Bẹsọn owhe ehe mẹ, mí na nọ tindo whenu dogọ nado wleawudai na Oflin Okú Klisti tọn. Eyin Oflin jẹ do osẹ ṣẹnṣẹn, Opli Gbẹzan po Lizọnyizọn po Tọn ma na nọ yin bibasi. Eyin Oflin jẹ do sẹfifo, hodidọ na mẹlẹpo po Oplọn Atọ̀họ̀-Nuhihọ́ lọ Tọn po ma na nọ yin bibasi. Be a na nọ yí whenu enẹlẹ zan ganji ya? Taidi to owhe kanweko tintan whenu, e na biọ dọ tito tangan delẹ ni yin bibasi na nujijọ vonọtaun ehe. (Luk 22:7-13; km 3/15 1) Ṣigba, e sọ jẹ dọ mímẹpo ni wleawuna ahun mítọn. Gbọnna?

• Lẹnnupọndo nuhewutu e yin nujọnu dọ mí ni tin to otẹn lọ mẹ ji.—1Kọ 11:23-26

• Hodẹ̀ bo lẹnnupọndo haṣinṣan towe hẹ Jehovah ji.—1Kọ 11:27-29; 2Kọ 13:5

• Hia kandai he basi zẹẹmẹ Oflin tọn lẹ bo lẹnayihamẹpọn do yé ji.—Joh 3:16; 15:13

Wẹnlatọ delẹ nọ hia wefọ he yin didena ojlẹ Oflin tọn he to Dogbapọnna Owe-Wiwe lẹ Egbesọegbesọ mẹ lẹ bo nọ lẹnayihamẹpọn do yé ji. Mẹdevo lẹ nọ hia wefọ he to apotin he zọnpọ hẹ hosọ ehe mẹ lẹ. Podọ mẹdevo lẹ nọ gbadopọnna hosọ Atọ̀họ̀-Nuhihọ́ lọ Tọn lẹ he dọhodo Oflin gọna owanyi he Jehovah po Jesu po dohia mí ji. Mahopọnna tito nupinplọn tọn depope he a de, ni gọalọna we nado dọnsẹpọ Jehovah po Visunnu etọn po dogọ.