Ojlo vẹkuvẹku mẹjitọ he nọ sẹ̀n Jiwheyẹwhe lẹ tọn wẹ nado mọdọ ovi yetọn lẹ wá lẹzun devizọnwatọ Jehovah tọn nugbonọ lẹ. Mẹjitọ lẹ sọgan gọalọna ovi yetọn lẹ nado wà ehe gbọn nuhe Biblu plọnmẹ lẹ zínzín do ahun yetọn mẹ sọn ovu whenu dali. (De 6:7; Hwh 22:6) Be ehe nọ biọ mẹde-yido-sanvọ́ wẹ ya? Gbau! Amọ́, vivẹnudido ehe nọ hẹn ale wá taun.—3Jo 4.

Mẹjitọ lẹ sọgan plọn nususu sọn apajlẹ Josẹfu po Malia po tọn mẹ. “Aṣa [yetọn] wẹ e yin sọn owhe de mẹ jẹ owhe de mẹ nado nọ yì Jelusalẹm na hùnwhẹ Juwayi tọn,” mahopọnna vivẹnu po akuẹzinzan he e nọ biọ po. (Luk 2:41) E họnwun dọ yé nọ ze nuhudo gbigbọmẹ tọn whẹndo yetọn tọn do otẹn tintan mẹ. Mọdopolọ to egbehe, mẹjitọ lẹ sọgan deanana ovi yetọn lẹ do ali dagbe ji, eyin yé nọ yí dotẹnmẹ hundote lẹpo zan nado plọnnu yé gbọn ohó po apajlẹ po gblamẹ.—Slm 127:3-5.

PỌ́N VIDEO LỌ YÉ YÍ DOTẸNMẸ HUNDOTE LẸPO ZAN, ENẸGODO NA GBLỌNDO NA KANBIỌ HE BỌDEGO LẸ:

• Nawẹ Jon po Sharon Schiller po ze Jehovah sinsẹ̀n do otẹn tintan mẹ to whẹndo yetọn mẹ gbọn?

• Naegbọn mẹjitọ lẹ dona yọ́n mẹplọnlọ he sọgbe na ovi yetọn dopodopo?

• Nawẹ mẹjitọ lẹ sọgan wleawudaina ovi yetọn lẹ nado pehẹ whlepọn yise tọn lẹ gbọn?

• Azọ́nwanu he titobasinanu Jehovah tọn wleawuna tẹlẹ wẹ mì ko yí do gọalọna ovi mìtọn lẹ nado whẹ́n to gbigbọ-liho?