Kẹdẹdile Jehovah basi tito na akọta Islaeli tọn do, mọ wẹ e basi tito na omẹ etọn lẹ to egbé do, na yé nido nọ wà ojlo etọn. Lẹdo aihọn pé, alahọ lẹ, lẹdo lẹ, agun lẹ po pipli sinsẹ̀nzọn kunnudegbe tọn lẹ po nọ wazọ́n to pọmẹ nado lá wẹndagbe lọ. Mẹlẹpo wẹ mí nọ dọyẹwheho na, etlẹ yin mẹhe nọ do ogbè he mí ma sè lẹ.—Osọ 14:6, 7.

Be a gán plọn ogbè devo nado gọalọna mẹde nado yọ́n nugbo lọ ya? Eyin alọnu towe ma tlẹ vò sọmọ nado plọn ogbè yọyọ de, a gán yí aplikasiọn JW Language zan nado plọn nuzedonukọnnamẹ kleun de he a gán yí do dọyẹwheho. Vlavo a na tindo ayajẹ wunmẹ he mẹmẹsunnu owhe kanweko tintan tọn lẹ tindo to whenue mẹhe wá sọn otò devo mẹ lẹ sè “nujiawu Jiwheyẹwhe tọn lẹ” to ogbè yetọn titi lẹ mẹ bọ awuji yé.—Ow 2:7-11.

PỌ́N VIDEO LỌ LẸZUN HỌNTỌN JEHOVAH TỌN—NỌ DEKUNNU TO JONỌGBÈ MẸ, ENẸGODO NA GBLỌNDO NA KANBIỌ HE BỌDEGO LẸ:

• Ninọmẹ tẹlẹ mẹ wẹ a gán zan aplikasiọn JW Language te?

• Etẹwẹ a gán yí i zan na?

• Ogbè tẹlẹ wẹ mẹlẹ nọ do to aigba-denamẹ agun mìtọn tọn ji?

• Eyin mẹde do ojlo to wẹndagbe Ahọluduta tọn lọ mẹ bo ka nọ do ogbè devo, etẹwẹ a dona wà?—od 100-101 huk. 39-41