Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Onú ẹnẹ tẹlẹ wẹ mí sọgan wà nado hẹn nugopipe hànjiji tọn mítọn pọnte?

Mí sọgan jlọkọ̀ ganji gbọn ohanwe mítọn zizedaga dali. Mí dona yí agbọ́ dile e jẹ do. Eyin mí kẹ̀ onù mítọn ganji bo jihàn daga, mí na penugo nado jihàn po gbèzeyiaga po.—w17.11, w. 5.

Etẹwẹ dona yin numọtolanmẹ mítọn gando fie tòdaho fibẹtado tọn lọ lẹ tin te to Islaeli po ali he yì yé mẹ po go?

Tòdaho fibẹtado tọn ṣidopo wẹ yin dide do otò lọ mẹ, podọ ali he yì yé mẹ lẹ nọ tin to ninọmẹ dagbe mẹ. Gbọnmọ dali, e nọ bọawuna mẹdepope nado yawu họnyi dín fibẹtado to finẹ.—w17.11, w. 14.

Naegbọn ofligọ lọ he Jiwheyẹwhe na mí gbọn Jesu gblamẹ do yin nunina dagbe hugan he mí sọgan mọyi?

E hẹn pekọ wá na ojlo mítọn nado to gbẹnọ zọnmii, podọ e súdo nuhudo mítọn nado yin tuntundote sọn ylando po okú po si tọn. Na Jiwheyẹwhe tindo owanyi sisosiso na kúnkan Adam tọn lẹ wutu, ewọ ze Jesu jo do ota mítọn mẹ dile mí gbẹ́ to ylandonọ yin.—wp17.6, w. 6-7.

Nawẹ Salmu lẹ 118:22 dlẹnalọdo fọnsọnku Jesu tọn gbọn?

Jesu yin gbigbẹdai taidi Mẹsia lọ bo yin hùhù. Nado sọgan lẹzun “zannu gángánsu họ̀gosu tọn,” ewọ dona yin finfọnsọnku.—w17.12, w. 9-10.

Be dandan wẹ dọ sunnu de ni mọ jlọjẹ viplọnji tọn yí whẹpo do yin tọgbo Mẹsia lọ tọn de ya?

To whedelẹnu, hukan whẹndo tọn he gblamẹ Jesu wá gbọn nọ gbọn visunnu plọnji de ji jẹ devo ji—ṣigba e ma yinmọ to whelẹponu. Davidi ma yin viplọnji Jẹsse tọn; ṣogan Mẹsia lọ wá gbọn Davidi gblamẹ.—w17.12, w. 14-15.

Etẹwẹ yin delẹ to anademẹ agbasalilo tọn he tin to Biblu mẹ lẹ mẹ?

To Osẹ́n Mose tọn glọ, mẹhe to azọ̀n wunmẹ de jẹ lẹ nọ yin kinklandovo na mẹhe pò lẹ. Mẹhe doalọ oṣiọ de go lẹ dona lẹ̀ yede wé. Osẹ́n lọ biọ dọ afọdai dona nọ yin dìdì to aliho he sọgbe mẹ. Ovi de dona yin adàgbona azán ṣinatọ̀n to jiji etọn godo, ehe sọgbe, na agbasa etọn na penugo nado yawu doalọtena hùndidi.—wp18.1, w. 7.

Naegbọn e ma do ylan dọ Klistiani de ni yiwanna edetiti jẹ obá he sọgbe mẹ?

Mí dona yiwanna kọmẹnu mítọn lẹ di míde. (Malku 12:31) Asu lẹ dona “nọ yiwanna asi yetọn taidi agbasa yetọn titi.” (Efe. 5:28) Na nugbo tọn, owanyi mẹdetiti tọn sọgan wá lẹzun ṣejannabi tọn.—w18.01, w. 23.

Etẹwẹ yin delẹ to afọdide he mí sọgan ze nado yinukọn to gbigbọ-liho lẹ mẹ?

Mí dona nọ plọn Ohó Jiwheyẹwhe tọn, bo nọ lẹnayihamẹpọn deji, bosọ nọ yí nuhe mí plọn lẹ do yizan mẹ. Mí sọ dona nọ hùn ayiha po ahun mítọn po donuvo na nuyiwadomẹji gbigbọ wiwe tọn, bo nọ kẹalọyi alọgọ mẹdevo lẹ tọn po pinpẹn-nutọn-yinyọnẹn po.—w18.02, w. 26.

Naegbọn sunwhlẹvu-pinpọn po dọṣẹdidọ po ma do yin họnhungan lọ nado yọ́n sọgodo?

Whẹwhinwhẹ́n voovo wẹ tin, ṣigba whẹwhinwhẹ́n titengbe lọ wẹ yindọ Biblu jẹagọdo nuyiwa awe ehelẹ.—wp18.2, w. 4-5.

Nukun tẹwẹ mí dona nọ yí do pọ́n alọkikẹyi oylọ-basinamẹ de nado wá dùnú?

Eyin mí kẹalọyi oylọ-basinamẹ de, mí dona yin nugbonọ na nuhe mí dọ. (Salm. 15:4) Mí ma dona nọ zẹhudo e ji matin whẹwhinwhẹ́n nujọnu tọn. Jonọyitọ mítọn sọgan ko wazọ́n sinsinyẹn nado wleawuna núdùdù lọ.—w18.03, w. 18.

Etẹlẹ wẹ sunnu azọngbannọ lẹ sọgan plọn sọn Timoti dè?

Timoti nọ penukundo gbẹtọ lẹ go ganji bosọ nọ ze onú gbigbọmẹ tọn lẹ do otẹn tintan mẹ. Ewọ nọ wazọ́n sinsinyẹn to sinsẹ̀nzọn wiwe lọ mẹ bo nọ yí nuhe e plọn lẹ do yizan mẹ. E nọ to azọ́nplọn ede zọnmii bosọ nọ ganjẹ gbigbọ Jehovah tọn go. Mẹho agun tọn lẹ po mẹdevo lẹ po sọgan hodo apajlẹ etọn.—w18.04, w. 13-14.