TO WHEDELẸNU, e nọ yì domọ. Mì gbọ mí ni pọ́n apajlẹ dopo. Deutelonomi 24:14, 15 dọmọ: “Hiẹ ma dona hò pakanọ he to nuhudo mẹ bo yin wamọnọ de dù gba, vlavo ewọ yin nọvisunnu towe kavi mẹhe to jonọ-gbéji to aigba towe ji . . . Eyin e ma yinmọ, ewọ na dawhá ylọ Jehovah sọta we, bọ e na yin ylando dokọna we.”

Kandai obiọ he yin zize yì owhẹ̀ nukọn de tọn, ehe sọgan ko yin bibasi to owhe delẹ jẹnukọnna owhe 600 J.W.M, yin mimọ to fie sẹpọ Aṣidọdi. E yin kinkandai do zẹ́nkla de ji bo sọgan ko yin awuwlena do ota glesi de tọn mẹ, he yè sawhẹdokọna dọ e gboawupo nado bẹ jinukun sọha he ji yé kọngbedopọ do lọ jo. Kandai lọ dọmọ: “To whenue devizọnwatọ towe [mẹhe to obiọ lọ basi] ko dotana jibẹwawhé lọ to azán delẹ die godo, Hoshayahu, visunnu Shobay tọn wá bo ze awugbó devizọnwatọ towe tọn. . . . Azọ́nwatọgbẹ́ ṣie he to azọ́n jibẹwawhé tọn wà hẹ mi to owhè ṣádada nù lẹpo wẹ na dekunnu . . . dọ nugbo dọ wẹ n’te. Homẹvọnọ wẹ n’yin bo ma hùwhẹ depope. . . . Eyin ayimatẹn-gán lọ tlẹ mọdọ emi ma tin to dandannu glọ nado hẹn ẹn diun dọ awugbó devizọnwatọ towe tọn yin gigọjo na ẹn, ni jaale bo kú lẹblanu ṣie bo wàmọ! Jaale bo ma gbọṣi abọẹ to whenue devizọnwatọ towe do nuhudo awugbó etọn tọn blo.”

Whenuho-kantọ Simon Schama dọ dọ, obiọ ehe “ma to flumẹjijẹ glesi de he to jijlo nado gọ̀ [awugbó etọn] mọyi tọn dohia mí poun gba. E sọ dohia dọ mẹhe to obiọ lọ basi yọ́n onú delẹ gando osẹ́n Biblu tọn lẹ go, titengbe gando gbedide he tin to Levitiku po Deutelonomi po mẹ lẹ go, ehe jẹagọdo kanyinylan do wamọnọ lẹ go.”