1, 2. Nujijọ tẹwẹ na kọnmẹdopọ hugan to owhe 2018 tọn mẹ, podọ etẹwutu? (Pọ́n yẹdide he tin to bẹjẹeji hosọ ehe tọn.)

TO 31 mars 2018, dile owhè na jẹ họyì ji, omẹ Jiwheyẹwhe tọn lẹ to pọmẹ hẹ jlodotọ susu na pli dopọ nado basi hùnwhẹ Tenu-Núdùdù Oklunọ tọn he nọ yin bibasi to whemẹwhemẹ. Dile owhè na to họyì sọn awà aigba lọ tọn de ji jẹ devo ji, gbẹtọ livi susu lẹ na pli nado basi hùnwhẹ Oflin okú Klisti tọn. To whemẹwhemẹ, hùnwhẹ ehe wẹ nọ kọnmẹdopọ to aliho he jiawu mẹ hugan nujijọ devo depope lẹdo aihọn pé!

² Mí sọgan yí nukun homẹ tọn do pọ́n lehe Jehovah po Jesu po na jaya do sọ, dile yé mọ bọ gbẹtọ livi susu lẹ to aigba lọ blebu ji na to hùnwhẹ titengbe ehe tẹnmẹ wá sọn gànhiho de mẹ jẹ devo mẹ kakajẹ vivọnu azán lọ tọn. Biblu dọ dọdai dọ, “gbẹtọ susugege de, he mẹdepope ma [na] penugo nado hia, sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ podọ sọn ogbè lẹpo mẹ” na dawhá dọmọ: “Jiwheyẹwhe mítọn he sinai to ofìn lọ ji po Lẹngbọvu lọ po dè wẹ whlẹngán mítọn wá sọn.” (Osọ. 7:9, 10) Lehe e yin homẹhunnu  dọ hùnwhẹ Oflin tọn he nọ yin bibasi to whemẹwhemẹ ehe nọ gbògbéna Jehovah po Jesu po do sọ!

3. Kanbiọ tẹlẹ wẹ na mọ gblọndo to hosọ ehe mẹ?

³ Hosọ ehe na na gblọndo kanbiọ he fọndote delẹ tọn. (1) Nawẹ dopodopo mítọn sọgan wleawudaina hùnwhẹ Oflin tọn lọ bosọ mọaleyi sọn e mẹ gbọn? (2) Aliho tẹlẹ mẹ wẹ hùnwhẹ Oflin tọn lọ nọ yinuwado pọninọ omẹ Jiwheyẹwhe tọn lẹ tọn ji te? (3) Nawẹ dopodopo mítọn sọgan yidogọna pọninọ enẹ gbọn? (4) Be hùnwhẹ Oflin tọn de na wá tin he na yin godo tọn ya? Eyin mọ wẹ, whetẹnu wẹ?

4. Naegbọn e do yin nujọnu dọ mí ni wà nuhe go mí pé lẹpo nado nọ tin to hùnwhẹ Oflin tọn lọ tẹnmẹ?

⁴ Lẹnnupọndo nuhewutu e do yin nujọnu nado nọ yì hùnwhẹ Oflin tọn ji. Flindọ opli agun tọn lẹ yin apadewhe sinsẹ̀n-bibasi mítọn tọn. Matin ayihaawe, Jehovah po Jesu po nọ doayi mẹhe nọ dovivẹnu nado yì opli titengbe hugan owhe lọ tọn enẹ tẹnmẹ lẹ go. Na nugbo tọn, mí jlo dọ yé ni nọ mọ mí to Oflin lọ tẹnmẹ, adavo awutu sinsinyẹn kavi ninọmẹ ylankan de glọnalina mí. Eyin nuyiwa mítọn lẹ nọ dohia dọ opli sinsẹ̀n-bibasi tọn lẹ yin nujọnu na mí, Jehovah na tindo whẹwhinwhẹ́n devo lẹ dogọ nado hẹn yinkọ mítọn do “owe oflin tọn”—yèdọ “owe ogbẹ̀ tọn lọ” mẹ—ehe mẹ yinkọ mẹhe tin to hukan ji nado mọ ogbẹ̀ madopodo lẹ tọn yin kinkando.—Mal. 3:16; Osọ. 20:15.

5. To azán he jẹnukọnna hùnwhẹ Oflin tọn lẹ gblamẹ, nawẹ mí sọgan ‘tẹ́n míde pọ́n eyin mí to yise mẹ’ gbọn?

⁵ To azán he jẹnukọnna hùnwhẹ Oflin tọn lọ lẹ gblamẹ, mí sọgan de whenu dovo nado hodẹ̀ bo yí sọwhiwhe do gbadopọnna haṣinṣan mẹdetiti tọn mítọn hẹ Jehovah. (Hia 2 Kọlintinu lẹ 13:5.) Nawẹ mí sọgan wàmọ gbọn? Enẹ wẹ nado nọ ‘tẹ́n míde pọ́n eyin mí to yise mẹ.’ Nado wàmọ, e na yọ́n nado nọ kanse míde dọ, ‘Be n’kudeji nugbonugbo dọ titobasinanu dopo gee he Jehovah kẹalọyi nado hẹn ojlo etọn di lọ mẹ wẹ n’tin te ya? Be n’to nuhe go n’pé lẹpo wà nado dọyẹwheho bosọ plọnnumẹ gando wẹndagbe Ahọluduta lọ tọn go ya? Be nuyiwa ṣie lẹ nọ dohia dọ n’kudeji nugbonugbo dọ azán godo tọn lẹ mẹ wẹ mí te, podọ opodo gandudu Satani tọn ko sẹpọ ya? Be jidide he n’tindo to Jehovah po Jesu po mẹ to whenue n’klan gbẹzan ṣie do wiwe na Jehovah Jiwheyẹwhe ko diọ wẹ ya?’ (Mat. 24:14; 2 Tim. 3:1; Heb. 3:14) Nulinlẹnpọn do gblọndo kanbiọ enẹlẹ tọn ji na gọalọna mí nado to dodinna míde zọnmii nado yọ́n mẹhe nkọ mí yin.

6. (a) Etẹwẹ yin aliho dopo gee lọ he nọ namẹ ogbẹ̀? (b) Nawẹ mẹho agun tọn de nọ wleawudaina hùnwhẹ Oflin tọn lọ to whemẹwhemẹ gbọn, podọ nawẹ hiẹ lọsu sọgan wà nudopolọ gbọn?

⁶ Nọ hia bo nọ lẹnayihamẹpọn do hosọ sinai do Owe-wiwe ji he dọhodo nujọnu-yinyin hùnwhẹ Oflin tọn ji lẹ ji. (Hia Johanu 3:16; 17:3.) Aliho dopo gee lọ nado mọ ogbẹ̀ madopodo wẹ nado “wá yọ́n” Jehovah, podọ nado “do yise hia” to Jesu mẹ, yèdọ Visunnu detọ́n dopo akàn Etọn. Nado wleawudaina Oflin lọ, naegbọn hiẹ ma na basi tito nupinplọn tọn delẹ he na gọalọna we nado dọnsẹpọ Jehovah po Jesu po dogọ? Lẹnnupọndo nuhe mẹho agun tọn ojlẹ dindẹn tọn de nọ wà ji. To owhe lẹ gblamẹ, e ko bẹ hosọ Atọ̀họ̀-Nuhihọ́ lọ Tọn lẹ pli, titengbe dehe dọhodo hùnwhẹ Oflin tọn gọna owanyi he Jehovah po Jesu po dohia mí ji lẹ. To osẹ he jẹnukọnna Oflin lọ lẹ gblamẹ, e nọ vọ́ hosọ ehelẹ hia bo nọ lẹnayihamẹpọn do nujọnu-yinyin hùnwhẹ ehe bibasi tọn ji. Sọn ojlẹ de mẹ jẹ devo mẹ, e nọ yí hosọ yọyọ dopo kavi awe dogọ dehe e ko bẹpli lẹ. Mẹho agun tọn ehe doayi e go dọ hosọ enẹlẹ vivọ́ hia, gọna dogbigbapọnna Biblu hihia ojlẹ Oflin tọn po ayihamẹlinlẹnpọn deji po zọ́n bọ emi nọ mọ onú yọyọ lẹ plọn to whemẹwhemẹ. Hú popolẹpo, e nọ mọdọ owanyi emitọn na Jehovah po Jesu po nọ siso dogọ to owhe dopodopo mẹ. Tito nupinplọn tọn  mọnkọtọn sọgan gọalọna we nado hẹn owanyi gọna pinpẹn-nutọn-yinyọnẹn towe na Jehovah po Jesu po siso dogọ, podọ ehe sọgan zọ́n bọ a na mọaleyi sọn hùnwhẹ Oflin tọn lọ mẹ to gigọ́ mẹ.

7. (a) Etẹ go wẹ Jesu hodẹ̀ gando to ozán he mẹ hùnwhẹ Tenu-Núdùdù Oklunọ tọn tintan yin bibasi te? (b) Etẹwẹ dohia dọ Jehovah na gblọndo odẹ̀ he Jesu hò tọn?

⁷ To ozán he mẹ hùnwhẹ Tenu-Núdùdù Oklunọ tọn tintan lọ yin bibasi te, Jesu biọ to odẹ̀ mẹ dọ hodotọ emitọn lẹpo ni tin to pọninọ mẹ, podọ yé ni duvivi pọninọ he ewọ po Otọ́ etọn po tindo tọn nkọ. (Hia Johanu 17:20, 21.) Na nugbo tọn, Jehovah na gblọndo odẹ̀ he Visunnu vivẹ́ etọn hò enẹ tọn, podọ todin gbẹtọ livi susu lẹ yise dọ Jehovah wẹ do Visunnu etọn hlan. To opli he Kunnudetọ Jehovah tọn lẹ nọ basi lẹpo mẹ, hùnwhẹ Oflin tọn lọ wẹ nọ dohia hugan dọ pọninọ tin to ṣẹnṣẹn mítọn. Gbẹtọ he wá sọn otò susu mẹ bo tindo sinmẹ agbasa tọn voovo lẹ nọ pli dopọ to nọtẹn opli tọn voovo lẹ lẹdo aihọn pé. To lẹdo delẹ mẹ, e nọ paṣa mẹlẹ dọ gbẹtọ he tindo sinmẹ agbasa tọn voovo ehelẹ nọ pli nado basi sinsẹ̀n, podọ mẹdevo lẹ ma nọ yí nukun nujọnu tọn do pọ́n opli mọnkọtọn. Ṣigba, lehe pọninọ enẹ nọ yọ́n taun to nukun Jehovah po Jesu po tọn mẹ do sọ!

8. Owẹ̀n tẹwẹ Jehovah do Ezekiẹli gando pọninọ go?

⁸ Taidi omẹ Jehovah tọn lẹ, pọninọ mítọn ma yin nupaṣamẹ de na mí. Na nugbo tọn, Jehovah ko dọ dọdai etọn. Lẹnnupọndo owẹ̀n he ewọ do yẹwhegán Ezekiẹli gando owhlẹ awe he yin kinkọndopọ lẹ go ji, yèdọ owhlẹ he tin “na Juda” podọ owhlẹ he tin “na Josẹfu.” (Hia Ezekiẹli 37:15-17.) “Kanbiọ lẹ sọn Wehiatọ lẹ Dè” he yin zinzinjẹgbonu to Atọ̀họ̀-Nuhihọ́ lọ Tọn juillet 2016 mẹ basi zẹẹmẹ dọmọ: “Jehovah dowẹn todido tọn de Ezekiẹli, he bẹ opagbe lọ hẹn dọ akọta Islaeli tọn na yin kinkọndopọ to whenue e na lẹkọwa Aigba Pagbe tọn lọ ji godo. Owẹ̀n enẹ sọ bẹ dọdai he gando kọndopọ omẹ Jiwheyẹwhe tọn lẹ tọn he bẹjẹeji to azán godo tọn lẹ mẹ go hẹn.”

9. Nawẹ hẹndi dọdai Ezekiẹli tọn nọ yin mimọ hezeheze to whemẹwhemẹ to hùnwhẹ Oflin tọn whenu gbọn?

⁹ Bẹsọn 1919 sọyi, nuhe Jehovah wà jẹnukọn wẹ nado vọ́ tito-basina mẹyiamisisadode lẹ bosọ vọ́ yé bẹpli vudevude, yèdọ mẹhe taidi owhlẹ he tin “na Juda” to yẹhiadonu-liho lẹ. Enẹgodo, dile mẹhe tindo todido aigba ji tọn lẹ to susudeji—yèdọ mẹhe taidi owhlẹ he tin “na Josẹfu” to yẹhiadonu-liho lẹ—bo to awukọndopọ hẹ mẹyiamisisadode lẹ, ogbẹ́ awe lọ lẹ wá lẹzun “lẹngbọpa dopo.” (Joh. 10:16; Zek. 8:23) Jehovah dopagbe dọ emi na ṣá owhlẹ awe ehelẹ dopọ bọ yé na lẹzun owhlẹ dopo to alọ emitọn mẹ. (Ezek. 37:19) Todin, ogbẹ́ awe lọ lẹ to sinsẹ̀n to pọmẹ to anademẹ Ahọlu dopo tọn glọ—yèdọ Jesu Klisti he yin gigopana lọ, mẹhe Jiwheyẹwhe ylọ to dọdai de mẹ dọ “devizọnwatọ [emitọn] Davidi.” (Ezek. 37:24, 25) Pọninọ họakuẹ he owe Ezekiẹli tọn basi zẹẹmẹ etọn lọ nọ yin mimọ hezeheze to whemẹwhemẹ to whenue pipotọ mẹyiamisisadode lẹ tọn po “lẹngbọ devo lẹ” po pli nado basi hùnwhẹ Oflin okú Klisti tọn! Ṣigba, etẹwẹ dopodopo mítọn sọgan wà nado yidogọna pọninọ enẹ bosọ basi hihọ́na ẹn?

10. Nawẹ mí sọgan yidogọna pọninọ he to omẹ Jiwheyẹwhe tọn lẹ ṣẹnṣẹn gbọn?

¹⁰ Aliho tintan he mẹ mí sọgan yidogọna pọninọ omẹ Jiwheyẹwhe tọn lẹ tọn te wẹ nado wleawuna whiwhẹ. To whenue Jesu tin to aigba ji, e na ayinamẹ devi etọn lẹ nado nọ ze yede whè. (Mat. 23:12) Eyin mí yin whiwhẹnọ to ahun mẹ, mí ma na joawuna gbigbọ mẹdezedaga tọn he gbayipe to aihọn lọ mẹ. Kakatimọ, whiwhẹ na gọalọna mí nado nọ litaina mẹhe to anadenanu lẹ, podọ gbigbọ tonusise tọn mọnkọtọn yin dandan na pọninọ nido tin  to agun mẹ. Hú popolẹpo, whiwhẹ mítọn na hẹn homẹ Jiwheyẹwhe tọn hùn, na ewọ “nọ diọnukunsọ saklanọ lẹ, ṣigba e nọ do nukundagbe majẹhẹ hia whiwhẹnọ lẹ.”—1 Pita 5:5.

11. Nawẹ nulinlẹnpọn do nuhe yẹhiadonu Oflin tọn lọ lẹ zẹẹmẹdo ji sọgan gọalọna mí nado yidogọna pọninọ gbọn?

¹¹ Aliho awetọ he mẹ mí sọgan yidogọna pọninọ te wẹ nado nọ lẹnayihamẹpọn do nuhe yẹhiadonu he nọ yin yiyizan to hùnwhẹ Oflin tọn whenu lẹ zẹẹmẹdo ji. Jẹnukọnna ozán titengbe enẹ—podọ na taun tọn to ozán lọ lọsu mẹ—yí sọwhiwhe do lẹnayihamẹpọn do nuhewutu akla madotọ́n lọ po ovẹn lọ po do yin nujọnu ji. (1 Kọl. 11:23-25) Akla lọ nọtena agbasa pipé Jesu tọn he e yí do sanvọ́, podọ ovẹn lọ nọtena ohùn etọn he e sọndai. Ṣigba, e biọ dọ mí ni mọnú zẹ̀ nuhe yẹhiadonu enẹlẹ zẹẹmẹdo to paa mẹ go. Flindọ, avọ́sinsan ofligọ Klisti tọn bẹ dohia owanyi tọn daho hugan awe lẹ hẹn—yèdọ owanyi he Jehovah dohia gbọn Visunnu etọn zizejo do ota mítọn mẹ dali, podọ dehe Jesu dohia to whenue e desọn ojlo mẹ nado ze ogbẹ̀ etọn jo do ota mítọn mẹ. Nulinlẹnpọn do owanyi yetọn ji dona whàn mílọsu nado yiwanna yé ga. Podọ owanyi he míwlẹ po sinsẹ̀n-basitọ hatọ mítọn lẹ po tindo na Jehovah tin taidi okàn he sìn mí dopọ bo nọ hẹn pọninọ mítọn lodo de.

12. To apajlẹ he Jesu na gando ahọlu he biọ lẹnjo lọ go mẹ, nawẹ ewọ dohia hezeheze dọ Jehovah nọ donukun dọ mí ni nọ jonamẹ gbọn?

¹² Aliho atọ̀ntọ he mẹ mí sọgan yidogọna pọninọ te wẹ nado nọ jona mẹdevo lẹ sọn ojlo mẹ wá. To whenue mí jona mẹhe ṣinuwa do mí lẹ, mí nọ dohia dọ mí yọ́n pinpẹn jona ylando mílọsu tọn lẹ tọn he avọ́sinsan ofligọ Klisti tọn hẹn yọnbasi. Lẹnnupọndo dopo to apajlẹ Jesu tọn lẹ mẹ ji he tin to Matiu 18:23-34 mẹ. Nọ kanse dewe dọ: ‘Be n’nọ yin whinwhàn nado yí nuhe Jesu plọnmẹ lẹ do yizan mẹ ya? Be n’nọ do homẹfa hia bosọ nọ mọnukunnujẹ sinsẹ̀n-basitọ hatọ ṣie lẹ mẹ ya? Be n’nọ wleawufo nado jona mẹhe ṣinuwa do mi lẹ ya?’ Na nugbo tọn, nuṣiwa delẹ nọ sinyẹn hú devo lẹ, podọ delẹ tin he e nọ vẹawu taun na gbẹtọvi mapenọ lẹ nado jona. Etomọṣo, apajlẹ Jesu tọn plọn mí nuhe Jehovah nọ donukun sọn mí si. (Hia Matiu 18:35.) Jesu hẹn ẹn họnwun dọ Jehovah ma na jona mí eyin mí ma nọ jona mẹmẹsunnu mítọn lẹ to whenue whẹwhinwhẹ́n dolido de tin nado wàmọ. Lehe linlẹn enẹ hẹnmẹ lẹnnupọn do sọ! Mí nọ basi hihọ́na pọninọ họakuẹ mítọn, eyin mí jona mẹdevo lẹ dile Jesu plọn mí do.

13. Nawẹ míde didohia taidi jijọho-dintọ nọ yidogọna pọninọ gbọn?

 ¹³ To whenue mí jona mẹdevo lẹ, mí nọ dohia dọ mí yin jijọho-dintọ. Flin ayinamẹ apọsteli Paulu tọn, dọ mí dona “nọ yí vivẹnudido vẹkuvẹku do hẹn dopo-yinyin gbigbọ tọn go to gẹdẹ pọninọ jijọho tọn mẹ.” (Efe. 4:3) To ojlẹ Oflin tọn mẹ, titengbe to ozán Oflin tọn lọ mẹ, lẹnnupọn sisosiso do nuyiwa towe hẹ mẹdevo lẹ ji. Kanse dewe dọ: ‘Be nuyiwa ṣie lẹ nọ dohia hezeheze dọ n’ma nọ dokẹ̀nmẹ ya? Be mẹlẹ yọ́n mi taidi mẹhe nọ dovivẹnu vẹkuvẹku nado yidogọna jijọho po pọninọ po ya?’ Kanbiọ titengbe delẹ niyẹn he ji mí dona lẹnayihamẹpọn do to ojlẹ owhe lọ tọn ehe mẹ.

14. Nawẹ mí gán dohia dọ mí nọ “sinyẹnlin hẹ ode awetọ to owanyi mẹ” gbọn?

¹⁴ Aliho ẹnẹtọ nado yidogọna pọninọ wẹ nado nọ do owanyi hia dile Jehovah, yèdọ Jiwheyẹwhe owanyi tọn lọ nọ wà do. (1 Joh. 4:8) Mí ma na jlo gbede nado dọ gando yisenọ hatọ mítọn lẹ go dọ, “Nugbo wẹ dọ n’dona yiwanna yé, amọ́ e ma yin dandan dọ mí ni vẹ́”! Pọndohlan enẹ na jẹagọdo ayinamẹ Paulu tọn dọ mí dona nọ “sinyẹnlin hẹ ode awetọ to owanyi mẹ.” (Efe. 4:2) Doayi e go dọ, e ma dọ dọ mí ni nọ “sinyẹnlin hẹ ode awetọ” poun gba. Ṣigba, e yidogọ dọ mí dona nọ wàmọ “to owanyi mẹ.” Vogbingbọn tin to linlẹn awe enẹlẹ ṣẹnṣẹn. To agun mítọn lẹ mẹ, mí nọ mọ gbẹtọ wunmẹ voovo he Jehovah dọ̀n wá ede dè lẹ. (Joh. 6:44) Eyin Jehovah dọ̀n yé wá ede dè, enẹ dohia dọ ewọ mọ yé di mẹhe yè sọgan yiwanna. To whelọnu lo, mẹnu to mí mẹ wẹ sọgan dọ dọ sinsẹ̀n-basitọ hatọ de ma jẹna owanyi emitọn? Mí ma dona nọ dike nudepope ni glọnalina mí nado nọ yiwannamẹ dile Jehovah degbena mí nado wà do!—1 Joh. 4:20, 21.

15. Nawẹ mí wagbọn do yọnẹn dọ hùnwhẹ Oflin tọn godo tọn de na tin?

¹⁵ To gbèdopo, hùnwhẹ Oflin tọn de na yin bibasi he na yin godo tọn. Nawẹ mí wagbọn do yọnẹn? To wekanhlanmẹ gbọdo tintan Paulu tọn hlan Kọlintinu lẹ mẹ, e dọna Klistiani yiamisisadode lẹ dọ gbọn hùnwhẹ Oflin okú Jesu tọn bibasi to whemẹwhemẹ dali, yé nọ “to okú Oklunọ tọn lá kaka e nado wá.” (1 Kọl. 11:26) Hogbe lọ “wá” to alọdlẹndo nujijọ dopolọ he go Jesu donù to dọdai he gando ojlẹ opodo tọn lọ go mẹ, ehe mẹ e dọ te dọ emi “ja.” E dọ gando nukunbibia daho he ja lọ go dọmọ: “To whenẹnu, ohia Visunnu gbẹtọ tọn na sọawuhia to olọn, bọ hẹnnu he to aigba ji lẹpo na doavigbè, yé nasọ mọ Visunnu gbẹtọ tọn ja to aslọ olọn tọn lẹ mẹ to huhlọn po gigo daho po mẹ. [Jesu] nasọ do angẹli etọn lẹ hlan, podọ po ogbè opẹ̀n tọn daho de po, yé na bẹ mẹdide etọn lẹ pli sọn agosu ẹnẹ aihọn tọn lẹ mẹ, sọn opodo olọn tọn de jẹ opodo devo.” (Mat. 24:29-31) ‘Mẹdide lẹ bibẹpli’ ehe to alọdlẹndo ojlẹ he mẹ Klistiani yiamisisadode he pò to aigba ji lẹpo na mọ ahọsumẹ olọn mẹ tọn yetọn yí te. Nujijọ enẹ na wá aimẹ to adà tintan nukunbibia daho lọ tọn godo, yèdọ jẹnukọnna awhàn Amagẹdọni tọn. Enẹgodo, omẹ 144 000 lẹpo na kọnawudopọ hẹ Jesu nado gbawhàn ahọlu aigba ji tọn lẹ tọn. (Osọ. 17:12-14) Hùnwhẹ Oflin tọn he na yin bibasi jẹnukọnna bibẹplidopọ mẹyiamisisadode lẹ tọn do olọn mẹ lọ wẹ na yin godo tọn, na Jesu na ko “wá” wutu.

16. Naegbọn a do magbe nado tin to hùnwhẹ Oflin tọn owhe ehe mẹ tọn tẹnmẹ?

¹⁶ Nado mọaleyi sọn hùnwhẹ enẹ mẹ, mì gbọ dopodopo mítọn ni magbe nado tin to Oflin lọ tẹnmẹ to 31 mars 2018. Podọ mì gbọ mí ni biọ Jehovah dọ ewọ ni gọalọna mí nado to yiyidogọna pọninọ omẹ etọn lẹ tọn zọnmii! (Hia Salmu lẹ 133:1.) Flindọ to gbèdopo, mí na basi hùnwhẹ Oflin tọn godo tọn. Kakajẹ whenẹnu, mì gbọ mí ni nọ dovivẹnu nado yì nuwiwa lọ tẹnmẹ, bosọ nọ yọ́n pinpẹn pọninọ he mí nọ duvivi etọn to ojlẹ Oflin tọn lọ mẹ tọn.