Mí ni dọ dọ Galili wẹ a nọ nọ̀ to ojlẹ Jesu tọn mẹ. A zingbejizọnlin yì Jelusalẹm nado basi Hùnwhẹ Gòhọtúntún tọn. Tòdaho lọ ko gọ́ na sinsẹ̀n-basitọ hatọ he wá sọn fidindẹn lẹ. A jlo na basi avọ́nunina de na Jehovah. Enẹwutu, a ze gbọgbọẹ towe bo wleali dedo tẹmpli mẹ gbọn ali tòdaho lọ tọn he ji gbẹtọ gọ́ enẹlẹ ji. Whenue a jẹ tẹmpli lọ mẹ, mẹdevo lẹ ko gọ́ finẹ po avọ́nunina yetọn lẹ po. Todin, ojlẹ towe sọ̀ nado ze gbọgbọẹ towe jo na yẹwhenọ lẹ. To ojlẹ enẹ mẹ wẹ a flindọ mẹmẹsunnu towe, he sọgan ko to gbẹtọgun lọ ṣẹnṣẹn kavi to tòdaho lọ mẹ, tindo nude sọta we. Jesu dọ nuhe a dona wà. (Hia Matiu 5:24.) Nawẹ hiẹ po mẹmẹsunnu he a ṣinuwa do lọ po na doafọna jijọho dile Jesu dọ do gbọn? To nuhe bọdego ehelẹ mẹ, dohiagona gblọndo he sọgbe lọ.

A DONA . . .

• dọho hẹ mẹmẹsunnu towe kiki eyin a mọdọ owhẹ̀ etọn whẹ́n nado gblehomẹ

• tẹnpọn nado jla pọndohlan mẹmẹsunnu towe tọn do eyin a lẹndọ e nọ yawu gblehomẹ kavi dọ owhẹ̀ ewọ lọsu tọn to e mẹ

• yí sọwhiwhe do dotoaina mẹmẹsunnu towe, podọ eyin a ma tlẹ mọnukunnujẹ nuhe e dọ mẹ ganji, vẹvẹ sọn ahun mẹ wá na kọdetọn he nuyiwa towe hẹnwa

MẸMẸSUNNU TOWE DONA . . .

• dín alọgọ mẹdevo lẹ tọn to agun lọ mẹ gbọn nuṣiwa towe didọna yé dali

• dowhẹ we, bo dọ nuhe nuṣiwa lọ bẹhẹn lẹpo, bosọ biọ dọ a ni yigbe nuṣiwa lọ tọn

• mọnukunnujẹemẹ dọ e biọ whiwhẹ po adọgbigbo po to asi we nado dọnsẹpọ ẹ, bọ e dona jona we sọn ojlo mẹ wá

Dile etlẹ yindọ sinsẹ̀n-bibasi mítọn ma nọ biọ avọ́sinsan kanlin tọn lẹ to egbehe, etẹ plọnmẹ wẹ Jesu te gando kanṣiṣa he tin to jijọhomẹninọ hẹ mẹmẹsunnu mítọn lẹ po sinsẹ̀n-bibasi he Jiwheyẹwhe kẹalọyi po ṣẹnṣẹn go?