Oflin nọ hùn dotẹnmẹ dote na mí nado lẹnayihamẹpọn do dona sọgodo tọn he ofligọ lọ hẹn yọnbasi na mí lẹ ji, taidi fọnsọnku. E ma yin lẹndai Jehovah tọn gbede dọ gbẹtọ ni nọ kú. Nuhe zọ́n niyẹn bọ okú mẹyiwanna de tọn wẹ yin dopo to nuhe nọ hẹn awufiẹsa wá na mí hugan lẹ mẹ. (1Kọ 15:26) Jesu mọ awufiẹsa to whenue devi etọn lẹ to awubla na okú Lazalọsi tọn wutu. (Joh 11:33-35) To whenuena e yindọ Jesu yin apajlẹ pipé Otọ́ etọn tọn, mí sọgan deji dọ Jehovah lọsu nọ mọ awufiẹsa, eyin mí to awubla na okú mẹyiwanna mítọn lẹ tọn wutu. (Joh 14:7) Jehovah yí jeje do to tenọpọn ojlẹ he mẹ e na fọ́n devizọnwatọ etọn lẹ sọnku, podọ nudopolọ wẹ mílọsu dona to wiwà.—Job 14:14, 15.

To whenuena e yindọ Jiwheyẹwhe he nọ nọ̀ tito ji de wẹ Jehovah yin, mí sọgan kudeji dọ fọnsọnku na wá aimẹ to aliho he to kannukannu de mẹ. (1Kọ 14:33, 40) Kakati mí nido basi hùnwhẹ ṣiọdidi tọn lẹ, hùnwhẹ kuavọ didona mẹhe fọnsọnku lẹ tọn wẹ mí na basi. Be a nọ lẹnayihamẹpọn do fọnsọnku ji, titengbe to ojlẹ awubla tọn lẹ mẹ ya? (2Kọ 4:17, 18) Be a nọ dopẹna Jehovah na ofligọ he ewọ wleawu etọn na mí bo dohia to Owe-wiwe lẹ mẹ dọ oṣiọ lẹ na fọnsọnku ya?—Kol 3:15.

• Họntọn towe po hẹnnumẹ towe tẹlẹ po wẹ a to jejeji nado mọ whladopo dogọ?

• Mẹhe go Biblu donù tẹlẹ wẹ a to jijlo nado mọ bo dọho hẹ?