TO Mercredi afọnnu 24 janvier 2018, homẹ hagbẹ whẹndo Bẹtẹli États-Unis po Canada po tọn lẹ tọn hùn nado sè nulila vonọtaun de: Mẹmẹsunnu Kenneth Cook Jr., yin yiyidogọ Hagbẹ Anademẹtọ Kunnudetọ Jehovah tọn lẹ tọn.

Mẹmẹsunnu Cook yin jiji bosọ yin pinplọn whẹ́n to ṣẹnṣẹn-hùwaji Pennsylvanie tọn to États-Unis. Klasigbẹ́ etọn de wẹ plọn ẹn nugbo lọ ojlẹ kleun de whẹpo e do yí gbedewema wehọmẹ daho tọn, podọ e yí baptẹm to 7 juin 1980. E bẹ sinsẹ̀nzọn whenu-gigọ́ tọn jẹeji taidi gbehosọnalitọ whepoponu tọn to 1^er septembre 1982. Whenue e ko basi gbehosọnalitọ na owhe awe godo, e yin oylọ-basina wá Bẹtẹli, bo bẹ sinsẹ̀nzọn etọn jẹeji to Wallkill, New York, to 12 octobre 1984.

Na owhe 25, Mẹmẹsunnu Cook sẹ̀n to azọ́ndenamẹ voovo lẹ mẹ to Wezintẹn podọ to Azọ́nwatẹn he nọ penukundo owhé Bẹtẹli tọn go. E wlealọ hẹ Jamie to 1996, mẹhe wá kọnawudopọ hẹ ẹ to sinsẹ̀nzọn Bẹtẹli tọn mẹ to Wallkill. To décembre 2009, Mẹmẹsunnu po Mẹmẹyọnnu Cook po yin tẹnsẹna yì Nọtẹn Wepinplọn Watchtower tọn to Patterson, New York, fie Mẹmẹsunnu Cook yin azọ́ndena te do Azọ́nwatẹn he nọ penukundo kanbiọ Biblu tọn lẹ go. To avril 2016, to whenue Mẹmẹsunnu po Mẹmẹyọnnu Cook po ko gọyì azọ́nwatẹn Wallkill tọn na ojlẹ de godo, yé yin didohlan Brooklyn, New York. To osun atọ́n godo, yé yin tẹnsẹna yì tatọ́-tẹnnọ mítọn to Warwick, New York. To janvier 2017, Mẹmẹsunnu Cook yin pipà taidi alọgọtọ de na Wedegbẹ́ Wekinkan tọn Hagbẹ Anademẹtọ lọ tọn.