JOSẸFU ALIMATE TỌN lọsu ma tlẹ yọ́n fihe e hẹn adọgbigbo lọ sọn nado dọnsẹpọ ayimatẹn-gán Lomu tọn. Mẹlẹpo wẹ yọnẹn dọ Pọntiu Pilati ma nọ yawu sè mẹtọn. Etomọṣo, eyin Jesu na yin dìdì to aliho he wleyẹyi de mẹ, mẹde janwẹ dona yì Pilati dè nado yì biọ oṣiọ Jesu tọn. Amọ́, hodọdopọ hẹ Pilati ma wá vẹawu dile Josẹfu sọgan ko lẹn do. Whẹpo Pilati nado kẹalọyi obiọ lọ, e dindona sọn mẹkanwekowhàngán de dè whẹ́ eyin Jesu ko kú. Todin, mahopọnna dọ Josẹfu gbẹ́ pò to awubla mẹ, e yawu lẹkọyi fihe Jesu yin hùhù te.—Malku 15:42-45.

• Mẹnu wẹ Josẹfu Alimate tọn yin?

• Haṣinṣan tẹwẹ tin to ewọ po Jesu po ṣẹnṣẹn?

• Podọ naegbọn a dona tindo ojlo to otàn etọn mẹ?

Owe gbọdo Wẹndagbe Malku tọn ylọ Josẹfu dọ “hagbẹ Tòwedegbẹ́ lọ tọn, he yin omẹ nukundeji de.” Tofi, Tòwedegbẹ́ lọ ma yin nudevo hú Sanhedlin, yèdọ whẹdatẹn daho podọ wedegbẹ́ nukọntọ Ju lẹ tọn. (Malku 15:1, 43) Enẹwutu, Josẹfu yin dopo to nukọntọ omẹ etọn lẹ tọn mẹ, ehe wẹ na ko zọ́n bọ e do yin dotẹnmẹ na nado yì ayimatẹn-gán Lomu tọn dè. E masọ yin nupaṣamẹ dọ Josẹfu yin adọkunnọ de.​—Mat. 27:57.

Hagbẹ Sanhedlin lọ tọn lẹ to pọmẹ gbẹwanna Jesu. Yé blasé nado hù i. Ṣigba, Josẹfu yin yiylọdọ “mẹdagbe podọ dodonọ de.” (Luku 23:50) To vogbingbọn mẹ na suhugan hagbẹ etọn Sanhedlin tọn lẹ, ewọ nọ dọ nugbo, tindo walọ dagbe bo nọ wà nuhe go e pé lẹpo nado yìn gbedide Jiwheyẹwhe tọn lẹ. E sọ “to tenọpọn Ahọluduta Jiwheyẹwhe tọn,” ehe wẹ na ko zọ́n bọ ewọ do lẹzun devi Jesu tọn de. (Malku 15:43; Mat. 27:57) E yọnbasi dọ owẹ̀n Jesu tọn dọ̀n ẹn, na ewọ yiwanna nugbo po dodowiwa po wutu.

Johanu 19:38 dọ gando Josẹfu go dọ, “na obu etọn na Ju lẹ wutu, [e] yin devi Jesu tọn de to nuglọ.” Etẹwẹ Josẹfu to budina? E yọnẹn dọ Ju lẹ gbẹwanna Jesu bo ko sọ magbe nado yàn mẹdepope he dọ dọ emi yise to ewọ mẹ sọn sinagọgu mẹ. (Joh. 7:45-49; 9:22) Nado yin yinyan sọn sinagọgu mẹ zẹẹmẹdo nado lẹzun aṣagbọ́nu na Ju hatọ lẹ, yin kinklan dovo, podọ nado yin nuyiwa hẹ taidi mẹhe gble do whé. Enẹwutu, Josẹfu whleawu nado dohia to gbangba dọ emi tindo yise to Jesu mẹ. Na eyin e wàmọ, e na hẹn otẹn etọn po gbégbò he e nọ mọyi po bu.

E ma yin Josẹfu kẹdẹ wẹ pehẹ nuhahun ehe. Sọgbe hẹ Johanu 12:42, “na taun tọn, mẹsusu sọn ogán lẹ mẹ tlẹ tindo yise to [Jesu] mẹ, ṣigba na Falesi lẹ tọn wutu, yé ma nọ yigbe etọn, na yé nikaa yin yinyan sọn sinagọgu mẹ.” Mẹdevo he to ninọmẹ etọn nkọ mẹ wẹ Nikodẹmi, he yin hagbẹ Sanhedlin lọ tọn de ga.—Joh. 3:1-10; 7:50-52.

Ṣigba, devi de wẹ Josẹfu yin, amọ́ e ma gán gboadọ bo dọtọ́n. Nuhahun sinsinyẹn de wẹ enẹ yin, titengbe po nuhe Jesu dọ po dọmọ: “Mẹdepope he yigbe to gbẹtọ lẹ nukọn dọ emi tindo yise to yẹn mẹ, yẹnlọsu na yigbe etọn to Otọ́ ṣie he tin to olọn mẹ nukọn ga. Ṣigba, mẹdepope he mọ́n mi to gbẹtọ lẹ nukọn, yẹn na mọ́n ẹn to Otọ́ ṣie he tin to olọn mẹ nukọn ga.” (Mat. 10:32, 33) Mí ma gán dọ dọ Josẹfu mọ́n Jesu, mọjanwẹ e masọ gboadọ bo yigbe dọ emi tindo yise to ewọ mẹ do niyẹn. Bọ hiẹ lo?

Josẹfu jẹna pipà, na Biblu dohia dọ ewọ ma nọgodona sébibla Sanhedlin lọ tọn gando Jesu go. (Luku 23:51) Vlavo  dile mẹdelẹ dọ do, Josẹfu ma nọ otẹn he mẹ Jesu yin whẹdana te. Depope he whẹho lọ yin, mawadodo sinsinyẹn ehe na ko hẹn Josẹfu jẹflumẹ taun—amọ́ nudepope ma tin he e sọgan wà nado glọnalina ẹn!

To ojlẹ he mẹ Jesu kú te, e họnwun dọ Josẹfu ko duto obu etọn ji, podọ e de nado kọnawudopọ hẹ hodotọ Jesu tọn lẹ. Malku 15:43 do nudide etọn hia dọmọ: “E tindo adọgbigbo bo yì Pilati dè bosọ biọ oṣiọ Jesu tọn.”

E taidi dọ Josẹfu to finẹ whenue Jesu kú. Na nugbo tọn, ewọ ko yọnẹn dọ Jesu kú whẹpo Pilati do sè. Enẹ wẹ zọ́n bọ whenue Josẹfu biọ oṣiọ Jesu tọn, ayimatẹn-gán lọ “tindo ayihaawe eyin [Jesu] ko kú nugbo.” (Malku 15:44) Be awufiẹsa sinsinyẹn Jesu tọn to yatin ji he Josẹfu yí nukun etọn do mọ wẹ whàn ẹn nado gbeje ede pọ́n bo wá mọdọ emi dona do teninọ emitọn hia taidi devi Jesu tọn de ya? E sọgan yinmọ. Ṣigba, nuhe họnwun wẹ yindọ Josẹfu ko yin whinwhàn todin nado yinuwa. E ma nasọ yin devi nuglọ tọn de ba.

Osẹ́n Ju lẹ tọn biọ dọ mẹhe kú-whẹ̀ yin didá na lẹ ni yin dìdì whẹpo owhè nido yìhọ. (Deut. 21:22, 23) Ṣigba na Lomunu lẹ, oṣiọ sẹ́nhẹngbatọ lẹ tọn sọgan nọ yin jijodo pòtin ji nado yọ̀n kavi yin zizedlan yọdò pọmẹ tọn de mẹ. Amọ́ e ma yin nuhe Josẹfu jlo na Jesu niyẹn. Josẹfu tindo yọdò he ṣẹṣẹ yin kùnkùn do osé mẹ de  sẹpọ fihe Jesu yin hùhù te. Osé-slo enẹ he ma ko yin yiyizan pọ́n dohia dọ Josẹfu sẹtẹn sọn Alimate * wá Jelusalẹm e ma dẹn, podọ e sọgan ko to linlẹn nado yí nọtẹn lọ zan taidi yọwhé whẹndo tọn. (Luku 23:53; Joh. 19:41) Alọtútlú wẹ Josẹfu dohia to whenue e dì oṣiọ Jesu tọn do yọdò he mẹ ewọ lọsu na wá yin dìdì do, bọ gbọnmọ dali dọdai lọ dọ Mẹsia na yin dìdì “to pọmẹ hẹ adọkunnọ lẹ” mọ hẹndi.—Isa. 53:5, 8, 9.

Owe Wẹndagbe tọn ẹnẹ lẹpo wẹ dohia dọ whenue Jesu yin didesọn pòtin ji, Josẹfu blá ẹ do alavọ dagbedagbe de mẹ bo tẹ́ ẹ do yọdò etọn titi mẹ. (Mat. 27:59-61; Malku 15:46, 47; Luku 23:53, 55; Joh. 19:38-40) Mẹdopo gee he yin nùdego tlọlọ dọ e gọalọna Josẹfu wẹ Nikodẹmi, yèdọ mẹhe hẹn nuwhẹ́nkun ṣiọdidi tọn lẹ wá. Na otẹn nukundeji mẹ wẹ dawe awe ehelẹ tin te wutu, e na vẹawu dọ yelọsu lẹ wẹ na ko sẹtẹnna oṣiọ Jesu tọn. E yọnbasi taun dọ devizọnwatọ lẹ wẹ yé na ko zọ́n azọ́n nado ze oṣiọ lọ bosọ dì i. Eyin etlẹ yinmọ, azọ́n he dawe awe ehelẹ wà ma yin onú vlẹkẹsẹ de. Mẹdepope he doalọ oṣiọ de go nọ lẹzun mawé to aṣa-liho na azán ṣinawe, bọ nudepope he go mẹlọ doalọ nọ lẹzun mawé ga. (Sọh. 19:11; Hag. 2:13) Ninọmẹ enẹ sọgan glọnalina yé nado biọ mẹmẹ to osẹ hùnwhẹ Juwayi tọn lọ tọn gblamẹ bọ nuwiwa hùnwhẹ lọ tọn lẹpo na gbọ yé go. (Sọh. 9:6) Podọ, tito ṣiọdidi Jesu tọn he Josẹfu basi sọgan zọ́n bọ azọ́nwatọgbẹ́ etọn lẹ na ṣàn ẹn kò. Mahopọnna enẹ, e wleawufo nado kẹalọyi kọdetọn he oṣiọ Jesu tọn dìdì to aliho he wleyẹyi mẹ po ede didohia to gbangba taidi devi Klisti tọn de po sọgan hẹnwa lẹ.

Gbọnvona owe Wẹndagbe tọn lẹ he dọho gando ṣiọdidi Jesu tọn go, Biblu masọ donù Josẹfu Alimate tọn go to fide ba. Enẹ fọ́n kanbiọ titengbe de dote: Nawẹ nulẹ wá yì do na ẹn? Nugbo lọ wẹ yindọ, mí ma yọnẹn! Ṣigba, po nuhe mí ko dọ kakajẹ din lẹ po, e yọnbasi taun dọ ewọ do ede hia to gbangba taidi Klistiani de. To popolẹpo mẹ, kakati yise po adọgbigbo etọn po ni depò to ojlẹ whlepọn po nuhahun sinsinyẹn po tọn mẹ, e sọ jideji dogọ wẹ. Ohia dagbe de wẹ enẹ yin.

Otàn ehe fọ́n kanbiọ de dote he mímẹpo na wà dagbe nado kanse míde: Be nudepope tin—vlavo ogántẹn, agbasazọ́n, nutindo lẹ, owanyi he mí tindo na whẹndo mítọn kavi etlẹ yin mẹdekannujẹ mítọn—he yin nujọnu na mí hugan haṣinṣan mítọn hẹ Jehovah ya?