Ohó Susu Didọ: Ma nọ lẹndọ a dona basi zẹẹmẹ nulẹpo tọn blo. Jesu yí kanbiọ lẹ zan nado gọalọna gbẹtọ lẹ nado nọ lẹnnupọn bo wá tadona he sọgbe kọ̀n. (Mt 17:24-27) Kanbiọ lẹ na zọ́n bọ oplọn lọ na vivi bo na gọalọna we nado yọ́n nuhe mẹ nuplọntọ lọ mọnukunnujẹ po nuhe e yise lẹ po. (be 253 huk. 3-4) Eyin a kàn kanbiọ sè, nọ yiagbọji bo nọ nọtepọn gblọndo lọ. Eyin nuplọntọ lọ na gblọndo he ma sọgbe, kakati nado dọ gblọndo he sọgbe lọ na ẹn, yí kanbiọ devo lẹ zan nado hẹn ẹn wá tadona he sọgbe lọ kọ̀n. (be 238 huk. 1-2) Dọho to aliho de mẹ na nuplọntọ lọ nido tindo nukunnumọjẹnumẹ yọyọ lẹ.—be 230 huk. 4.

Nupinplọn lọ Hinhẹn Gẹdẹ: Ma nọ tẹnpọn nado dọ nuhe a yọnẹn gando hosọ de go lẹpo blo. (Joh 16:12) Nọ ze ayiha do nuagokun hukan lọ tọn lẹ ji. (be 226 huk. 4-5) Zẹẹmẹ susu bibasi, etlẹ yin do nuhe fọnjlodotenamẹ lẹ ji, sọgan hẹn nuagokun lọ lẹ dózin. (be 235 huk. 3) Eyin nuplọntọ lọ ko mọnukunnujẹ nuagokun lọ mẹ, yì hukan he bọdego ji.

Plaplaji-Ninọ to Oplọn lọ Whenu: Yanwle mítọn wẹ nado jẹ ahun nuplọntọ lẹ tọn mẹ, e ma yin nado fó weta de. (Luk 24:32) Nọ yí huhlọn Ohó Jiwheyẹwhe tọn zan gbọn ayidonugo nina wefọ tangan he nupinplọn lọ bẹhẹn lẹ dali. (2Kọ 10:4; Heb 4:12; be 144 huk. 1-3) Nọ yí apajlẹ he bọawu lẹ zan. (be 245 huk. 2-4) Nọ hẹn nuhahun po nuyise nuplọntọ lọ tọn po do ayiha mẹ bo nọ do lehe oplọn lọ gandego do hia ẹ. Nọ kàn kanbiọ taidi ehelẹ sè e: “Etẹwẹ a lẹn gando nuhe plọn a te lẹ go?” “Etẹwẹ ehe plọn we gando Jehovah go?” “Ale tẹwẹ ayinamẹ ehe yiyizan na hẹnwa na we?”—be 238 huk. 3-5; 259 huk. 1.