To whemẹwhemẹ, omẹ Jehovah tọn lẹ nọ to jejeji nado basi hùnwhẹ Oflin tọn to pọmẹ. To osẹ he jẹnukọnna Oflin lọ lẹ po dehe bọdego lẹ po mẹ, mí nọ yí dotẹnmẹ hundote vonọtaun he mí tindo lẹ zan nado pà Jehovah bosọ dopẹna ẹn na nunina Ofligọ tọn lọ. (Efe 1:3, 7) Di apajlẹ, mí nọ dovivẹnu nado basi oylọna mẹdevo lẹ wá Oflin lọ. Mẹdelẹ nọ penugo bo nọ vọ́ tito yetọn lẹ jlado nado basi gbehosọnalitọ alọgọ tọn to osun mars kavi avril tọn mẹ, po yanwle gànmẹ 30 kavi 50 tọn po. Be e na jlo we nado yidogọna whenu he a nọ yizan to lizọnyizọn lọ mẹ to ojlẹ Oflin tọn ehe mẹ ya? Etẹwẹ sọgan gọalọna we na e nido pà we?

To paa mẹ, nususu wẹ mí gán wà eyin mí basi tito jẹnukọn. (Hwh 21:5) Na mí masọ dẹn do ojlẹ Oflin tọn kaka de wutu, ojlẹ lọ die nado jẹ tito basi ji. Lẹnnupọndo lehe a na jlo nado gbloada na lizọnyizọn towe dogọ to ojlẹ Oflin tọn mẹ do ji bosọ pọ́n nuhe a sọgan wà nado jẹ yanwle towe lẹ kọ̀n. Enẹgodo, hodẹ̀ bo biọ dọ Jehovah ni dona vivẹnudido towe lẹ.—1Jo 5:14, 15.

Be a sọgan lẹnnupọndo aliho delẹ he mẹ a sọgan gbloada na lizọnyizọn towe to ojlẹ Oflin tọn mẹ te ji ya?