Otọ́ Lehoboami tọn wẹ Sọlomọni, mẹhe duahọlu to Islaeli na owhe 40. (1 Ahọ. 11:42) Sọlomọni kú to 997 J.W.M. Enẹgodo, Lehoboami zingbejizọnlin sọn Jelusalẹm yì Ṣekẹmi to agewaji nado yin yiyiamisisadode taidi ahọlu. (2 Otàn. 10:1) Be a lẹndọ e to budi nado hodo afọdòmẹ Sọlomọni tọn lẹ, mẹhe yin yinyọnẹn na nuyọnẹn vonọtaun he e tindo wutu wẹ ya? Nawẹ Lehoboami sọgan yọnẹn jẹnukọn gbọn dọ to ojlẹ vude godo, nugopipe emi lọsu tọn nado nọ didẹ whẹho he gẹdẹ lẹ sọgan yin whiwhlepọn?

Lehoboami dona ko mọdọ nuhahun tin-to-aimẹ to Islaeli. To ojlẹ de godo, afọzedaitọ tòvi lọ lẹ tọn lẹ wá e dè bo dọ ahunmẹdunamẹnu yetọn lẹ na ẹn tlọlọ dọmọ: “Otọ́ towe hẹn zẹgẹ mítọn sinyẹn. Ṣigba, eyin hiẹ hẹn azọ́n sinsinyẹn he otọ́ towe zín do mí ji lọ bọawu bo hẹn zẹgẹ pinpẹn he e zedo mí ji lọ fua, míwlẹ na wadevizọn na we.”—2 Otàn. 10:3, 4.

Lehoboami sọgan ko lẹndọ omọ̀ de wẹ! Eyin e wà nuhe biọ mẹlọ lẹ te, e sọgan biọ dọ ewọ, whẹndo etọn gọna mẹhe nọ nọ̀ họ̀nmẹ etọn lẹ ni dekanpona gbẹzan fẹẹmẹninọ tọn yetọn, bo ma nasọ nọ biọ nususu sọn tòvi lọ lẹ si ba. To alọ devo mẹ, eyin ewọ gbẹ́ obiọ yetọn dai, tòvi lọ lẹ sọgan fọngu. Etẹwẹ ewọ na wà lo? Jẹnukọn whẹ́, ahọlu yọyọ lọ yì dewé hẹ sunnu mẹho he ko yin ayinamẹtọ Sọlomọni tọn lẹ. Ṣigba to enẹgodo, Lehoboami wá dín ayinamẹ sọn jọja sunnu he po e po to haji lẹ dè. Lehoboami hodo ayinamẹ yetọn bo basi dide nado yinuwa hẹ omẹ lọ lẹ po kanyinylan po. E gblọn dọmọ: “Yẹn na hẹn zẹgẹ mìtọn pẹ̀n dogọ, n’nasọ yidogọna ẹn. Obá tata wẹ otọ́ ṣie yí do sayana mì, ṣigba alànbá wẹ yẹn na yí do wàmọ.”—2 Otàn. 10:6-14.

Etẹwẹ mí sọgan plọn sọn e mẹ? E họnwun dọ nuyọnẹnnu wẹ e nọ saba yin nado dotoaina mẹhomẹ he whèwhín to gbigbọ-liho lẹ. Na yé tindo numimọ wutu, yé sọgan mọ kọdetọn he nudide de sọgan hẹnwa lẹ hlan bo na mí ayinamẹ dagbe.—Jobu 12:12.

Whenue tòvi lọ lẹ fọngu, Lehoboami bẹ awhànpa etọn pli. Amọ́, Jehovah dádo whẹho lọ mẹ gbọn yẹwhegán Ṣemaia gblamẹ bo dọmọ: “Mìwlẹ ma  dona hẹji yì hoavùn hẹ Islaelivi nọvisunnu mìtọn lẹ. Dopodopo mìtọn ni lẹkọyi owhé etọn gbè, na yẹn wẹ hẹn ehe nado jọ.”—1 Ahọ. 12:21-24. *

Bọ yé ma nasọ hoavùn ba wẹ ya? A sọgan yí nukun homẹ tọn do pọ́n lehe enẹ na ko hẹn Lehoboami biọ bẹwlu mẹ do! Etẹwẹ gbẹtọ lẹ na lẹn gando ahọlu he ko sìn-adán nado yí “alànbá” do sayana mẹjidugando etọn lẹ, ṣigba bo yawu joagọ to atẹṣiṣi tlọlọ ehe nukọn lọ go? (Yijlẹdo 2 Otànnugbo lẹ 13:7 go.) Etomọṣo, ahọlu lọ po awhànpa etọn lẹ po “setonuna ohó Jehovah tọn bo lẹkọyi whé, kẹdẹdile Jehovah ko dọna yé do.”

Etẹwẹ mí sọgan plọn sọn e mẹ? Nuyọnẹnnu wẹ e yin nado setonuna Jiwheyẹwhe, eyin mọwiwà na tlẹ zọ́n bọ mí na pehẹ mẹṣanko wunmẹ delẹ. Tonusisena Jiwheyẹwhe nọ dekọtọn do nukundagbe po dona etọn po mẹ.—Deut. 28:2.

Etẹwẹ yin kọdetọn lọ na Lehoboami? Ewọ setonu bo hò tito etọn nado hoavùn sọta akọta yọyọ he yin didoai lọ plá, bo wá na ayidonugo tòdaho lẹ didoai to aigba hẹnnu Juda po Bẹnjamini po tọn he ji e gbẹ́ to gandu do lẹ ji. E sọ vọ́ hẹn tòdaho susu lodo “taun.” (2 Otàn. 11:5-12) Humọ, na ojlẹ de, ewọ yinuwa sọgbe hẹ osẹ́n Jehovah tọn lẹ. To whenue ahọluduta hẹnnu ao Islaeli tọn he to gandudu Jeloboami tọn glọ tlọ biọ boṣiọ-sinsẹ̀n mẹ, mẹsusu sọn dọ́n wẹ “nọgodona Lehoboami” bo zingbejizọnlin wá Jelusalẹm nado do teninọ yetọn hia na sinsẹ̀n-bibasi nugbo lọ. (2 Otàn. 11:16, 17) Gbọnmọ dali, tonusise Lehoboami tọn hẹn gandudu etọn lodo.

Ṣigba, whenue gandudu etọn ko yin hinhẹn lodo gligli, Lehoboami wá wà nude he yè madonukun. E gbẹkọ osẹ́n Jehovah tọn go bo kẹalọyi sinsẹ̀n-bibasi kosi lẹ tọn! Ṣigba, etẹwutu? Be onọ̀ etọn he yin Amọninu de wẹ sisẹ́ ẹ nado wàmọ ya? (1 Ahọ. 14:21) Depope he whẹwhinwhẹ́n lọ yin, akọta lọ pete wẹ hopódona ẹn. Enẹwutu, Jehovah na dotẹnmẹ Ahọlu Ṣiṣaki Egipti tọn nado yí tòdaho Juda tọn susu mahopọnna lehe Lehoboami ko hẹn yé lodo do sọ!—1 Ahọ. 14:22-24; 2 Otàn. 12:1-4.

Nulẹ wá ylan pete to whenue Ṣiṣaki jlo na yí Jelusalẹm, yèdọ fie Lehoboami to gandu te. To whenẹnu, Ṣemaia yẹwhegán lọ do owẹ̀n Jiwheyẹwhe tọn na Lehoboami po ahọvi etọn lẹ po dọmọ: “Mìwlẹ ko jo mi do, enẹwutu wẹ yẹnlọsu do jo mì do alọ Ṣiṣaki tọn mẹ.” Nawẹ Lehoboami yinuwa gando owẹ̀n mẹplọnlọdomẹgo tọn enẹ go gbọn? Nuyiwa etọn jẹna pipà! Biblu na linlin dọmọ: “Ahọvi Islaeli tọn lẹ po ahọlu lọ po whiwhẹ yede bo dọmọ: ‘Dodonọ wẹ Jehovah.’” Enẹwutu, Jehovah whlẹn Lehoboami, podọ Jelusalẹm ma yin vivasudo.—2 Otàn. 12:5-7, 12.

Enẹgodo, Lehoboami zindonukọn nado to gandu do ahọluduta hùwaji tọn ji. Jẹnukọnna okú etọn, ewọ yí alọtútlú do má nunina lẹ na visunnu etọn lẹ, matin ayihaawe nado dapana gufinfọn depope sọta nọvisunnu yetọn Abija, he yin mẹjẹmẹtẹnmẹ etọn. (2 Otàn. 11:21-23) To whẹho ehe mẹ, Lehoboami do wuntuntun hia jẹ obá de mẹ, yèdọ jẹhẹnu de he e gboawupo wayi nado dohia.

Mahopọnna nudagbe he Lehoboami wà lẹ, ewọ gboawupo nado mọ nukundagbe Jiwheyẹwhe tọn. Biblu basi bladopọ gandudu etọn tọn dọmọ: “E wà nuylankan lẹ.” Etẹwutu? Na “e ma magbe to ahun etọn mẹ nado dín Jehovah wutu.”—2 Otàn. 12:14.

Lẹnnupọndo nuhe enẹ zẹẹmẹdo ji: Lehoboami setonuna Jiwheyẹwhe to ojlẹ delẹ mẹ. Podọ e wà nudagbe delẹ do akọta Jehovah tọn tamẹ. Ṣigba, e gboawupo nado wleawuna haṣinṣan pẹkipẹki de hẹ Jehovah kavi ojlo vẹkuvẹku lọ nado hẹn homẹ etọn hùn. Gbọnmọ dali, e tlọ biọ nuylankan wiwà po sinsẹ̀n-bibasi lalo po mẹ. A sọgan kanse dewe dọ: ‘Whenue Lehoboami kẹalọyi mẹplọnlọ Jiwheyẹwhe tọn, be e wàmọ titengbe na mẹdevo lẹ sisẹ́ ẹ kakati ni yindọ e lẹnvọjọ sọn ahun mẹ wá bo jlo na hẹn homẹ Jiwheyẹwhe tọn hùn wutu wẹ ya?’ (2 Otàn. 11:3, 4; 12:6) To nukọn mẹ to gbẹzan etọn mẹ, e gọjẹ nuylankan wà ji. Lehe ewọ gbọnvona baba-daho etọn Ahọlu Davidi do sọ! Na nugbo tọn, Davidi jai jẹ nuṣiwa delẹ mẹ, amọ́ to gbẹzan etọn mẹ, ewọ dohia dọ emi yiwanna Jehovah, ze emide jo mlẹnmlẹn na sinsẹ̀n-bibasi nugbo bosọ do lẹnvọjọ nujọnu tọn hia gando ylando etọn lẹ go.—1 Ahọ. 14:8; Salm. 51:1, 17; 63:1.

 E họnwun dọ mí sọgan plọn nude sọn Lehoboami dè. Mẹhe nọ penukundo hagbẹ whẹndo tọn yetọn lẹ go bosọ nọ dovivẹnu nado wà nudagbe lẹ dotana lẹ jẹna pipà. Ṣigba, nado duvivi nukundagbe Jiwheyẹwhe tọn, onú titengbe hugan he mí dona wà wẹ nado nọ nọgodona sinsẹ̀n-bibasi nugbo bosọ nọ tẹdego.

E yọnbasi dọ mí na wàmọ eyin mí nọ dovivẹnu nado hẹn owanyi sisosiso mítọn na Jehovah go. Kẹdẹdile mí nọ to nake yí do miyọ́n mẹ, na e nido to jiji zọnmii do, mọdopolọ mí dona hẹn owanyi mítọn na Jiwheyẹwhe sinyẹn dogọ gbọn Ohó etọn pinplọn to gbesisọ mẹ, ayihamẹlinlẹnpọn do nuhe mí hia ji po linsinsinyẹn to odẹ̀ mẹ po dali. (Salm. 1:2; Lom. 12:12) Taidi kọdetọn de, owanyi mítọn na Jehovah na na huhlọn ojlo mítọn nado hẹn homẹ etọn hùn to nuhe wà mí te lẹpo mẹ. E na whàn mí nado do lẹnvọjọ nujọnu tọn hia, eyin e wá biọ domọ to whedelẹnu. To vogbingbọn mẹ na Lehoboami, mí na hẹn tenọgligo gligli to sinsẹ̀n-bibasi nugbo mẹ.—Juda 20, 21.