Nudopolọ wẹ owe Etẹwẹ Biblu Sọgan Plọn Mí? po owe Biblu Plọn Mí po yin. Azọ́nwanu mẹpinplọn tọn awe ehelẹ nọ yin yiyizan nado ze nugbo lọ donukọnnamẹ to aliho dopolọ mẹ. Etomọṣo, owe Etẹwẹ Biblu Sọgan Plọn Mí? yin awuwlena to aliho he bọawu mẹ. E yin awuwlena na mẹhe e sọgan vẹawuna nado mọnukunnujẹ owe Biblu Plọn Mí mẹ lẹ. Kakati owe lọ ni bẹ nudọnamẹ dogọ lẹ hẹn, ayidonugo he bẹ zẹẹmẹ he bọawu hogbe po linlẹn he tin to hukan lọ lẹ mẹ po tọn wẹ e bẹhẹn. Weta lọ lẹ ma nọ bẹ kanbiọ homẹbibiọ tọn lẹ kavi apotin dogbapọn tọn hẹn. Kakatimọ, bladopọ nugbo Biblu tọn he yin hodọdeji to hukan lọ lẹ mẹ wẹ yé bẹhẹn. Taidi owe Biblu Plọn Mí, owe Etẹwẹ Biblu Sọgan Plọn Mí? lọsu sọgan yin zizedonukọnnamẹ to whedepopenu, eyin mí ma tlẹ to yíyí i zan to osun lọ mẹ. Nawẹ mí sọgan yí adà vonọtaun owe ehe tọn lẹ zan to whenue mí to anadena plọnmẹ Biblu de gbọn?

BLADOPỌ: Lehe mí nọ deanana plọnmẹ Biblu de gbọn to paa mẹ, enẹ wẹ hukan lẹ hihia to owe Biblu Plọn Mí mẹ jẹnukọn enẹgodo kanbiọ lẹ, sọgan yọ́n-na-yizan na mẹsusu. Amọ́ mí ni dọ dọ nuplọntọ lọ ma sè ogbè lọ ganji kavi ma nọ hia ẹ ganji. To ninọmẹ enẹ mẹ, a sọgan yí owe Etẹwẹ Biblu Sọgan Plọn Mí? zan. Enẹgodo, bladopọ weta lọ tọn sọgan yin yiyizan na oplọn lọ bọ nuplọntọ lọ na yin tulina nado hia hukan lẹ na ede. Nugbo Biblu tọn sọgan yin pinplọnmẹ to oplọn dopodopo whenu to nukunwhiwhe 15 gblamẹ. To whenue e yindọ bladopọ lọ lẹ ma nọ bẹ zẹẹmẹ he to hukan lọ mẹ lẹpo hẹn, nuplọnmẹtọ lọ dona wleawu ganji, bo hẹn nuhudo nuplọntọ lọ tọn do ayiha mẹ. Eyin nuplọnmẹtọ lọ yí weta lọ zan na oplọn lọ, bladopọ lọ sọgan yin yiyizan taidi dogbapọn.

AYIDONUGO LẸ: Hogbe po linlẹn he to ayidonugo lẹ mẹ po tin to titoji dile e te do to hukan lọ lẹ mẹ. Nuplọnmẹtọ lọ sọgan de nado dọhodo ayidonugo owe Etẹwẹ Biblu Sọgan Plọn Mí? tọn lọ lẹ ji to oplọn lọ whenu.