1. Nuhahun tẹlẹ wẹ mí nọ pehẹ, podọ naegbọn homẹ Jehovah tọn do nọ hùn do devizọnwatọ nugbonọ etọn lẹ go? (Pọ́n yẹdide he tin to bẹjẹeji hosọ ehe tọn lẹ.)

DILE hiẹ lọsu yọnẹn do, gbẹninọ to titonu ehe mẹ gọ́ na tukla taun. Susu mìwu mẹmẹsunnu po mẹmẹyọnnu mítọn lẹ po tọn wẹ to pipehẹ awutu sinsinyẹn lẹ. Mẹdelẹ to mì mẹ ko tindo mẹhowhe, ṣogan bosọ to nukunpedo hẹnnumẹ mẹhomẹ yetọn lẹ go. Mẹdevo lẹ to kanván, e ma yin nado tindo onú akuẹgegenu tọn lẹ gba, ṣigba nado mọ dandannu gbẹ̀mẹ tọn lẹ poun na whẹndo yetọn. Podọ, mí yọnẹn dọ susu mìtọn wẹ to pipehẹ e ma yin dopo poun to nuhahun mọnkọtọn lẹ mẹ gba, ṣigba popolẹpo to ojlẹ dopolọ mẹ! Ehe nọ biọ whenu susu yiyizan bosọ nọ dán mẹ taun to numọtolanmẹ-liho, gbọnvona akuẹzinzan susugege he e nọ biọ. Etomọṣo, mì gbẹ́ hẹn jidide mìtọn to opagbe Jiwheyẹwhe tọn lẹ mẹ go gligli; podọ yise mìtọn to sọgodo dagbe de mẹ ma whàngo. Lehe homẹ Jehovah tọn nọ hùn do mì go do sọ!

2. Tuli tẹwẹ mí sọgan mọyi sọn Isaia 40:29 mẹ, ṣigba nuṣiwa sinsinyẹn tẹ mẹ wẹ mí sọgan jai jẹ?

² Ṣigba, be a nọ mọ to whedelẹnu dọ nuhahun gbẹ̀mẹ tọn lẹ húagbọ́ we wẹ ya? Eyin mọ wẹ, yọnẹn dọ e ma yin hiẹ kẹdẹ wẹ e  to mọ na. Biblu dohia dọ devizọnwatọ nugbonọ hohowhenu tọn lẹ lọsu mọ to whedelẹnu dọ e na pọnte dọ emi ni gbọ bo hònúpla. (1 Ahọ. 19:4; Jobu 7:7) Ṣigba, kakati nado jogbe, yé nọ lẹhlan Jehovah nado mọ huhlọn yí. Podọ e ma wá vẹna yé, na Jiwheyẹwhe mítọn “nọ na huhlọn mẹhe nuṣikọna” lẹ wutu. (Isa. 40:29) E blawu dọ delẹ to omẹ Jiwheyẹwhe tọn lẹ mẹ to egbehe ko wá tadona kọ̀n dọ aliho dagbe hugan nado duto nuhahun gbẹ̀mẹ tọn lẹ ji wẹ nado jo nugbo lọ do whẹ́ bo yì gbọjẹ, taidi dọ nuwiwa Klistiani tọn lẹ yin agbàn pinpẹn de wẹ nkọ kakati ni yin dona de. Enẹwutu, yé nọ doalọtena Ohó Jiwheyẹwhe tọn hihia, opli agun tọn lẹ yìyì po tintọ́n na lizọnyizọn lọ po—dile Satani jlo dọ yé ni wà do pẹẹ.

3. (a) Nawẹ mí sọgan glọnalina lẹndai Satani tọn nado hẹn mí gbọjọ gbọn? (b) Etẹ ji wẹ mí na dọhodo to hosọ ehe mẹ?

³ Lẹgba yọnẹn ganji dọ mahẹ gigọ́ tintindo to nuwiwa Klistiani tọn lẹ mẹ sọgan na mí huhlọn, ṣigba ewọ ma jlo dọ mí ni yin huhlọnnọ. Eyin a mọdọ agbọ́pe emi pete to agbasa-liho podọ to numọtolanmẹ-liho, a sánkanna haṣinṣan towe hẹ Jehovah blo. Dọnsẹpọ ẹ dogọ, na ‘ewọ na hẹn we lodo, e na hẹn we yin huhlọnnọ.’ (1 Pita 5:10; Jak. 4:8) To hosọ ehe mẹ, mí na gbadopọnna ninọmẹ awe delẹ he sọgan zọ́n bọ mí na dekanpona sinsẹ̀nzọn mítọn hlan Jiwheyẹwhe, gọna lehe nunọwhinnusẹ́n Biblu tọn lẹ yíyí-do-yizan mẹ sọgan gọalọna mí nado pehẹ yé do. Ṣigba jẹnukọn whẹ́, mì gbọ mí ni dọhodo nugopipe Jehovah tọn nado na mí huhlọn ji, dile e yin didohia to Isaia 40:26-31 mẹ do.

4. Etẹwẹ mí sọgan plọn sọn Isaia 40:26 mẹ?

⁴ Hia Isaia 40:26. Mẹdepope ma ko penugo nado hia sunwhlẹvu he to wẹkẹ lọ mẹ lẹ. Lẹnunnuyọnẹntọ lẹ lẹndọ bẹplidopọ sunwhlẹvu lẹ tọn mítọn Voie lactée kẹdẹ sọgan bẹ nudi sunwhlẹvu liva 400 hẹn. Etomọṣo, Jehovah na yinkọ dopodopo sunwhlẹvu ehelẹ tọn. Etẹwẹ ehe plọn mí? Eyin Jehovah nọ tindo ojlo to nudida etọn he ma tindo gbọfufu lẹ mẹ, lẹnnupọndo nuhe e na nọ lẹn gando hiẹ he to sinsẹ̀n ẹn go ji, e ma yin na a nọ wàmọ taidi maṣinu de wutu wẹ gba, ṣigba na a yiwanna ẹn wutu! (Salm. 19:1, 3, 14) Otọ́ yiwanna mítọn yọ́n we to gigọ́ mẹ. “Etlẹ yin oda he to ota na mì lẹpo wẹ ko yin hihia.” (Mat. 10:30) Podọ salmu-kantọ lọ hẹn mí deji dọ, “Jehovah yọ́n nuhe mẹ madoblọnọ lẹ to jujugbọn.” (Salm. 37:18) Mọwẹ, ewọ nọ doayi nuhahun he pehẹ a te lẹ go, podọ e sọgan na we huhlọn nado doakọnna dopodopo yetọn.

5. Etẹwẹ sọgan hẹn mí kudeji dọ Jehovah penugo nado na mí huhlọn?

⁵ Hia Isaia 40:28. Jehovah wẹ yin Asisa huhlọn he gbloada hugan lọ tọn. Di apajlẹ, lẹnnupọndo huhlọn daho he ewọ na owhè kẹdẹ ji. David Bodanis he nọ kanwe gando lẹnunnuyọnẹn go dọmọ: “Huhlọn he owhè nọ detọ́n to nukunwhiwhe dopodopo mẹ sọzẹn hẹ huhlọn he bọmbu liva susu sọgan detọ́n dopọ ji.” Dodinnanutọ devo dohia dọ “huhlọn he [owhè] nọ detọ́n . . . to nukunwhiwhe dopo mẹ sọgan pé nado na hinhọ́n gbẹtọvi lẹ na owhe 200 000”! Be mẹdepope sọgan tindo ayihaawe dọ Mẹlọ he na huhlọn owhè penugo nado na mílọsu huhlọn nado duto nuhahun wunmẹ depope ji ya?

6. Naegbọn mí sọgan dọ dọ zẹgẹ Jesu tọn bọawu, podọ nawẹ ehe yinyọnẹn dona nọ yinuwado mí ji gbọn?

⁶ Hia Isaia 40:29. Jehovah sinsẹ̀n nọ hẹn ayajẹ susu wá. Jesu dọna devi etọn lẹ dọmọ: “Mì yí zẹgẹ ṣie do okọ̀ mìtọn.” Podọ e yidogọ dọmọ: “Mìwlẹ nasọ mọ kọfanamẹ na mìde. Na zẹgẹ ṣie bọawu bọ agbàn ṣie sọ fua.” (Mat. 11:28-30) Nugbo taun wẹ e dọ! To whedelẹnu, mí sọgan nọ mọdọ agbọ́ ko pé mí gbau nado yì opli agun tọn lẹ kavi nado tọ́n na lizọnyizọn lọ. Ṣigba, numọtolanmẹ tẹwẹ mí nọ tindo to whenue mí lẹkọ? Mí nọ  mọ kọfanamẹ yí—bo nọ wleawufo nado pehẹ whlepọn gbẹ̀mẹ tọn lẹ. Na nugbo tọn, zẹgẹ Jesu tọn bọawu!

7. Dọ numimọ de he do nugbo-yinyin Matiu 11:28-30 tọn hia.

⁷ Mẹmẹyọnnu de he mí na ylọdọ Kayla diahi hẹ agbọ́pemẹ zẹjlẹgo, flumẹjijẹ, podọ ota nọ dù i sinsinyẹn. Enẹwutu, e nọ vẹawuna ẹn to whedelẹnu nado yì opli agun tọn lẹ. Ṣigba, to whenue e dovivẹnu nado wá dotoaina hodidọ na mẹlẹpo de godo, e dọmọ: “Hosọ lọ dọhodo flumẹjijẹ ji. Hodidọ lọ yin zizedonukọnnamẹ to aliho he do awuvẹmẹ po mẹtọnhopọn po hia mẹ sọmọ bọ dasin wayi do mi. Hodidọ ehe vọ́ nuflin mi dọ n’ma dona nọ gọ̀n opli lẹ.” Lehe homẹ etọn hùn do sọ dọ e dovivẹnu bo yì opli enẹ!

8, 9. Etẹ na dọ wẹ apọsteli Paulu te to whenue e wlan dọmọ: “To whenue yẹn yin madogánnọ, whenẹnu wẹ yẹn yin huhlọnnọ”?

⁸ Hia Isaia 40:30. Mahopọnna nugopipe depope he mí tindo, nuhe mí sọgan wà po huhlọn mítọn titi po lẹ tindo dogbó. Nuplọnmẹ de niyẹn he mímẹpo dona hẹn do ayiha mẹ. Dile etlẹ yindọ apọsteli Paulu yin sunnu nugopetọ de, e tindo dogbó lẹ he nọ glọnalina ẹn nado wà nuhe e jlo lẹpo. To whenue Paulu dọ ahunmẹdunamẹnu etọn lẹ na Jiwheyẹwhe, ewọ dọna Paulu dọmọ: “Huhlọn ṣie to yinyin hinhẹn zun pipé to madogán towe mẹ.” Paulu mọnukunnujẹ nuagokun lọ mẹ. E wá tadona kọ̀n dọmọ: “To whenue yẹn yin madogánnọ, whenẹnu wẹ yẹn yin huhlọnnọ.” (2 Kọl. 12:7-10) Etẹ na dọ wẹ Paulu te taun?

⁹ Paulu mọnukunnujẹemẹ dọ nususu tin he emi ma sọgan wà eyin alọgọ mẹhe yin asisa huhlọn daho hugan lọ tọn dẹ́n. Gbigbọ wiwe Jiwheyẹwhe tọn sọgan na Paulu huhlọn he sin nuhudo e tindo. Podọ gbọnvona enẹ, gbigbọ wiwe Jiwheyẹwhe tọn sọgan na huhlọn Paulu nado wà azọ́n he e ma na ko penugo gbede nado wà po huhlọn edetiti tọn po lẹ. Mọ wẹ e te na mílọsu. Na nugbo tọn, mí na lodo taun eyin huhlọn mítọn nọ wá sọn Jehovah dè!

10. Nawẹ Jehovah gọalọna Davidi nado duto nuhahun he e pehẹ lẹ ji gbọn?

¹⁰ Salmu-kantọ Davidi duvivi huhlọn he gbigbọ wiwe Jiwheyẹwhe tọn nọ namẹ tọn whlasusu. E jihàn dọmọ: “Po alọgọ towe po wẹ yẹn sọgan fọ́n do ogbẹ́ jaguda lẹ tọn ji; po huhlọn Jiwheyẹwhe tọn po wẹ yẹn sọgan lọ́n dasá adó.” (Salm. 18:29) Adó delẹ tin—yèdọ nuhahun delẹ—ehe mí ma sọgan “lọ́n dasá” po huhlọn mídetiti tọn po; mí tindo nuhudo alọgọ Jehovah tọn.

11. Basi zẹẹmẹ lehe gbigbọ wiwe nọ gọalọna mí nado pehẹ nuhahun mítọn lẹ do tọn.

¹¹ Hia Isaia 40:31. Akùn ma sọgan zlọn yì fidindẹn po huhlọn edetiti tọn kẹdẹ po. Jẹhọn he gblọ wẹ nọ na akùn huhlọn he sin nuhudo e tindo nado to zinzlọn matin nuṣikọ. Enẹwutu, eyin azọ́ndenamẹ sinsinyẹn de yin zizedo alọ mẹ na we, nọ flin apajlẹ akùn tọn. Biọ Jehovah nado na we huhlọn gbọn “alọgọtọ lọ, yèdọ gbigbọ wiwe” etọn gblamẹ. (Joh. 14:26) Ayajẹnu wẹ e yin dọ mí sọgan mọ ẹn yí to whedepopenu he mí tindo nuhudo etọn to azán de ji—yèdọ to gànhiho depope mẹ. Humọ, mí sọgan sọ tindo nuhudo alọgọ Jiwheyẹwhe tọn to whenue gbemanọpọ de fọ́n to míwlẹ po hagbẹ agun tọn de po ṣẹnṣẹn. Ṣigba, etẹwẹ nọ hẹn gbemanọpọ mọnkọtọn lẹ wá?

12, 13. (a) Naegbọn gbemanọpọ nọ fọndote to Klistiani lẹ ṣẹnṣẹn? (b) Etẹwẹ otàn Josẹfu tọn plọn mí gando Jehovah go?

¹² Gbemanọpọ lẹ nọ fọ́n to gbẹtọ lẹ ṣẹnṣẹn na mímẹpo wẹ yin mapenọ wutu. Enẹwutu, e sọgan wá jọ bọ ohó kavi nuyiwa yisenọ hatọ lẹ tọn na hẹn homẹgble mí—kavi bọ ohó kavi nuyiwa mílọsu lẹ tọn na hẹn homẹgble yé. Ehe sọgan yin whlepọn sinsinyẹn de. Dile e nọ yindo na whlepọn devo lẹ, Jehovah nọ na mí dotẹnmẹ nado do tenọgligo-hinhẹn mítọn hia gbọn pinplọn nado wazọ́n dopọ hẹ mẹmẹsunnu po mẹmẹyọnnu po he ewọ yiwanna mahopọnna awugbopo yetọn lẹ dali.

¹³ Otàn Josẹfu tọn dohia dọ Jehovah ma  nọ glọnalina whlepọn lẹ nado wá devizọnwatọ etọn lẹ ji. To whenue Josẹfu gbẹ́ yin jọja, nọvisunnu-daa etọn lẹ sà ẹ do kanlinmọgbenu na awuwhàn yetọn wutu bọ e yin zize sọyi Egipti. (Jen. 37:28) Jehovah mọ nuhe to jijọ podọ ayihaawe ma tin dọ aliho he mẹ họntọn etọn, yèdọ dawe dodonọ lọ Josẹfu yin nuyiwa hẹ te biọlanmẹna ẹn. Etomọṣo, ewọ ma dádo whẹho lọ mẹ. To nukọn mẹ, whenue yè sawhẹdokọna Josẹfu dọ e tẹnpọn nado zanhẹ asi Pọtifali tọn gánnugánnu bọ e yin zizedo gànmẹ, Jehovah masọ dademẹ. Ṣigba, Jiwheyẹwhe ma wọnji Josẹfu go pọ́n gbede. Kakatimọ, “Jehovah nọ hẹn nuhe wà [Josẹfu] te lẹpo tindo kọdetọn dagbe.”—Jen. 39:21-23.

14. Ale tẹlẹ wẹ homẹgble ‘jijodo’ sọgan hẹnwa na mí to gbigbọ-liho podọ to agbasa-liho?

¹⁴ Apajlẹ devo die. Mẹhe yin nuyiwa hẹ to aliho agọ̀ mẹ taidi Davidi lẹ ma sù. Etomọṣo, họntọn Jiwheyẹwhe tọn enẹ ma na dotẹnmẹ mẹhẹndohomẹ nado hò ayajẹ etọn yí. Kakatimọ, e wlan dọmọ: “Jo homẹgble do bo gbẹ́ adidudu dai; a jẹflumẹ bo lẹhlan ylanwiwa kọ̀n blo.” (Salm. 37:8) Whẹwhinwhẹ́n titengbe he wutu mí dona ‘jo homẹgble do’ wẹ nado hodo apajlẹ Jehovah tọn, yèdọ mẹhe “ma yinuwa hẹ mí sọgbe hẹ ylando mítọn lẹ.” (Salm. 103:10) Ṣigba, homẹgble ‘jijodo’ sọ nọ wà dagbe susu devo lẹ na mí ga. Homẹgble sọgan zọ́n bọ ohùn mítọn na nọ fiẹ (hypertension) podọ agbọ́ na nọ whèdo mí. E sọ sọgan zọ́n bọ mí na bẹ otù-zọ̀n, pancréas-zọ̀n, podọ nuhe mí dù lẹ ma na nọ yin lìlì ganji to ohò mítọn mẹ. Eyin mí gblehomẹ, mí ma nọ saba lẹnnupọn ganji ba. Podọ to whedelẹnu, nuyiwa homẹgble tọn de sọgan dekọtọn do flumẹjijẹ sinsinyẹn mẹ na ojlẹ dindẹn. To alọ devo mẹ, Biblu dọmọ: “Ahun he whesọ nọ nagbẹ̀ agbasa.” (Howh. 14:30) Ṣigba, nawẹ mí sọgan duto numọtolanmẹ awugble tọn ji bo duale mẹmẹsunnu mítọn tọn gbọn? Mí sọgan wàmọ po kọdetọn dagbe po gbọn ayinamẹ nuyọnẹn tọn Biblu tọn lẹ yíyí-do-yizan mẹ dali.

15, 16. Nawẹ mí sọgan dọhodopọ hẹ mẹhe ṣinuwa do mí de gbọn?

¹⁵ Hia Efesunu lẹ 4:26. E ma yin nupaṣamẹ de na mí dọ mí dona doakọnna nuyiwahẹmẹ agọ̀ sọn mẹhe to aihọn lọ mẹ lẹ dè. Ṣigba, to whenue yisenọ hatọ de kavi hagbẹ whẹndo tọn de dọ kavi wà nude he gbleawuna mí sinsinyẹn, enẹ sọgan hẹn mí jẹflumẹ taun. Mí ni dọ dọ e vẹawuna mí nado wọnji nujijọ lọ go poun. Be mí na na dotẹnmẹ homẹgble lọ nado gbọṣi aimẹ na owhe lẹ wẹ ya? Kavi mí na hodo ayinamẹ nuyọnẹn tọn Biblu tọn lẹ nado yawu didẹ whẹho lọ? Dile mí na jo whẹho lọ do aimẹ dẹnsọ, mọ wẹ e na to awuvẹ na mí dogọ nado gbọwhẹ hẹ mẹmẹsunnu mítọn do niyẹn.

¹⁶ Mí ni dọ dọ mẹmẹsunnu de ṣinuwa do we  bọ e vẹawuna we nado wọnji e go. Afọdide dagbe tẹlẹ wẹ a sọgan ze nado dín jijọho? Jẹnukọn whẹ́, hodẹ̀ vẹkuvẹku hlan Jehovah. Biọ ẹ dọ ni gọalọna we nado tindo hodọdopọ mẹjlọdote tọn de hẹ mẹmẹsunnu towe. Flindọ, họntọn Jehovah tọn de wẹ ewọ lọsu yin. (Salm. 25:14) Jiwheyẹwhe yiwanna ẹn. Jehovah nọ yinuwa hẹ họntọn etọn lẹ po homẹdagbe po, podọ nudopolọ wẹ e nọ donukun to mílọsu si. (Howh. 15:23; Mat. 7:12; Kol. 4:6) Enẹgodo, lẹnayihamẹpọn do nuhe a na dọna ẹn ji. Ma lẹndọ mẹmẹsunnu towe desọn ojlo mẹ nado gbleawuna we blo; ma dawhẹna ẹn blo. Podọ kẹalọyi dọ emi lọsu sọgan ko wà nude he hẹn gbemanọpọ lọ wá. A sọgan bẹ hodọdopọ lọ jẹeji dole, “Vlavo yẹn wẹ yawu gblehomẹ, amọ́ whenue a dọho hẹ mi to osọ, n’mọdọ . . .” Eyin hodọdopọ lọ ma yì do lehe a na ko jlo do, dín dotẹnmẹ hundote devo nado didẹ whẹho lọ. Todin whẹ́, hodẹ̀ na mẹmẹsunnu towe; biọ dọ Jehovah ni dona ẹn. Biọ dọ Jiwheyẹwhe ni gọalọna we nado ze ayidonugo do jẹhẹnu dagbe mẹmẹsunnu towe tọn lẹ ji. Depope he kọdetọn lọ na yin, a sọgan kudeji dọ homẹ Jehovah tọn na hùn dọ a dovivẹnu ahundopo tọn nado duale mẹmẹsunnu towe tọn—yèdọ họntọn Jiwheyẹwhe tọn de.

17. Awuwledainanu tẹwẹ Jehovah sọgan yizan nado gọalọna mí nado gọ̀ jẹgangan to whenue mí waylando de, podọ naegbọn mí dona nọ yí awuwledainanu ehe zan ganji?

¹⁷ Mẹdelẹ nọ mọdọ emi masọ jẹ nado sẹ̀n Jehovah ba, na yé ko jai jẹ ylando sinsinyẹn de mẹ wayi wutu. Numọtolanmẹ whẹhuhu tọn sọgan taidi agbàn pinpẹn de. Ahọlu Davidi, he diahi hẹ numọtolanmẹ mọnkọtọn dọmọ: “Whenue yẹn nabọẹ, ohú ṣie lẹ lẹzun madogánnọ, na hunwinwẹn mapote to azán lọ pete ji wutu. Na alọ towe nọ pẹ̀n do ji e to okle po ozán po.” Ayajẹnu wẹ e yin nado mọdọ Davidi duto nuhahun lọ ji taidi sunnu gbigbọnọ de. E wlan dọmọ: “To godo mẹ, yẹn yigbe ylando ṣie tọn na we; . . . Hiẹ sọ jo nuṣiwa po ylando ṣie lẹ po na mi.” (Salm. 32:3-5) Eyin a ko waylando sinsinyẹn de, Jehovah to gbesisọ mẹ nado gọalọna we nado gọ̀ jẹgangan. Amọ́, a dona kẹalọyi alọgọ he ewọ nọ wleawuna gbọn agun lọ gblamẹ. (Howh. 24:16; Jak. 5:13-15) A dọngbàn blo—sọgodo madopodo towe wẹ to owù mẹ! Ṣigba, etẹwẹ lo, eyin ayihadawhẹnamẹnu towe gbẹ́ nọ dotukla we gando nuṣiwa towe hoho he ko yin jijona sọn ojlẹ dindẹn die lẹ go?

18. Nawẹ apajlẹ Paulu tọn sọgan gọalọna mẹhe to ahidi hẹ numọtolanmẹ nuvọ́nọ-yinyin tọn lẹ gbọn?

¹⁸ E họnwun dọ nuṣiwa hoho apọsteli Paulu tọn delẹ hẹn ẹn jẹflumẹ to ojlẹ delẹ mẹ. E yigbe dọmọ: “Na yẹn wẹ yin pẹvi pete to apọsteli lẹ mẹ, podọ yẹn ma jẹ nado yin yiylọdọ apọsteli de, na yẹn dohomẹkẹn agun Jiwheyẹwhe tọn wutu.” Etomọṣo, Paulu yidogọ dọmọ: “Ṣigba, gbọn nukundagbe majẹhẹ Jiwheyẹwhe tọn dali wẹ yẹn do yin nuhe yẹn yin.” (1 Kọl. 15:9, 10) Jehovah kẹalọyi Paulu mahopọnna nuṣiwa etọn hoho lẹ, podọ E jlo dọ Paulu lọsu ni mọnukunnujẹ enẹ mẹ gando ede go. Eyin a lẹnvọjọ nugbonugbo sọn ylando towe hoho lẹ mẹ, bo yigbe yetọn mlẹnmlẹn, a sọgan kudeji dọ Jehovah na do lẹblanu hia we. Enẹwutu, yí nuhe Jehovah dọ sè bo kẹalọyi jonamẹ etọn!—Isa. 55:6, 7.

19. Etẹwẹ yin hosọ owhe tọn 2018 tọn, podọ naegbọn ehe do sọgbe?

¹⁹ Dile vivọnu titonu ehe tọn to dindọnsẹpọ, mí sọgan donukun dọ nuhahun lẹ na to sinsinyẹn deji dogọ. Ṣigba, deji dọ Mẹhe “nọ na huhlọn mẹhe nuṣikọna bo nọ na nugopipe mẹhe ma tindo huhlọn lẹ” sọgan na we nudepope he sin hudo a tindo nado doakọnnanu. (Isa. 40:29; Salm. 55:22; 68:19) To owhe 2018 gblamẹ, mí na nọ flin nugbo titengbe ehe to whedepopenu he mí yì opli de to Plitẹnhọ Ahọluduta tọn mẹ. Nugbo enẹ wẹ hosọ owhe tọn mítọn bẹhẹn, he domọ: “Mẹhe ze todido yetọn do Jehovah mẹ lẹ na vọ́ huhlọn mọyi.”—Isa. 40:31.