitọ towe lẹ gọna gbehosọnalitọ he to kọdetọn dagbe tindo lẹ. Enẹgodo, ze afọdide he jẹ lẹ nado jẹ yanwle towe kọ̀n. Jehovah na dona vivẹnudido po zohunhun towe po!

PỌ́N VIDEO LỌ JỌJA HE TO GBÉGBÒ NA JEHOVAH LẸ, ENẸGODO NA GBLỌNDO NA KANBIỌ HE BỌDEGO LẸ:

• Nuhahun tẹlẹ ji wẹ mẹdelẹ dù te nado yin gbehosọnalitọ, podọ nawẹ e pà yé gbọn?

• Nawẹ mẹjitọ lẹ gán gọalọna ovi yetọn lẹ nado yin gbehosọnalitọ gbọn?

• Naegbọn tito de tintindo na kunnudide do yin nujọnu?

• Nawẹ hagbẹ agun lọ tọn lẹ gán na tuli bo gọalọna gbehosọnalitọ lẹ gbọn?

• Dona tẹlẹ sin vivi wẹ gbehosọnalitọ lẹ nọ dù?