NUHEWUTU E DO YIN NUJỌNU: Mẹyiamisisadode lẹ po lẹngbọ devo lẹ po nọ basi oylọna gbẹtọ wunmẹ lẹpo nado wá “yí osin ogbẹ̀ tọn vọnu.” (Osọ 22:17) Osin yẹhiadonu tọn ehe nọtena awuwledainanu Jehovah tọn lẹpo nado whlẹn gbẹtọvi tonusetọ lẹ sọn ylando po okú po si. Eyin mí na penugo nado gọalọna mẹhe tindo aṣa po nuyise voovo lẹ po, aliho he mẹ mí nọ ze “wẹndagbe madopodo” lọ donukọnna yé te dona nọ dọ̀n yé.—Osọ 14:6.

LEHE MÍ SỌGAN WÀMỌ DO:

• Nọ de hosọ po wefọ de po he na jẹ ahun mẹlẹ tọn mẹ to aigba-denamẹ mìtọn ji. A sọgan yí nuzedonukọnnamẹ depope he ko tin-to-aimẹ zan kavi nudevo de he a ko yizan po kọdetọn dagbe po. Hosọ po wefọ tẹlẹ po wẹ mẹlẹ nọ yiwanna? Be linlin yọyọ de tin he ko gbayipe to lẹdo lọ mẹ ya? Etẹwẹ na fọnjlodotena sunnu kavi yọnnu de?

• Nọ yí nudọdomẹ kavi aṣa he gbayipe to lẹdo mìtọn mẹ lẹ zan to nuzedonukọnnamẹ towe mẹ.—2Kọ 6:3, 4

• Jẹakọ hẹ owe po video he tin to Azọ́nwanu Mẹpinplọn tọn mítọn mẹ lẹ po nado yí yé zan eyin mẹde do ojlo hia

• Nọ yí nudọnamẹ he to ogbè mẹhe a gán dukosọna to aigba-denamẹ mìtọn ji lẹ tọn mẹ do alokan po tablẹti towe po ji

• Nọ diọ nuzedonukọnnamẹ towe sọgbe hẹ nuhudo whétọ towe tọn. (1Kọ 9:19-23) Di apajlẹ, etẹwẹ a gán dọ eyin a sè dọ mẹde kú do whétọ towe to agọe?

PỌ́N VIDEO LỌ, ENẸGODO NA GBLỌNDO NA KANBIỌ HE BỌDEGO LẸ:

• To bẹjẹeji, hosọ tẹ ji wẹ wẹnlatọ lọ dọhodo hẹ whétọ lọ?

• Ninọmẹ tẹ mẹ jugbọn wẹ whétọ lọ te?

• Wefọ tẹwẹ na ko yọ́n-na-yizan to ninọmẹ ehe mẹ, podọ etẹwutu?

• Nawẹ a nọ diọalọ nado jẹ ahun mẹlẹ tọn mẹ to aigba-denamẹ mìtọn ji gbọn?