Osẹ́n Mose tọn biọ dọ sunnu he jlo na basi gbẹdai de ni wleawuna kandai he sọgbe hẹ osẹ́n de. Ehe na glọnalina ẹn ma nado nọ plaplaji do basi gbẹdai. Ṣigba to azán Jesu tọn gbè, sinsẹ̀ngán lẹ ko hẹn gbẹdai bọawu taun. Sunnu de sọgan gbẹ́ asi etọn dai na whẹho depope wutu. (“owe gbẹdai tọn” adà nupinplọn tọn lẹ do Mk 10:4, nwtsty; “gbẹ́ asi etọn dai,” “deayọ bosọ waylando sọta ẹ” adà nupinplọn tọn lẹ do Mk 10:11 ji, nwtsty) Jesu dọ̀n ayidonugo wá nugbo lọ ji dọ Jehovah wẹ yin dowatọ alọwle tọn. (Mk 10:2-12) Asu po asi po na lẹzun “agbasalan dopo” to kọndopọ tẹgbẹ tọn de mẹ. Sọgbe hẹ kandai Matiu tọn he dọhodo nujijọ dopolọ ji, whẹwhinwhẹ́n sinai do Owe-wiwe ji dopo gee na gbẹdai wẹ “fẹnnuwiwa zanhẹmẹ tọn.”​—Mt 19:9.

To egbehe, mẹsusu ma nọ pọ́n alọwle hlan dile Jesu wà do, ṣigba dile Falesi lẹ wà do. Whenue nuhahun lẹ fọ́n, mẹhe to aihọn mẹ lẹ nọ yawu basi gbẹdai. Amọ́, asu po asi po Klistiani lẹ nọ yí nukun nujọnu tọn do pọ́n opà alọwle tọn yetọn bo nọ dovivẹnu nado duto nuhahun lẹ ji gbọn nunọwhinnusẹ́n Biblu tọn lẹ yíyí-do-yizan mẹ dali. To video lọ Owanyi po Sisi po Nọ Kọ̀n Whẹndo lẹ Dopọ pinpọn godo, na gblọndo na kanbiọ he bọdego lẹ:

• Nawẹ a sọgan yí Howhinwhẹn lẹ 15:1 do yizan mẹ to alọwle towe mẹ gbọn, podọ naegbọn ehe do yin nujọnu?

• Nawẹ a sọgan dapana nuhahun lẹ gbọn Howhinwhẹn lẹ 19:11 yíyí-do-yizan mẹ dali gbọn?

• Eyin nuhahun lẹ ko dibla gbà alọwle towe kija, kakati nado kanse dewe dọ, ‘Ma basi gbẹdai wẹ ya?’ kanbiọ tẹlẹ wẹ a dona kanse dewe?

• Nawẹ Matiu 7:12 sọgan gọalọna we nado yin asu kavi asi dagbe gbọn?