NUHEWUTU E DO YIN NUJỌNU: Ohó Jiwheyẹwhe tọn pinplọn nọ gọalọna mí “nado mọnukunnujẹ nuhe gbigblo, tedidi, jiyiyi po sisosiso” nugbo lọ tọn po yin mẹ. (Efe 3:18) E sọ nọ gọalọna mí nado yin madoblọnọ bo ma nọ yin hinhẹnflu to aihọn ylankan ehe mẹ podọ nado “tẹdo ohó ogbẹ̀ tọn lọ go gligli.” (Flp 2:15, 16) Ohó Jiwheyẹwhe tọn pinplọn sọ nọ gọalọna mí nado de nuhe mí na plọn lẹ na míde. Nawẹ mí sọgan mọaleyi dogọ sọn whenu he mí nọ yizan nado hia Biblu bo plọn ẹn mẹ gbọn?

LEHE MÍ SỌGAN WÀMỌ DO:

• Nọ zẹhudo glọ na wefọ delẹ bo nọ basi kandai lẹ do Biblu nupinplọn tọn towe mẹ, vlavo to wema ji kavi to nuyizan lẹtliki tọn towe mẹ

• Nọ kàn kanbiọ ehelẹ sè dewe dile a to Ohó Jiwheyẹwhe tọn hia: ‘Mẹnu? Etẹwẹ? Whetẹnu? Fie? Etẹwutu? Gbọnna?’

• Nọ basi dodinnanu lẹ. Nọ yí azọ́nwanu dodinnanu tọn he mí tindo lẹ zan nado dín hosọ lẹ kavi wefọ Biblu tọn lẹ

• Nọ lẹnayihamẹpọn do nuhe a hia lẹ ji nado yọ́n lehe nudọnamẹ lọ gando gowe do

• Nọ yí nuhe a plọn lẹ zan to nuwiwa egbesọegbesọ tọn lẹ mẹ.—Luk 6:47, 48

PỌ́N VIDEO LỌ “NỌ TẸDO OHÓ OGBẸ̀ TỌN LỌ GO GLIGLI”—GBỌN NUPINPLỌN SISOSISO DALI, ENẸGODO NA GBLỌNDO NA KANBIỌ HE BỌDEGO LẸ:

• Etẹwẹ mẹdelẹ dọ gando oplọn mẹdetiti tọn go?

• Naegbọn mí dona nọ bẹ oplọn mẹdetiti tọn jẹeji po odẹ̀ po?

• Etẹwẹ gán nọ gọalọna mí nado mọnukunnujẹ adà Biblu tọn de mẹ ganji?

• Ohia nupinplọn tọn tẹlẹ nkọ wẹ mí gán nọ basi do Biblu he mí nọ yí do plọnnu mẹ?

• Naegbọn ayihamẹlinlẹnpọn do yin nujọnu sọmọ to Ohó Jiwheyẹwhe tọn pinplọn whenu?

• Etẹwẹ mí dona wà to nulọ lẹ pinplọn godo?