1. Naegbọn mí do nọ na gblọndo to opli lẹ ji?

 NAEGBỌN mí do nọ yì opli agun tọn lẹ? Whẹwhinwhẹ́n tintan lọ wẹ nado pà Jehovah. (Salm. 26:12; 111:1) Mí sọ nọ yì opli lẹ, na mí nido penugo bo na tuli ode awetọ to ojlẹ awusinyẹn tọn ehelẹ mẹ. (1 Tẹs. 5:11) Eyin mí ze alọ bo na gblọndo, mí nọ gọalọ nado jẹ yanwle awe ehelẹ kọ̀n.

2. Dotẹnmẹ hundote tẹlẹ wẹ mí tindo nado na gblọndo to opli lẹ ji?

² To sẹmẹsẹmẹ, mí do dotẹnmẹ hundote lẹ nado na gblọndo to opli mítọn lẹ ji. Di apajlẹ, to sẹfifo lẹ, mí gán do mahẹ to Oplọn Atọ̀họ̀-Nuhihọ́ lọ Tọn he nọ yin bibasi to agun mẹ lẹ whenu. To opli osẹ ṣẹnṣẹn tọn mítọn lẹ ji, mí gán na gblọndo to Onú Sisosiso Gbigbọmẹ Tọn lẹ, Biblu Pinplọn Agun Tọn, podọ to adà hodọdopọ tọn devo lẹ whenu.

3. Avùnnukundiọsọmẹnu tẹlẹ wẹ mí gán pehẹ, podọ nawẹ Heblu lẹ 10:24, 25 gán gọalọ gbọn?

³ Mímẹpo wẹ nọ jlo na pà Jehovah bo na tuli sinsẹ̀n-basitọ hatọ mítọn lẹ. Amọ́ nudelẹ gán nọ hẹn ẹn vẹawuna mí nado na gblọndo. Mí gán nọ dibu nado na gblọndo kavi tindo ojlo vẹkuvẹku nado na gblọndo amọ́ bọ yè ma na yí alọ mítọn whẹwhẹ dile mí na ko jlo do. Nawẹ mí gán pehẹ avùnnukundiọsọmẹnu ehelẹ gbọn? Mí mọ gblọndo lọ to wekanhlanmẹ apọsteli Paulu tọn hlan Heblu lẹ mẹ. To whenue e to hodọ do nujọnu-yinyin pipli dopọ tọn ji, e dọ dọ mí dona nọ na ayidonugo ‘tulinina ode awetọ.’ (Hia Heblu lẹ 10:24, 25.) Mí na voawu dogọ nado ze alọ, eyin mí nọ flindọ gblọndo kleun he do yise mítọn hia de tlẹ gán na tuli mẹdevo lẹ. Podọ, eyin yè  ma yí alọ mítọn whẹwhẹ, homẹ mítọn gán hùn dọ mẹdevo lẹ to agun lọ mẹ na do dotẹnmẹ nado na gblọndo.—1 Pita 3:8.

4. Nuagokun atọ̀n tẹlẹ wẹ mí na gbadopọnna to hosọ ehe mẹ?

⁴ To hosọ ehe mẹ, jẹnukọn whẹ́, mí na dọhodo lehe mí gán na tuli ode awetọ to agun pẹvi de mẹ do ji, fie mẹplidopọ lẹ ma nọ sù te. Enẹgodo, mí na gbadopọnna lehe mí gán na tuli ode awetọ to agun daho de mẹ do, fie mẹsusu nọ ze alọ nado na gblọndo te. Gbọngodo, mí na dọhodo aliho delẹ he mẹ mí gán yí nuhe mí nọ dọ to gblọndo mítọn lẹ mẹ do na tuli nujọnu tọn mẹdevo lẹ te ji.

5. Nawẹ mí gán na tuli ode awetọ gbọn eyin sọha mẹplidopọ lẹ tọn ma sù?

⁵ To agun pẹvi kavi kándo de mẹ, gbẹtọ ma nọ sù sọmọ bọ anademẹtọ lọ gán ylọ. To whedelẹnu, e gán biọ dọ ni nọte pẹẹde whẹpo mẹde nido ze alọ nado na gblọndo. Opli lọ gán hẹn apọṣimẹ, bo ma namẹ tuli sọmọ. Etẹwẹ a gán wà? Nọ tindo ojlo nado ze alọ whẹwhẹ. Gbọnmọ dali, a gán na tuli mẹdevo lẹ nado nọ na gblọndo whẹwhẹ dogọ.

6, 7. Nawẹ mí gán de nuhiha depope he mí tindo nado na gblọndo pò gbọn?

⁶ Etẹwẹ lo, eyin linlẹn lọ tata nado na gblọndo nọ dobuna we? Mẹsusu wẹ gán do numọtolanmẹ enẹ. Amọ́, nado yin asisa tulinamẹ daho tọn de na mẹmẹsunnu po mẹmẹyọnnu towe lẹ po, naegbọn a ma na dín aliho lẹ nado duto obu towe nado na gblọndo ji? Nawẹ a gán wà enẹ gbọn?

⁷ A gán mọdọ e yin alenu nado gbadopọnna ayinamẹ delẹ he yin zinzinjẹgbonu to Atọ̀họ̀-Nuhihọ́ lọ Tọn b he wayi lẹ mẹ. Di apajlẹ, nọ wleawu ganji. (Howh. 21:5) Lehe a jẹakọ hẹ hosọ lọ dogọ sọ, mọwẹ a na voawu dogọ nado jlo nado na gblọndo do niyẹn. Humọ, nọ na gblọndo he to glido lẹ. (Howh. 15:23; 17:27) Gblọndo he to kleun na de nuhiha towe pò. E tlẹ gán bọawuna mẹmẹsunnu po mẹmẹyọnnu towe lẹ po dogọ nado mọnukunnujẹ gblọndo kleun de, vlavo he bẹ linlẹn dopo kavi awe hẹn, hugan gblọndo gaa he bẹ linlẹn susu hẹn mẹ. Eyin a nọ na gblọndo kleun to hogbe towe titi lẹ mẹ, a na dohia dọ a wleawu ganji, podọ dọ a mọnukunnujẹ hosọ lọ mẹ ganji.

8. Nukun tẹwẹ Jehovah nọ yí do pọ́n vivẹnudido mítọn lẹ?

⁸ Etẹwẹ lo eyin a tẹ́n delẹ to ayinamẹ ehelẹ mẹ pọ́n bo gbẹ́ nọ hanú taun nado na gblọndo hugan whladopo kavi whlaawe? Deji dọ Jehovah na yọ́n pinpẹn vivẹnudido ahundopo tọn towe lẹ tọn nado wà nuhe go a pé. (Luku 21:1-4) Dagbe hugan towe nina ma zẹẹmẹdo dọ a ni wà zẹ̀ nugopipe towe go. (Flp. 4:5) Yọ́n nuhe a gán wà, bo ze yanwle de dai nado wà ẹ, bosọ hodẹ̀ na ahun towe ni ma gbàdo blo. To tintan whenu, yanwle enẹ gán yin nado na gblọndo he to glido de.

9. Avùnnukundiọsọmẹnu tẹwẹ gán fọ́n to agun daho lẹ mẹ?

⁹ Eyin wẹnlatọ susu wẹ to agun towe mẹ, a gán pehẹ avùnnukundiọsọmẹnu devo. Vlavo mẹmẹsunnu po mẹmẹyọnnu susu po nọ jlo na na gblọndo sọmọ bọ yè ma nọ yawu yí alọ towe. Di apajlẹ, Danielle nọ saba yiwanna nado na gblọndo to opli lẹ ji. c E nọ pọ́n ehe hlan taidi adà sinsẹ̀n-bibasi etọn tọn, aliho de nado na tuli mẹdevo lẹ, bosọ hẹn yise ede tọn  gando nugbo Biblu tọn lẹ go lodo. Amọ́ whenue e sẹtẹn yì agun daho de mẹ, yè ma nọ saba yí alọ etọn, etlẹ yin whladopo tata to opli de blebu whenu to whedelẹnu. E dọmọ: “E nọ vẹna mi taun. E nọ di na mi dọ lẹblanulọkẹyi de gbọ go e wẹ nkọ. Eyin e wá jẹ whẹwhẹ, a na kanse dewe eyin anademẹtọ lọ ma nọ desọn ojlo mẹ nado wàmọ.”

10. Etẹlẹ wẹ mí gán wà nado do dotẹnmẹ dogọ nado na gblọndo?

¹⁰ Be a ko do numọtolanmẹ Danielle tọn nkọ pọ́n ya? Eyin mọ wẹ, a gán yin whiwhlepọn nado hònúpla bo gbọ bo nọ dotoai to opli lẹ ji poun. Amọ́, ma doalọtena vivẹnudido nado na gblọndo blo. Etẹwẹ a gán wà? A gán mọdọ e yin alenu nado wleawuna gblọndo susu na opli dopodopo. Gbọnmọ dali, eyin yè ma yí alọ towe to bẹjẹeji nupinplọn lọ tọn, a na gbẹ́ do dotẹnmẹ nado na gblọndo dile opli lọ to yìyì. Whenue a to awuwlena Oplọn Atọ̀họ̀-Nuhihọ́ lọ Tọn, lẹnnupọndo lehe hukan dopodopo tindo kanṣiṣa hẹ hosọ lọ do ji. Eyin a wàmọ, e yọnbasi dọ a na tindo gblọndo dagbe de nado na to nupinplọn lọ whenu. Humọ, a gán nọ wleawu nado na gblọndo to hukan he dọhodo nugbo sisosiso he nọ vẹawu hugan nado basi zẹẹmẹ yetọn lẹ ji. (1 Kọl. 2:10) Etẹwutu? Na vlavo omẹ vude wẹ na jlo nado na gblọndo to adà nupinplọn lọ tọn enẹ whenu. Etẹwẹ lo, eyin mahopọnna dọ a yí ayinamẹ ehelẹ do yizan mẹ, a mọdọ to opli susu godo, a ma ko do dotẹnmẹ de nado na gblọndo janwẹ? A gán dọnsẹpọ anademẹtọ lọ jẹnukọnna opli lọ bo dọ kanbiọ he a jlo na na gblọndo etọn na ẹn.

11. Etẹwẹ Filipinu lẹ 2:4 dotuhomẹna mí nado wà?

¹¹ Hia Filipinu lẹ 2:4. To gbọdo glọ, apọsteli Paulu na tuli Klistiani lẹ nado na ayidonugo nuhe na wà dagbe na mẹdevo lẹ. Nawẹ mí gán yí ayinamẹ enẹ do yizan mẹ to opli lẹ ji gbọn? Mí nọ wàmọ, eyin mí nọ flindọ taidi mílọsu, mẹdevo lẹ nọ tindo ojlo nado na gblọndo.

12. Aliho dagbe tẹ mẹ wẹ mí gán na tuli mẹdevo lẹ to opli lẹ ji te? (Sọ pọ́n yẹdide lọ.)

¹² Lẹnnupọndo apajlẹ ehe ji. Mí ni dọ dọ a to hodọdopọ hẹ họntọn towe lẹ, be a na dọho susu sọmọ bọ dotẹnmẹ vude poun wẹ yé na do nado dọho wẹ ya? Na nugbo tọn, lala wẹ! A nọ jlo dọ yé ni do mahẹ to hodọdopọ lọ mẹ.  Mọdopolọ, to opli lẹ ji, mí nọ jlo na na dotẹnmẹ mẹsusu dile e gán yọnbasi do nado na gblọndo. Na nugbo tọn, dopo to aliho dagbe hugan nado na tuli mẹmẹsunnu po mẹmẹyọnnu mítọn lẹ po mẹ wẹ nado na yé dotẹnmẹ nado dọho gando yise yetọn go. (1 Kọl. 10:24) Mì gbọ mí ni gbadopọnna lehe mí gán wàmọ do.

13. Nawẹ mí gán na dotẹnmẹ mẹsusu dogọ to mẹplidopọ lẹ mẹ nado na gblọndo gbọn?

¹³ Onú dopo wẹ yindọ mí gán nọ na gblọndo he to glido lẹ, bo gbọnmọ dali na whenu mẹsusu dogọ nado na gblọndo. Mẹho agun tọn po wẹnlatọ numimọnọ devo lẹ po gán ze apajlẹ dai to adà ehe mẹ. Etlẹ yin whenue a to gblọndo kleun de na, dapana hodidọ do nuagokun susu lẹ ji. Eyin a dọ nuhe to hukan lọ mẹ lẹpo, nukaka de ma na pò na mẹdevo lẹ nado dọ. To hukan ehe mẹ di apajlẹ, ayinamẹ awe wẹ yin nina, enẹ wẹ nado nọ na gblọndo he to glido, bosọ dapana hodidọ do nuagokun susu ji. Eyin alọ towe wẹ yè yí jẹnukọn nado na gblọndo do hukan ehe ji, naegbọn a ma na dọhodo dopo poun to nuagokun ehelẹ mẹ ji?

14. Etẹwẹ gán gọalọna mí nado de whla nẹmu he mí na ze alọ? (Sọ pọ́n yẹdide lọ.)

¹⁴ Nọ yí zinzin zan to whenue a jlo na de whla nẹmu he a na na gblọndo. Eyin mí nọ to alọ ze mapote, anademẹtọ lọ gán mọdọ mí to kọgbidina emi nado ylọ mí whlasusu, dile etlẹ yindọ mẹdevo lẹ ma ko na gblọndo depope. Enẹ gán hù awakàn mẹ na mẹdevo lẹ nado ze alọ.—Yẹwh. 3:7.

15. (a) Nawẹ mí dona nọ yinuwa gbọn eyin yè ma yí alọ mítọn nado na gblọndo? (b) Nawẹ anademẹtọ lẹ gán do mẹtọnhopọn hia mẹlẹpo gbọn? (Pọ́n apotin lọ “ Eyin Hiẹ Wẹ Yin Anademẹtọ Lọ.”)

¹⁵ Eyin wẹnlatọ susu ze alọ to oplọn de whenu, mí gán nọma na gblọndo whẹwhẹ dile mí na ko jlo do. To whedelẹnu, anademẹtọ lọ gán nọma penugo nado ylọ mí paali. Enẹ gán hẹnmẹ jẹflumẹ, amọ́, mí dona tẹnpọn ma nado gblehomẹ eyin yè ma yí alọ mítọn.—Yẹwh. 7:9.

16. Nawẹ mí gán na tuli mẹdevo he na gblọndo lẹ gbọn?

 ¹⁶ Eyin a ma nọ penugo nado na gblọndo whẹwhẹ dile a nọ jlo do, naegbọn a ma na yí sọwhiwhe do dotoai dile mẹdevo lẹ to gblọndo na, bo nọ pà yé to opli lọ godo na gblọndo yetọn? Mẹpipa towe gán na tuli mẹmẹsunnu po mẹmẹyọnnu towe lẹ po dile gblọndo he a na ko na de na wà do. (Howh. 10:21) Mẹdevo lẹ pipà sọ yin aliho devo nado na tuli ode awetọ.

17. (a) Nawẹ mẹjitọ lẹ gán gọalọna ovi yetọn lẹ nado wleawuna gblọndo he sọgbe lẹ gbọn? (b) Sọgbe hẹ video lọ, afọdide ẹnẹ tẹlẹ wẹ mí gán ze nado wleawuna gblọndo de? (Sọ pọ́n nudọnamẹ odò tọn.)

¹⁷ Nawẹ mí gán sọ na tuli ode awetọ to opli mítọn lẹ ji gbọn? Eyin mẹjitọ de wẹ a yin, gọalọna ovi towe lẹ nado nọ wleawuna gblọndo he sọgbe hẹ owhe yetọn lẹ. (Mat. 21:16) To whedelẹnu, whẹho sinsinyẹn delẹ taidi dehe gando nuhahun alọwle tọn kavi whẹho walọ dagbe tọn go lẹ wẹ nọ yin dogbapọnna to nupinplọn de mẹ, amọ́ e yọnbasi dọ hukan dopo kavi awe ni tin he ji ovi de gán na gblọndo te. Humọ, nọ gọalọna ovi towe lẹ nado mọnukunnujẹ nuhewutu yè gán nọma ylọ yé to whelẹponu he yé ze alọ mẹ. Zẹẹmẹ ehe bibasi gán zọ́n bọ yé ma na jẹflumẹ whenue yè ma yí alọ yetọn bo ka yí mẹdevo lẹ tọn.—1 Tim. 6:18. d

18. Nawẹ mí gán dapana ayidonugo dindọn wá míde ji to whenue mí to gblọndo na gbọn? (Howhinwhẹn lẹ 27:2)

 ¹⁸ Mímẹpo wẹ gán wleawuna gblọndo mẹjlọdote tọn he na gbògbéna Jehovah bosọ na tuli Klistiani hatọ mítọn lẹ. (Howh. 25:11) Dile etlẹ yindọ to whedelẹnu, mí gán dọ numimọ mẹdetiti tọn kleun de, mí ma dona nọ dọho glanglan gando míde go. (Hia Howhinwhẹn lẹ 27:2; 2 Kọl. 10:18) Kakatimọ, mí nọ dovivẹnu nado ze ayidonugo do Jehovah, Ohó etọn po omẹ etọn lẹ po ji taidi pipli de. (Osọ. 4:11) Na nugbo tọn, eyin kanbiọ hukan de tọn biọ to mí si nado na numimọ mẹdetiti tọn de, be e sọgbe nado wàmọ. Apajlẹ ehe tọn dopo tin to hukan he bọdego mẹ to hosọ ehe mẹ.

19. (a) Etẹwẹ na yin kọdetọn lọ eyin mí nọ do mẹtọnhopọn hia mẹplidopọ lẹpo? (Lomunu lẹ 1:11, 12) (b) Etẹwẹ a nọ yiwanna gando gblọndo nina to opli lẹ ji go?

¹⁹ Dile etlẹ yindọ osẹ́n tangan lẹ ma yin dido gando lehe yè na na gblọndo do go, mímẹpo gán dovivẹnu nado nọ na gblọndo tulinamẹ tọn lẹ. Ehe gán zẹẹmẹdo gblọndo lẹ nina whẹwhẹ dogọ. Kavi e gán zẹẹmẹdo nado nọ do pekọ to dotẹnmẹ he mí tindo nado nọ na gblọndo lẹ mẹ, bo nọ jaya dọ mẹdevo lẹ do dotẹnmẹ nado na gblọndo ga. Eyin mí na ayidonugo nuhe na wà dagbe na mẹdevo lẹ to opli agun tọn lẹ ji, mímẹpo gán duvivi “tulinina ode awetọ” tọn.—Hia Lomunu lẹ 1:11, 12.