Mẹplọnlọ nọ saba dlẹnalọdo anademẹ po mẹpinplọn po, ṣigba e sọ nọ biọ dọ yè ni wọhẹmẹ kavi dọ̀n otó namẹ. Jehovah nọ domẹplọnlọ mí go na mí nido sẹ̀n ẹn dile e jẹ do. (Lo 12:1; Heb 12:10, 11) Mẹplọnlọ nọ hẹn awubla wá to whedelẹnu, amọ́ e nọ dekọtọn do dodowiwa po dona po mẹ. (Hwh 10:7) Etẹwẹ mí dona nọ flin eyin mí jlo na domẹplọnlọmẹgo kavi eyin mí mọ mẹplọnlọ yí?

Mẹhe jlo na domẹplọnlọmẹgo. Mẹho lẹ, mẹjitọ lẹ, po mẹdevo lẹ po nọ dovivẹnu nado hodo apajlẹ Jehovah tọn bo nọ do homẹdagbe po owanyi po hia. (Jel 46:28) To whenue mẹplọnlọ sinsinyẹn dona yin dido mẹde go, e dona yin to obá he sọgbe mẹ bo gọ́ na owanyi.—Tit 1:13.

Mẹhe go yè domẹplọnlọ. Mahopọnna mẹplọnlọ wunmẹ he mí mọyi, mí dona nọ kẹalọyi bo yinuwa madọngbàn. (Hwh 3:11, 12) Na mí yin mapenọ wutu, mímẹpo wẹ nọ do hudo mẹplọnlọ tọn, podọ aliho voovo mẹ wẹ mí nọ mọ ẹn yí te. E gán yin nude he mí hia to Biblu mẹ kavi sè to opli ji. Kavi to whedelẹnu, mẹdelẹ nọ do hudo mẹplọnlọ tọn sọn wedegbẹ́ whẹdida tọn de dè. To popolẹpo mẹ, eyin mí nọ kẹalọyi mẹplọnlọ, mí na mọ ogbẹ̀.—Hwh 10:17.

PỌ́N VIDEO LỌ “MẸHE JEHOVAH YIWANNA LẸ GO WẸ E NỌ DOMẸPLỌNLỌ,” ENẸGODO NA GBLỌNDO NA KANBIỌ HE BỌDEGO LẸ:

• Bẹjẹeji dagbe tẹwẹ Canon tindo, amọ́ nawẹ nulẹ wá diọ gbọn?

• Mẹplọnlọ he gọ́ na owanyi tẹwẹ e mọyi sọn Jehovah dè?

• Onú tẹlẹ wẹ numimọ etọn plọn mí?