Bẹsọn 2018, hosọ dopo poun ji wẹ zinjẹgbonu linlinwe he mí nọ do gbonu lẹ tọn nọ dọhodo. Linlinwe enẹ lẹpo wẹ tin to Azọ́nwanu Mẹpinplọn tọn mítọn mẹ. Enẹwutu, mí gán nọ yí yé zan to lizọnyizọn lọ mẹ. Mí gán sọ nọ hẹn delẹ, eyin mí ján tọ́nwhẹ̀n kavi mí jei ahi whlé gbé. Yanwle linlinwe lẹ tọn ma yin nado nọ plọn Biblu hẹ mẹlẹ, amọ́ yé gán zọ́n bọ mẹlẹ na nọ do ojlo nado yọ́n nususu gando Jiwheyẹwhe go.

To whenue a to hodọdopọ hẹ mẹde, nọ hia wefọ de bo nọ donù hosọ linlinwe de tọn he mẹlọ gán yiwanna go. Mí ni dọ dọ mẹlọ do ovi kavi adán de gbò e kavi dọ e do lẹnpọn, a gán dọ nude taidi: “N’hia nudagbe de to agọe do enẹ ji. Eyin mì jlo, n’gán do e hia mì.” Ni a doayi e go dọ mẹlọ do ojlo, a gán yí vọkan dopo na ẹn kavi do e hlan ẹn gbọn Intẹnẹt ji, etlẹ yin to hodọdopọ tintan whenu. Mí ma nọ jlo na to linlinwe dogbonu poun, amọ́ mí gán yí yé zan nado dín mẹhe jlo na plọnnu lẹ.—Ow 13:48.