Nuhe nukun mọ lẹ nọ dọ̀n ayidonugo bo nọ gọalọnamẹ nado mọnukunnujẹ nuhe yè plọn lẹ mẹ bosọ hẹn yé do ayiha mẹ. Nuplọnmẹtọ Daho mítọn Jehovah yí nuhe nukun nọ mọ lẹ zan nado plọnmẹ onú titengbe lẹ. (Jen 15:5; Jel 18:1-6) Mẹplọntọ Daho lọ Jesu lọsu yí yé zan nado plọnmẹ. (Mt 18:2-6; 22:19-21) To owhe agọe tọn lẹ mẹ, video yin dopo to nuhe nukun nọ mọ lẹ mẹ he ko tindo kọdetọn dagbe to mẹpinplọn mẹ. Be a nọ yí video lẹ zan ganji to whenue a to nuplọn hẹ Biblu plọntọ lẹ ya?

Video ao ko yin awuwlena he na gọalọna mí nado yọ́n lehe mí gán nọ yí hosọ he tin to alọnuwe lọ Wẹndagbe de sọn Jiwheyẹwhe Dè! mẹ lẹ do plọnnu mẹlẹ do. To paa mẹ, hosọ video lọ lẹ tọn nọ sọgbe hẹ dopo to kanbiọ he yin kinkan po wekun titli po to alọnuwe lọ mẹ lẹ mẹ. Alọnuwe lọ he to Intẹnẹt ji tindo alọdlẹndonu de he nọ do whenue video dopodopo na yin hihò hia. Humọ, owe oplọn tọn he tin to Azọ́nwanu Mẹpinplọn tọn mítọn mẹ devo lẹ sọ nọ dlẹnalọdo video devo lẹ.

Eyin a to nuplọn hẹ Biblu plọntọ towe do hosọ de ji he vẹawuna ẹn nado mọnukunnujẹemẹ, kavi eyin e to pipehẹ whlepọn tangan de, dín video de he gán gọalọna ẹn to jw.org® ji kavi to Televiziọn JW ji. Enẹgodo, hiẹ po nuplọntọ towe po gán pọ́n ẹn dopọ bo dọhodeji.

Video yọyọ lẹ nọ yin didetọn to sunmẹsunmẹ. Dile a to pinpọn yé, nọ lẹnnupọndo lehe a gán yí yé zan to whenue a to nuplọn hẹ mẹdevo lẹ do ji.