To madẹnmẹ, homẹfa he Jehovah to didohia aihọn ehe na wá vivọnu. Sinsẹ̀n lalo na yin vivasudo, pipli akọta lẹ tọn de na yangbé omẹ Jiwheyẹwhe tọn lẹ tọn bọ Jehovah na sukúndona mẹylankan lẹ to Amagẹdọni. Po jejejininọ po wẹ Klistiani lẹ to nukundo nujijọ ayidego tọn ehelẹ.

Na nugbo tọn, mí ma yọ́n nudọnamẹ lẹpo gando nukunbibia daho lọ go. Di apajlẹ, mí ma yọ́n whenue e na bẹ taun. Mí ma yọ́n whẹjijọ he huhlọn tonudidọ tọn lẹ na dín nado suwhẹna mẹgbeyinyan yetọn sọta sinsẹ̀n lẹ. Mí ma yọ́n lehe mẹgbeyinyan akọta lẹ tọn sọta omẹ Jiwheyẹwhe tọn lẹ na dẹnsọ kavi nuhe e na bẹhẹn. Mí masọ yọ́n nuhe Jehovah na yizan taun nado và kẹntọ etọn lẹ sudo to awhàn Amagẹdọni tọn whenu.

Etomọṣo, Owe-wiwe lẹ na mí nudọnamẹ he mí do hudo etọn nado yí jidide po adọgbigbo po do pannukọn sọgodo lẹpo. Di apajlẹ, mí yọnẹn dọ mí ko to vivọnu “azán godo tọn lẹ” tọn. (2Ti 3:1) Mí yọnẹn dọ mẹgbeyinyan sọta sinsẹ̀n lẹ na yin “sinsán-dogli,” na sinsẹ̀n nugbo nikaa yin vivasudo. (Mt 24:22) Mí yọnẹn dọ Jehovah na whlẹn omẹ etọn lẹ. (2Pi 2:9) Podọ mí yọnẹn dọ dodonọ podọ huhlọnnọ wẹ Mẹlọ he Jehovah ko de nado và mẹylankan lẹ sudo bo basi hihọ́na gbẹtọ susugege lọ to Amagẹdọni whenu.—Osọ 19:11, 15, 16.

E họnwun dọ nujijọ he na wá aimẹ to sọgodo lẹ na zọ́n bọ gbẹtọ lẹ na “nọ dakú na obu.” Etomọṣo, azọ́n whlẹngan tọn he Jehovah ko wà to hohowhenu lẹ, gọna nuhe e ko dehia gando sọgodo go lẹ hihia po ayihamẹlinlẹnpọn do yé ji po gán gọalọna mí nado “jlọ ṣite bo ze ota [mítọn] daga,” po jidide lọ po dọ whlẹngán mítọn ko sẹpọ.—Luk 21:26, 28.