Jesu bẹ hodọdopọ de jẹeji hẹ yọnnu Samalianu lọ wẹ zọ́n bọ e do penugo nado dekunnuna ẹn to aliho mayin aṣa tọn mẹ. Nawẹ mí sọgan hẹn nugopipe mítọn nado nọ bẹ hodọdopọ jẹeji hẹ mẹhe mí ma jẹakọ hẹ lẹ pọnte dogọ gbọn?

• Nọ jọmẹ bo nọ dọho hẹ mẹhe a dukosọna lẹ. Mahopọnna dọ nuṣikọna Jesu, e bẹ hodọdopọ etọn jẹeji gbọn osin bibiọ poun dali. Enẹwutu, nado bẹ hodọdopọ de jẹeji, nọ dọnudo mẹlọ po zohunhun po, enẹgodo, a gán dọhodo ninọmẹ aimẹ tọn, ahihun he ma wá do gànmẹ, kavi nujijọ agọe tọn de ji. Flindọ yanwle towe tintan wẹ nado bẹ hodọdopọ de jẹeji, enẹwutu, dọhodo nudepope he mẹ mẹlọ sọgan tindo ojlo te ji. Eyin mẹlọ ma tindo ojlo, enẹ ma yin nude. Vọ́ tẹnpọn po mẹdevo po. Biọ adọgbigbo Jehovah.—Nẹ 2:4; Ow 4:29.

• Nọ to aṣeji gando dotẹnmẹ hundote depope nado dọhodo wẹndagbe lọ ji go, ṣigba ma nọ nọ̀ plaplaji blo. Dike hodọdopọ lọ ni yì to jọwamọ-liho. Eyin a yawu donù wẹndagbe lọ go, e sọgan vẹna mẹlọ bọ hodọdopọ lọ ma na zindonukọn. Ni a ma penugo nado dekunnuna mẹlọ whẹpo hodọdopọ lọ do doalọte, ma jẹflumẹ blo. Eyin e nọ vẹawuna we nado dekunnu to aliho mayin aṣa tọn mẹ, plọn nado nọ bẹ hodọdopọ lẹ jẹeji matin yanwle lọ nado dekunnu. [Hò video 1 bo dọhodeji hẹ mẹplidopọ lẹ.]

• To hodọdopọ lọ whenu, a gán dọ nude he na hùn dotẹnmẹ kunnudide tọn dote, gbọn ahundopo yíyí do dọhodo nuyise towe lẹ ji dali, ehe na whàn mẹlọ nado kanhose we. Nuhe Jesu dọ lẹ fọnjlodotena yọnnu lọ bo whàn ẹn nado kannubiọ. To whenue e wá donù wẹndagbe lọ go, nuhe e dọ lẹ ma yin nudevo hú gblọndo na kanbiọ yọnnu lọ tọn lẹ. [Hò video 2tọ bo dọhodeji hẹ mẹplidopọ lẹ, enẹgodo wà nudopolọ na video 3tọ.]