GBẸZAN KLISTIANI TỌN
Wleawudaina Nukunpedomẹgo Dotowhé Tọn Madonukun De
Naegbọn a dona wleawudai? Ajiji mẹ wẹ nukunpedomẹgo dotowhé tọn niyaniya tọn lẹ gán fọ́n bọ e na biọ dọ yè ni glọn we. Enẹwutu, whẹpo ninọmẹ niyaniya tọn de nido fọ́n, wleawudai nado mọaleyi to gigọ́ mẹ sọn awuwledainanu he tin-to-aimẹ nado gọalọna we, na a nido mọ nukunpedomẹgo dagbe hugan yí lẹ mẹ. Eyin a wàmọ, a na dohia dọ emi tindo sisi na ogbẹ̀ bosọ nọ setonuna osẹ́n Jehovah tọn gando ohùn go.—Ow 15:28, 29.
Etẹlẹ wẹ a sọgan wà nado wleawudai?
Hodẹ̀ bo yí sọwhiwhe do kannu do kalti DPA towe mẹ. a Wẹnlatọ he ko yí baptẹm lẹ gán mọ kalti ehe, gọna Kalti Mẹdohia tọn (ic), he yin awuwlena na ovi pẹvi yetọn lẹ yí to mẹhe nọ penukundo owe lẹ go dè
Eyin hohonọ de wẹ a yin, biọ vọkan anademẹwe lọ Nudọnamẹ Delẹ Na Yọnnu He to Ohò Lẹ (S-401) tọn dopo sọn mẹho agun tọn towe lẹ si. Anademẹwe ehe na gọalọna we nado basi nudide dagbe lẹ gando whẹho nukunpedomẹgo dotowhé tọn he gán fọ́n to whenue yè to ohò podọ to vijiji whenu lẹ go
Eyin a jlo na mọ nukunpedomẹgo dotowhé tọn de yí he gán fọ́n whẹho ohùn tọn lẹ dote, kavi eyin e na biọ dọ yè ni glọn we do dotowhé, dike mẹho agun tọn towe lẹ ni yọnẹn jẹnukọn bosọ dọna doto lọ lẹ dọ lizọnyizọnwatọ Kunnudetọ Jehovah tọn lẹ tọn de gán wá dla emi pọ́n
Nawẹ mẹho lẹ gán gọalọ gbọn? Yé sọgan gọalọna we eyin a jlo na kanwe gọ́ kalti DPA towe mẹ. Amọ́, mẹho lẹ ma na basi nudide do otẹn towe mẹ kavi dọ pọndohlan yetọn do nudide he yin whẹho mẹdetiti tọn lẹ ji. (Lo 14:12; Ga 6:5) Eyin a to pipehẹ ninọmẹ agbasamalo tọn de he gán wá bẹ whẹho ohùn tọn lẹ hẹn bo dọ ẹ na mẹho towe lẹ, yé na yawu dọho hẹ Wedegbẹ́ Whẹgbọtọ Dotowhé tọn (CLH) do ota towe mẹ.
Nawẹ Wedegbẹ́ Whẹgbọtọ Dotowhé tọn lẹ gán gọalọ gbọn? Mẹmẹsunnu he to pipli CLH tọn mẹ lẹ ko mọ azọ́nplọnmẹ vonọtaun yí nado gọalọna dotozọ́nwatọ lẹ po osẹ́n-zọ́nwatọ lẹ po na yé nido mọnukunnujẹ teninọ sinsẹ̀n tọn mítọn gando ohùn go mẹ. Yé gán dọho hẹ doto towe gando aliho nukunpedomẹgo tọn devo he ma nọ bẹ ohùn yiyizan hẹn lẹ go. Eyin e biọ domọ, yé gán sọ gọalọna we nado mọ doto de he na kọngbedopọ hẹ teninọ towe gando ohùn go.
PỌ́N VIDEO LỌ LEHE A GÁN BASI NUDIDE GANDO WHẸHO OHÙN TỌN LẸ GO DO, ENẸGODO NA GBLỌNDO NA KANBIỌ HE BỌDEGO:
Etẹwẹ a plọn to video ehe mẹ he na gọalọna we nado wleawudaina nukunpedomẹgo niyaniya tọn he nọ fọ́n whẹho ohùn tọn lẹ dote?
a Nupinplọn 39tọ to owe Duvivi Ogbẹ̀ Tọn Kakadoi! mẹ sọgan gọalọna we nado basi nudide mẹdetiti tọn lẹ gando whẹho ohùn tọn lẹ go.
