Sọn Janvier 2018, hodọdopọ hẹ whétọ lẹ nọ sọawuhia to wepa Nuplọnwe Opli Gbẹzan po Lizọnyizọn po Tọn ji. Nawẹ nuzedonukọnnamẹ enẹlẹ sọgan yin yiyizan gbọn?

Eyin A Do Azọ́n to Wehọmẹ: Nọ zan kanbiọ, wefọ po kanbiọ he na yin hodọdeji to whedevonu lọ po, sọgbe hẹ adà he yin didena we. Amọ́, ehe ma zẹẹmẹdo dọ a dona nọ zan hogbe he sọawuhia to video nuzedonukọnnamẹ tọn lọ mẹ lẹ pẹpẹ. A sọgan diọadana nudelẹ taidi nuzedonukọnnamẹ lọ, homẹbibiọ kavi aliho hodọdopọ tọn lọ po mọmọ po. A gán sọ ze owe de donukọnnamẹ sọn Azọ́nwanu Mẹpinplọn tọn mítọn mẹ, eyin adà lọ ma tlẹ donù e go.

Eyin A to Lizọnyizọn lọ Mẹ: Nuzedonukọnnamẹ he to hodọdopọ hẹ whétọ lẹ glọ nọ gọalọnamẹ taun. Eyin mẹde do ojlo hia bo jlo na yọ́n nususu dogọ, a gán zindonukọn to hodọdopọ lọ mẹ, vlavo gbọn nuzedonukọnnamẹ he to adà gọyìpọn tọn glọ yiyizan dali. A gán diọ nuzedonukọnnamẹ lọ lẹ yẹẹ kavi yí nuzedonukọnnamẹ devo pete zan. Be hosọ osun he wayi de tọn kavi wefọ devo de nọ dọ̀n mẹlẹ to aigba-denamẹ mìtọn ji wẹ ya? Be mẹlẹ do ojlo to nujijọ agọe tọn kavi linlin de mẹ to lẹdo towe mẹ wẹ ya? Mahopọnna lehe a de nado yí nuzedonukọnnamẹ de zan do, yanwle towe dona yin nado “wà nulẹpo na wẹndagbe lọ tọn wutu, na [a] nido má ẹn hẹ mẹdevo lẹ.”—1Kọ 9:22, 23.