Eyin họntọn mítọn de do nuhahun apọ̀nmẹ tọn sinsinyẹn, enẹ gán húagbọ́ mí. Amọ́, mí gán do obá he mẹ onú họntọn mítọn tọn nọ duahunmẹna mí jẹ hia eyin mí gọalọna ẹn nado pehẹ nuhahun apọ̀nmẹ tọn sinsinyẹn etọn. Gbọnna?

“Nọ yawu nado dotoai.”—JAKỌBU 1:19.

Dopo to aliho dagbe hugan he mẹ a gán gọalọna họntọn towe te wẹ nado dotoaina ẹn whenue e jlo na dọho. Ma nọ mọdọ emi dona gblọnna nuhe e dọ lẹpo blo. Nọ kẹalọyi nuhe e dọ bo tẹnpọn nado do awuvẹmẹ hia. Dovivẹnu nado ze dewe do otẹn etọn mẹ bo ma dawhẹna ẹn kavi mọhodọdego blo. Flindọ e gán dọ nudelẹ to mayọnẹn mẹ bọ e na wá vẹna ẹn.—Jobu 6:2, 3.

“Nọ dọho homẹmiọnnamẹ tọn.”—1 TẸSALONIKANU LẸ 5:14.

Họntọn towe gán do magbọjẹ kavi pehẹ numọtolanmẹ nuvọ́nọ-yinyin tọn. Eyin a nọ hẹn ẹn deji dọ onú etọn nọ duahunmẹna emi, a gán miọnhomẹna ẹn bosọ na ẹn tuli eyin a ma tlẹ yọ́n nuhe a na dọ taun.

“Họntọn nugbo nọ yiwannamẹ to whelẹponu.”—HOWHINWHẸN LẸ 17:17.

Nọ gọalọ to aliho dagbe mẹ. Kakati nado lẹndọ emi yọ́n lehe emi na gọalọ do, kanse e nuhe a gán wà. Eyin e vẹawuna họntọn towe  nado dọ nuhe sin hudo e do, a gán dọ nudagbe he mì gán wà dopọ de taidi sadidi. Kavi a gán dọna ẹn dọ emi na gọalọna ẹn nado whleahi, jla whégbè do kavi wà azọ́n devo de.—Galatianu lẹ 6:2.

“Nọ fahomẹ.”—1 TẸSALONIKANU LẸ 5:14.

Họntọn towe gán nọma nọ jlo na dọho to whelẹponu. Nọ hẹn ẹn deji dọ homẹ emitọn na hùn nado dotoaina ẹn to whenue e jlo na dọho. Azọ̀n họntọn towe tọn gán zọ́n bọ e na nọ dọ kavi wà nudelẹ he na vẹna we. E gán nọ zẹhudo tito he mì basi lẹ ji kavi nọ yawu gblehomẹ. Nọ fahomẹ bo nọ ze dewe do otẹn etọn mẹ dile a to alọgọ he e do hudo etọn na ẹn.—Howhinwhẹn lẹ 18:24.

“N’nọ wà nuhe go n’pé lẹpo nado dohia dọ n’yin họntọn dejidego de. Eyin n’ma tlẹ do pọngbọ na nuhahun etọn lẹ, n’nọ dotoaina nuhe e jlo na dọ lẹ po sọwhiwhe po. To whedelẹnu, nuhe sin hudo e do nado mọ ede mẹ lẹpo ma hugan mẹde he na dotoaina ẹn.”—Farrah, a he họntọn etọn do nuhahun gando núdùdù, magbọjẹ po apọṣimẹ po go.

“Họntọn ṣie de nọ jọmẹ bosọ nọ namẹ tuli taun. E ylọ mi wá owhé etọn gbè bo dà núdùdù dagbedagbe de na mi. E do owanyi hia mi sọmọ bọ n’voawu nado dọ numọtolanmẹ ṣie lẹ tọ́n. Ehe na mi tuli taun!”—Ha-eun he to apọṣimẹ-zọ̀n jẹ.

“Homẹfa yin nujọnu taun. Eyin asi ṣie wà nude he gblehomẹna mi, n’nọ flinnu dee dọ awutu etọn wẹ zọ́n, e ma jọ mọ. Ehe nọ gọalọna mi ma nado duadi bosọ jọmẹ hẹ ẹ dogọ.”—Jacob, mẹhe asi etọn to apọṣimẹ-zọ̀n jẹ.

“Asi ṣie ko gọalọna mi bosọ miọnhomẹna mi taun. Whenue magbọjẹ lẹ húagbọ́ mi, e ma nọ hẹn mi po huhlọn po nado wà nudepope he ma jlo mi. To whedelẹnu, ehe nọ zọ́n bọ e ma nọ penugo nado wà nude he e na ko jlo taun nado wà. Gbigbọ mẹde-yido-sanvọ́ tọn etọn po nunamẹ tọn etọn po ma pé awe.”—Enrico, he do nuhahun magbọjẹ tọn sinsinyẹn de.