HOSỌ OPLỌN TỌN 19
Nọ Hẹn Yise Towe to Opagbe Aihọn Yọyọ lọ Tọn mẹ Lodo
“Eyin [Jehovah] dọ nude, be e ma na wà ẹ wẹ?”—SỌH. 23:19.
OHÀN 142 Mí Ni Hẹn Todido Mítọn Go Gligli
BLADOPỌ a
1, 2. Etẹwẹ mí dona wà dile mí to tepọn aihọn yọyọ lọ?
OPAGBE Jehovah tọn nado yí aihọn yọyọ dodowiwa tọn de do diọtẹnna titonu ehe họakuẹ taun to nukun mítọn mẹ. (2 Pita 3:13) Dile etlẹ yindọ mí ma yọ́n whenue aihọn yọyọ enẹ na wá na taun tọn, kunnudenu dohia dọ azán kaka de masọ pò to gbàn ji.—Mat. 24:32-34, 36; Owalọ 1:7.
2 Todin whẹ́, mahopọnna lehe mí ko to nugbo lọ mẹ dẹnsọ, mímẹpo wẹ dona hẹn yise mítọn to opagbe enẹ mẹ lodo. Etẹwutu? Na yise he tlẹ lodo de gán miọn wutu. Na nugbo tọn, apọsteli Paulu ylọ yise matindo dọ “ylando he nọ bẹpla mí po awubibọ po.” (Heb. 12:1) Na yise mítọn nikaa miọn, mí dona nọ vọ́ dogbapọnna kunnudenu he dohia dọ aihọn yọyọ lọ na wá to madẹnmẹ lẹ whẹwhẹ.—Heb. 11:1.
3. Etẹwẹ mí na gbadopọnna to hosọ ehe mẹ?
3 To hosọ ehe mẹ, mí na gbadopọnna aliho atọ̀n delẹ he mẹ mí gán hẹn yise mítọn to opagbe he Jehovah do gando aihọn yọyọ lọ go mẹ lodo te: (1) gbọn ayihamẹlinlẹnpọn do ofligọ lọ ji dali, (2) gbọn nulinlẹnpọn do huhlọn Jehovah tọn ji dali, podọ (3) gbọn whenu yiyizan na nuwiwa gbigbọmẹ tọn lẹ dali. Enẹgodo, mí na dọhodo lehe owẹ̀n Jehovah tọn na Habakuku nọ hẹn yise mítọn lodo to egbehe do ji. Amọ́ jẹnukọn whẹ́, mì gbọ mí ni gbadopọnna ninọmẹ delẹ he mí gán to pipehẹ to alọnu he nọ biọ dọ mí ni tindo yise he lodo to aihọn yọyọ dopagbe he ja lọ mẹ.
NINỌMẸ DELẸ HE NỌ BIỌ YISE HE LODO
4. Nudide tẹlẹ wẹ nọ biọ yise he lodo?
4 Egbesọegbesọ, mí nọ basi nudide lẹ he nọ biọ dọ mí ni do yise he lodo. Di apajlẹ, mí nọ basi nudide gando gbẹdido, ayidedai, wepinplọn, alọwiwle, vijiji po agbasazọ́n po go. Mí na wà dagbe nado nọ kanse míde dọ, ‘Be nudide ṣie lẹ nọ dohia dọ n’kudeji dọ azán kaka de ma pò na titonu ehe bọ aihọn yọyọ Jiwheyẹwhe tọn na diọtẹnna ẹn to madẹnmẹ ya? Kavi mẹhe nọ nọgbẹ̀ taidi dọ okú wẹ yin opodo nulẹpo tọn lẹ wẹ nọ yinuwado nudide ṣie lẹ ji?’ (Mat. 6:19, 20; Luku 12:16-21) Mí na basi nudide dagbe hugan lẹ, eyin mí nọ hẹn yise mítọn lodo dọ aihọn yọyọ lọ ko to yakẹ.
5, 6. Naegbọn mí do dó hudo yise he lodo tọn to ojlẹ adángbòmẹ tọn lẹ mẹ? Na apajlẹ.
5 Mí sọ nọ pehẹ whlepọn delẹ he nọ biọ yise he lodo. Mí gán pehẹ homẹkẹn, azọ̀n jẹmagbọ kavi nudevo lẹ he gán zọ́n bọ mí na gbọjọ. To tintan whenu, mí gán mọdọ mí na penugo nado doakọnna whlepọn mítọn. Amọ́, eyin ninọmẹ lọ wá to nukọnzindo, dile e nọ saba yindo na whlepọn lẹ, mí na do hudo yise he lodo tọn nado doakọnnanu podọ nado zindonukọn bo to Jehovah sẹ̀n po ayajẹ po.—Lom. 12:12; 1 Pita 1:6, 7.
6 To whenue mí to jujugbọn whlepọn de mẹ, mí gán lẹndọ aihọn yọyọ Jehovah tọn ma na wá pọ́n gbede. Be ehe dohia dọ yise mítọn ma lodo wẹ ya? E ma yinmọ dandan. Lẹnnupọndo apajlẹ de ji. To ojlẹ jikun sinsinyẹn tọn mẹ, mí gán lẹndọ ojlẹ akudido tọn ma nasọ wá ba. Ṣogan, e nọ wá. Mọdopolọ, whenue mí gbọjọ petepete, mí gán mọdọ aihọn yọyọ lọ ma na wá gbede. Amọ́ eyin yise mítọn lodo, mí nọ yọnẹn dọ opagbe Jiwheyẹwhe tọn lẹ na mọ hẹndi. (Salm. 94:3, 14, 15; Heb. 6:17-19) Po jidide enẹ po, mí gán zindonukọn nado ze sinsẹ̀n-bibasi mítọn na Jehovah do otẹn tintan mẹ to gbẹzan mítọn mẹ.
7. Pọndohlan tẹwẹ mí dona họ́ míde sọta?
7 Lẹnnupọndo whẹho devo ji he nọ biọ yise he lodo, enẹ wẹ azọ́n yẹwhehodidọ tọn. Mẹhe mí nọ dọyẹwheho na susu wẹ nọ lẹndọ “wẹndagbe” he gando aihọn yọyọ Jiwheyẹwhe tọn he ja lọ go yin otàngblo de poun. (Mat. 24:14; Ezek. 33:32) Mí ma na dike gbede na ayihaawe he yé nọ do ni yinuwado mí ji. Ma nado dike enẹ ni jọ, mí dona to yise mítọn hẹn lodo zọnmii. Mì gbọ mí ni gbadopọnna aliho atọ̀n delẹ he mẹ mí gán wàmọ te.
NỌ LẸNAYIHAMẸPỌN DO OFLIGỌ LỌ JI
8, 9. Nawẹ ayihamẹlinlẹnpọn do ofligọ lọ ji gán yinuwado yise mítọn ji gbọn?
8 Aliho dopo nado hẹn yise mítọn lodo wẹ nado nọ lẹnayihamẹpọn do ofligọ lọ ji. Ofligọ lọ yin kunnudenu dejidego lọ dọ opagbe Jiwheyẹwhe tọn lẹ na mọ hẹndi. Eyin mí yí sọwhiwhe do lẹnnupọndo nuhewutu ofligọ lọ do yin awuwlena po nuhe e bẹhẹn po ji, mí nọ hẹn yise mítọn lodo dọ opagbe Jiwheyẹwhe tọn gando ogbẹ̀ madopodo to aihọn he pọnte de mẹ go na mọ hẹndi janwẹ. Naegbọn mí gán dọ mọ?
9 Etẹwẹ ofligọ lọ bẹhẹn? Jehovah do Visunnu plọnji yiwanna etọn, yèdọ gbẹdohẹmẹtọ alọmayiemẹ etọn hlan sọn olọn nado wá yin jiji taidi gbẹtọvi pipé de do aigba ji. To whenue Jesu to aigba ji, e doakọnna awusinyẹnnamẹnu wunmẹ lẹpo. Enẹgodo, e jiya bo kú okú awufiẹsa tọn de. Ahọ́ daho nankọ die he Jehovah sú! Jiwheyẹwhe owanyinọ mítọn ma na ko dike gbede na Visunnu etọn ni jiya bo kú nado na mí ogbẹ̀ he pọnte amọ́ bo ka whègli taun de poun gba. (Joh. 3:16; 1 Pita 1:18, 19) Na Jehovah suahọ daho mọnkọ wutu, e na hẹn ẹn diun dọ ogbẹ̀ madopodo to aihọn yọyọ lọ mẹ na mọ hẹndi.
NỌ LẸNNUPỌNDO HUHLỌN JEHOVAH TỌN JI
10. Sọgbe hẹ Efesunu lẹ 3:20, etẹwẹ Jehovah penugo nado wà?
10 Aliho awetọ he mẹ mí gán hẹn yise mítọn lodo te wẹ nado nọ lẹnnupọndo huhlọn Jehovah tọn ji. E dohuhlọn nado wà nudepope he e dopà etọn. Nugbo wẹ dọ mẹsusu lẹ to egbehe nọ lẹndọ e ma yọnbasi dọ mí ni nọgbẹ̀ kakadoi to aihọn yọyọ de mẹ. Amọ́, Jehovah nọ saba dopà nuhe gbẹtọvi lẹ ma gán wadotana gbede lẹ tọn. To popolẹpo mẹ, ewọ wẹ Jiwheyẹwhe Ganhunupotọ lọ. (Jobu 42:2; Malku 10:27) Enẹwutu, e ma nọ paṣa mí eyin e dopà nado wà nujiawu lẹ na mí!—Hia Efesunu lẹ 3:20.
11. Na apajlẹ opagbe jiawu Jiwheyẹwhe tọn de tọn. (Pọ́n apotin lọ “ Opagbe Jiawu Delẹ He Mọ Hẹndi.”)
11 Lẹnnupọndo nudelẹ he Jehovah dopà nado wà na omẹ etọn lẹ to hohowhenu bọ yé taidi nuhe ma yọnbasi lẹ ji. E hẹn Ablaham po Sala po deji dọ yé na ji visunnu de to yọnhowhe yetọn mẹ. (Jen. 17:15-17) E sọ dọna Ablaham dọ kúnkan etọn lẹ wẹ na dugu aigba Kenani tọn. To owhe planplan he kúnkan Ablaham tọn lẹ, yèdọ Islaelivi lẹ nọ kanlinmọgbenu to Egipti na lẹ whenu, opagbe enẹ gán ko taidi nuhe ma na mọ hẹndi gbede. Amọ́ e jọ domọ pẹpẹ. To nukọn mẹ, Jehovah dọna nawe mẹhomẹ lọ Elizabẹti dọ e na ji visunnu de. E sọ dọna yọnnu alọji de he nọ yin Malia dọ ewọ wẹ na ji Visunnu emitọn titi, mẹhe Jehovah ko dopà wiwá etọn tọn owhe fọtọ́n susu lẹ jẹnukọn to jipa Edẹni tọn mẹ, yèdọ opagbe devo he mọ hẹndi!—Jen. 3:15.
12. Jidide tẹwẹ Jọṣua 23:14 podọ Isaia 55:10, 11 na mí gando huhlọn Jehovah tọn go?
12 Mí nọ hẹn yise mítọn lodo dọ Jehovah dohuhlọn nado hẹn aihọn yọyọ de wá eyin mí nọ lẹnnupọndo opà he e do lẹ gọna lehe e ko hẹn yé di do ji. (Hia Jọṣua 23:14; Isaia 55:10, 11.) Ehe nọ hẹn mí penugo dogọ nado gọalọna mẹdevo lẹ nado mọdọ opagbe aihọn yọyọ lọ tọn ma yin odlọ kavi hopàdọ de poun. Jehovah lọsu dọ gando olọn yọyọ po aigba yọyọ lọ po go dọ: “Ohó ehelẹ tindo jidide bo yin nugbo.”—Osọ. 21:1, 5.
NỌ YÍ NUWIWA GBIGBỌMẸ TỌN LẸ DO HẸN ALỌNU TOWE JÁN
OPLI AGUN TỌN LẸ
Nawẹ nuwiwa gbigbọmẹ tọn ehe gán hẹn yise towe lodo gbọn? (Pọ́n hukan 13tọ)
13. Nawẹ opli agun tọn lẹ gán nọ hẹn yise mítọn lodo gbọn? Basi zẹẹmẹ.
13 Aliho atọ̀ntọ he mẹ mí gán hẹn yise mítọn lodo te wẹ nado nọ yí whenu zan na nuwiwa gbigbọmẹ tọn lẹ. Di apajlẹ, lẹnnupọndo lehe mí nọ mọaleyi sọn opli agun tọn lẹ mẹ do ji. Anna he ko yí owhe susu zan to adà sinsẹ̀nzọn whenu-gigọ́ tọn voovo lẹ mẹ dọmọ: “Opli lẹ ko zọ́n bọ yise ṣie lodo gligli. Eyin nugopipe mẹpinplọn tọn hodọtọ lọ tọn lẹ tlẹ do dogbó kavi dọ e ma plọnmẹ nuyọyọ de, n’nọ saba sè nude he nọ hẹn nukunnumọjẹnumẹ ṣie gando nugbo Biblu tọn go pọnte, podọ enẹ nọ hẹn yise ṣie lodo.” b Matin ayihaawe, mí sọ nọ yọ́n pinpẹn gblọndo mẹplidopọ lẹ tọn he nọ hẹn yise mítọn lodo lẹ tọn.—Lom. 1:11, 12; 10:17.
LIZỌNYIZỌN LỌ
Nawẹ nuwiwa gbigbọmẹ tọn ehe gán hẹn yise towe lodo gbọn? (Pọ́n hukan 14tọ)
14. Nawẹ lizọnyizọn lọ nọ hẹn yise mítọn lodo gbọn?
14 Mí sọ nọ hẹn yise mítọn lodo eyin mí nọ tọ́n na lizọnyizọn lọ. (Heb. 10:23) Barbara he ko to Jehovah sẹ̀n na owhe 70 linlán dọmọ: “Whelẹponu wẹ n’nọ mọdọ azọ́n yẹwhehodidọ tọn lọ nọ hẹn yise ṣie lodo. Lehe n’to hodọ na mẹdevo lẹ gando opagbe jiawu Jehovah tọn lẹ go sọ, mọ wẹ yise ṣie nọ togbẹ̀ bosọ nọ lodo dogọ do niyẹn.”
OPLỌN MẸDETITI TỌN
Nawẹ nuwiwa gbigbọmẹ tọn ehe gán hẹn yise towe lodo gbọn? (Pọ́n hukan 15tọ)
15. Nawẹ oplọn mẹdetiti tọn nọ hẹn yise mítọn lodo gbọn? (Sọ pọ́n yẹdide lọ lẹ.)
15 Lẹnnupọndo nuwiwa gbigbọmẹ tọn devo he nọ hẹn yise mítọn lodo ji, enẹ wẹ oplọn mẹdetiti tọn. Susan mọdọ e nọ yin alenu nado basi tito na ojlẹ nupinplọn tọn etọn lẹ. E dọmọ: “To sẹgbe lẹ, n’nọ plọn hosọ Atọ̀họ̀-Nuhihọ́ lọ Tọn osẹ he na bọdego tọn. To lundi lẹ po mardi lẹ po, n’nọ wleawuna opli osẹ ṣẹnṣẹn tọn. To azán he pò lẹ ji, n’nọ gbadopọnna nuhe n’basi tito nado plọn to oplọn mẹdetiti tọn whenu lẹ.” Na Susan nọ tẹdo tito nupinplọn tọn gbesisọ tọn de go wutu, e nọ to yise etọn hẹn lodo zọnmii. Irene he ko sẹ̀n na owhe susu to tatọ́-tẹnnọ mítọn nọ mọdọ dogbigbapọnna dọdai Biblu tọn lẹ nọ hẹn yise emitọn lodo. E dọmọ: “E nọ jiawu na mi taun dọ etlẹ yin adà flinflin dọdai Jehovah tọn lẹ tọn nọ mọ hẹndi.” c
“E NA MỌ HẸNDI JANWẸ”
16. Naegbọn jidevọnamẹ Jehovah tọn na Habakuku do tindo zẹẹmẹ na mí to egbehe? (Heblu lẹ 10:36, 37)
16 E ko yì ojlẹ dindẹn lẹ he devizọnwatọ Jehovah tọn delẹ to tepọn vivọnu titonu ehe tọn. To pọndohlan gbẹtọvi tọn mẹ, hẹndi opagbe Jiwheyẹwhe tọn lẹ tọn gán taidi nuhe to gbàndọn. Jehovah donù whẹho enẹ go whenue e hẹn yẹwhegán Habakuku deji dọmọ: “Numimọ lọ na yin hinhẹndi to ojlẹ dide etọn mẹ, e sọ to mizọnmizọn ji jei opodo etọn, podọ e ma na dolalo. Eyin e na tlẹ dọngbàn, to nukundo e zọnmii! Na e na mọ hẹndi janwẹ. E ma na gbọwhenu!” (Hab. 2:3) Be Habakuku kẹdẹ wutu wẹ Jiwheyẹwhe do wleawu jidevọnamẹ enẹ tọn ya? Kavi hogbe Etọn lẹ sọ tindo zẹẹmẹ na mí to egbehe? To gbọdo glọ, apọsteli Paulu yí hogbe enẹlẹ zan na Klistiani he to nukundo aihọn yọyọ lọ lẹ. (Hia Heblu lẹ 10:36, 37.) Mọwẹ, mí gán kudeji dọ eyin tundote mítọn he yin opagbe etọn do lọ tlẹ taidi nuhe to gbàndọn, “e na mọ hẹndi janwẹ. E ma na gbọwhenu!”
17. Nawẹ mẹmẹyọnnu de yí ayinamẹ he Jehovah na Habakuku do yizan mẹ gbọn?
17 Devizọnwatọ Jehovah tọn susu wẹ ko yí ayinamẹ Jehovah tọn lọ nado “to nukundo e zọnmii” do yizan mẹ, etlẹ yin na owhe susu lẹ. Di apajlẹ, Louise jẹ Jehovah sẹ̀n ji to 1939. E dọmọ: “To ojlẹ lọ mẹ, n’lẹndọ Amagẹdọni na wá whẹpo n’na fó wehọmẹ daho. Nulẹ ma wá yì domọ. To owhe lẹ gblamẹ, n’mọdọ e yin alenu nado hia nuhe n’nọ ylọdọ ‘kandai teninọ tọn lẹ,’ yèdọ nuhe Biblu dọ gando Noa, Ablaham, Josẹfu po mẹdevo lẹ po go, he dona nọte na ojlẹ dindẹn whẹpo do mọ ahọsumẹ he Jehovah dopà etọn lọ yí. Nado yise to whelẹponu dọ opagbe lẹ na mọ hẹndi ko gọalọna yẹn po mẹdevo lẹ po nado kudeji dọ aihọn yọyọ lọ ko sẹpọ pete.” Sinsẹ̀n-basitọ Jehovah tọn ojlẹ dindẹn tọn susu devo lẹ wẹ na kọngbedopọ hẹ enẹ!
18. Nawẹ nudida lẹ pinpọn gán hẹn yise mítọn to aihọn yọyọ he ja lọ mẹ lodo gbọn?
18 Nugbo wẹ dọ aihọn yọyọ lọ ma ko wá. Amọ́ lẹnnupọndo nudelẹ he tin lẹ ji, yèdọ sunwhlẹvu lẹ, atin lẹ, kanlin lẹ po gbẹtọvi hatọ towe lẹ po. Mẹdepope ma na do ayihaawe dọ onú ehelẹ tin nugbonugbo, dile etlẹ yindọ ojlẹ de tin wayi he mẹ yé ma ko yin didá te. Todin yé tin kiki na Jehovah dá yé wutu. (Jen. 1:1, 26, 27) Jiwheyẹwhe mítọn sọ dopà dọ emi na hẹn aihọn yọyọ de wá. E na hẹn opagbe enẹ di. To aihọn yọyọ lọ mẹ, gbẹtọvi lẹ na duvivi ogbẹ̀ madopodo tọn to agbasalilo pipé de mẹ. Mí gán kudeji dọ aihọn yọyọ lọ na wá to ojlẹ dide Jiwheyẹwhe tọn mẹ.—Isa. 65:17; Osọ. 21:3, 4.
19. Nawẹ a gán hẹn yise towe lodo gbọn?
19 Todin whẹ́, nọ yí dotẹnmẹ lẹpo zan nado hẹn yise towe lodo. Nọ hẹn pinpẹn-nutọn-yinyọnẹn towe na ofligọ lọ jideji. Nọ lẹnnupọndo huhlọn Jehovah tọn ji. Nọ hẹn alọnu towe ján to nuwiwa gbigbọmẹ tọn lẹ mẹ. Eyin a wàmọ, a gán tin to “mẹhe gbọn yise po sọwhiwhe po dali dugu opagbe lọ lẹ tọn lẹ” mẹ.—Heb. 6:11, 12; Lom. 5:5.
OHÀN 139 Mọ Dewe Hlan Aihọn Yọyọ lọ Mẹ
a To egbehe, mẹsusu ma nọ yise to opagbe Biblu tọn gando aihọn yọyọ lọ go mẹ. Yé nọ lẹndọ odlọ de poun wẹ, yèdọ otàngblo de. Amọ́ mí kudeji dọ opagbe Jehovah tọn lẹpo wẹ na mọ hẹndi. Etomọṣo, nado hẹn yise mítọn dogbẹ̀, mí dona to hinhẹn ẹn lodo zọnmii. Gbọnna? Hosọ ehe na basi zẹẹmẹ etọn.
b Yinkọ delẹ ko yin didiọ.
c Hosọ susu he gando dọdai Biblu tọn go lẹ gán yin mimọ to hóvila lọ “Dọdai” glọ to Anademẹwe Dodinnanu Tọn mẹ. Di apajlẹ, pọ́n hosọ lọ “Dọdai Jehovah Tọn lẹ Nọ Mọ Hẹndi” to Atọ̀họ̀-Nuhihọ́ lọ Tọn 1er janvier 2008 tọn mẹ.
