Naegbọn mí do nọ yiwanna plidopọ daho mítọn lẹ sọmọ? Dile e nọ yì do to akọta Islaeli tọn mẹ, plidopọ daho mítọn lẹ nọ hùn dotẹnmẹ dote na mí nado sẹ̀n Jehovah hẹ yisenọ hatọ kanweko lẹ kavi fọtọ́n susu lẹ. Mí nọ yiwanna núdùdù gbigbọmẹ tọn susugege he mí nọ mọyi to plidopọ enẹlẹ ji. Awuvivinu wẹ e sọ nọ yin na mí nado kọnawudopọ hẹ họntọn po hagbẹ whẹndo tọn mítọn lẹ po. Na mí yọ́n pinpẹn plidopọ ehelẹ tọn wutu, mí ma nọ gọ̀n depope to azán atọ̀n lọ lẹ mẹ.

To plidopọ enẹlẹ ji, nujọnu wẹ e yindọ mí ni nọ ze ayiha do lehe mí na do owanyi hia mẹdevo lẹ do ji, e ma yin ale he mí na mọ lẹ kẹdẹ. (Ga 6:10; Heb 10:24, 25) Di apajlẹ, mí nọ dín ale mẹdevo lẹ tọn to whenue mí hẹn ohọ̀n go na mẹmẹsunnu mítọn lẹ kavi yí otẹn he mí do hudo etọn lẹ kẹdẹ. (Flp 2:3, 4) Plidopọ daho lẹ nọ yin dotẹnmẹ dagbe nado jihọntọn yọyọ lẹ. Mí gán yí do dó yanwle nado jẹakọ hẹ mẹhe mí ma ko yọnẹn de jẹnukọnna tito-whinnu lọ, to vivọnu etọn, kavi to gbọjẹ whèmẹ tọn whenu. (2Kọ 6:13) Mí gán jihọntọn he na nọ aimẹ sọyi lẹ! Hú popolẹpo, owanyi nugbo he mí nọ dohia gán whàn mẹhe ma yin Kunnudetọ lẹ nado wá sẹ̀n Jehovah hẹ mí.—Joh 13:35.

PỌ́N VIDEO LỌ PLIDOPỌ AKỌJỌPLI TỌN “OWANYI MA NỌ GBOAWUPO GBEDE”!, ENẸGODO NA GBLỌNDO NA KANBIỌ HE BỌDEGO LẸ:

• Nawẹ yè do owanyi hia afọzedaitọ he wá plidopọ akọjọpli 2019 tọn lẹ gbọn?

• Naegbọn pọninọ po owanyi he nọ tin to omẹ Jehovah tọn lẹ ṣẹnṣẹn po do jiawu taun?

• Adà owanyi didohia tọn tẹlẹ ji wẹ mẹmẹsunnu he to Hagbẹ Anademẹtọ lọ mẹ lẹ zinnudo?

• Nawẹ owanyi Klistiani tọn yidogọna pọninọ mẹmẹsunnu lẹ tọn to Allemagne po Corée du Sud po gbọn?

• Etẹwẹ dona yin gbemima mítọn?