Yanwle gbigbọmẹ tọn lẹ nọ gọalọna mí nado yí nugopipe mítọn lẹ zan ganji. (1Kọ 9:26) Gbọnmọ dali, mí nọ yí ojlẹ vude he pò whẹpo opodo nido wá lọ zan to aliho dagbe mẹ. (Efe 5:15, 16) Enẹwutu, to sinsẹ̀n-bibasi whẹndo tọn whenu, mì gán ze yanwle he kọ̀n mì na jẹ to owhe sinsẹ̀nzọn tọn he ja mẹ lẹ dai. Hosọ delẹ to nuplọnwe opli tọn ehe mẹ bo donù yanwle voovo lẹ go. Mì gán lẹnnupọndo delẹ to yé mẹ ji bo hodẹ̀ gandego.—Jak 1:5.

Di apajlẹ, eyin whẹndo lọ blebu dogbepọ, e whè gbau mẹdopo gán lẹzun gbehosọnalitọ whepoponu tọn. Eyin mì to nuhà gando yanwle gànmẹ tọn lọ go, mì gán dọho hẹ gbehosọnalitọ delẹ he to ninọmẹ mìtọn nkọ mẹ. (Hwh 15:22) Mì tlẹ gán kanhose gbehosọnalitọ de to sinsẹ̀n-bibasi whẹndo tọn mìtọn whenu. Enẹgodo, mì lẹnnupọndo tito voovo he gán gọalọna mì lẹ ji bo kàn yé dai. Eyin a ko sẹ̀n di gbehosọnalitọ pọ́n, be ninọmẹ towe hẹn ẹn yọnbasi na we nado gọ̀ gbehosọnalitọ bẹ todin ya?

Be mẹdelẹ to whẹndo lọ mẹ gán basi gbehosọnalitọ alọgọtọ tọn na osun dopo kavi humọ ya? Eyin a ma tlẹ dohuhlọn kaka de, a gán nọ yí whenu kleun de zan to lizọnyizọn lọ mẹ egbesọegbesọ bo basi gbehosọnalitọ alọgọtọ tọn. Eyin vlavo, a nọ yì azọ́nmẹ kavi wehọmẹ bo ma nọ mọ whenu sọmọ nado dekunnu to osẹ ṣẹnṣẹn lo? A gán de osun he bẹ gbọjẹzan dopo kavi sẹfifo atọ́n hẹn. To whenue mì ko de osun he mẹ mì na basi gbehosọnalitọ alọgọtọ tọn te bo basi tito he jẹ lẹ, mì kàn yé do sunzanhiawe de ji.—Hwh 21:5.

PỌ́N VIDEO LỌ YIN ADỌGBOTỌ . . . TAIDI GBEHOSỌNALITỌ DE, ENẸGODO NA GBLỌNDO NA KANBIỌ EHE:

• Nawẹ apajlẹ Mẹmẹyọnnu Aamand tọn dohia gbọn dọ Jehovah nọ penukundo mẹhe nọ basi avọ́sinsan bo nọ yin gbehosọnalitọ lẹ go?