1, 2. (a) Kanṣiṣa tẹwẹ tin to owanyi po yise po ṣẹnṣẹn? (b) Kanbiọ tẹlẹ wẹ mí na gbadopọnna?

MÍ YIWANNA Jehovah “na ewọ whẹ́ wẹ yiwanna mí wutu.” (1 Joh. 4:19) Dopo to aliho he mẹ Jehovah do owanyi sisosiso etọn hia te lẹ mẹ wẹ afọdide tintan he e ze nado dona sinsẹ̀n-basitọ nugbonọ etọn lẹ. Dile owanyi mítọn na Jiwheyẹwhe to jijideji do, mọ wẹ yise mítọn dọ ewọ tin podọ dọ ewọ ma na nọma suahọ mẹhe ewọ yiwanna lẹ nọ to lilodo dogọ do niyẹn.—Hia Heblu lẹ 11:6.

² Mẹhe Jehovah yin po nuhe e nọ wà lẹ po nọ dohia nugbo dọ ahọsumẹtọ de wẹ ewọ yin. Yise mítọn ma sọgan yin pipé, adavo mí deji mlẹnmlẹn dọ Jiwheyẹwhe na suahọ mẹhe to dindin in vẹkuvẹku lẹ, na “yise wẹ yin nukundido dejidego nuhe mí to todo lẹ tọn.” (Heb. 11:1) Mọwẹ, yise nọ biọ dọ mí ni tindo nukundido dejidego gando dona he Jiwheyẹwhe dopagbe etọn lẹ go. Ṣigba, nawẹ todido ahọsumẹ de tọn nọ hẹn ale wá na mí gbọn? Nawẹ Jehovah suahọ sinsẹ̀n-basitọ etọn lẹ to hohowhenu podọ to egbehe gbọn? Mì gbọ mí ni pọ́n.

3. Opagbe tẹwẹ mí mọ to Malaki 3:10 mẹ?

³ Jehovah Jiwheyẹwhe magbe nado suahọ sinsẹ̀n-basitọ nugbonọ etọn lẹ, enẹwutu e na tuli mí nado vánkan bo mọ dona  etọn lẹ yí. Mí hia dọmọ: “‘Mì jaale bo tẹ́n mi pọ́n . . .’ wẹ Jehovah awhànpa lẹ tọn dọ, ‘bo pọ́n eyin yẹn ma na hùn olọn lẹ na mì bo na kọ̀n dona de jẹgbonu do mì ji kaka bọ nuhudo nudepope tọn ma na tin ba.’” (Mal. 3:10) Mí nọ do pinpẹn-nutọn-yinyọnẹn sisosiso mítọn hia to whenue mí kẹalọyi nuzedonukọnnamẹ homẹdagbe tọn Jehovah tọn enẹ.

4. Naegbọn mí sọgan dejido hodidọ jidenamẹ tọn Jesu tọn he yin kinkandai to Matiu 6:33 mẹ go?

⁴ Jesu hẹn devi etọn lẹ deji dọ eyin yé ze Ahọluduta lọ do otẹn tintan mẹ, Jiwheyẹwhe na nọgodona yé. (Hia Matiu 6:33.) Nugbonọ-yinyin he Jehovah ko dohia to aliho pipé de mẹ to whẹho voovo lẹ mẹ hẹn mí kudeji dọ opagbe Jesu tọn enẹ na mọ hẹndi. Jesu yọnẹn dọ opagbe Jiwheyẹwhe tọn lẹ ma nọ gboawupo gbede. (Isa. 55:11) Mọdopolọ, mílọsu sọgan kudeji dọ eyin mí do yise ahundopo tọn hia to Jehovah mẹ, ewọ na hẹn opagbe etọn ehe di dọmọ: “Yẹn ma na jo mì do gbede podọ yẹn ma na gbẹ́ mì dai gbede.” (Heb. 13:5) Mí sọgan mọdọ ohó gbọdo ehe tindo kanṣiṣa hẹ nuhe Jesu dọ gando Ahọluduta lọ po dodowiwa Jiwheyẹwhe tọn po dindin whẹ́ go.

5. Naegbọn gblọndo Jesu tọn na Pita do hẹn yise lodo?

⁵ Apọsteli Pita kanse Jesu to gbèdopo dọ: “Míwlẹ ko jo nulẹpo do bo hodo we; todin etẹwẹ mí na mọyi sọn e mẹ taun?” (Mat. 19:27) Kakati nado gbẹnuna Pita na kanbiọ enẹ he e kanse wutu, Jesu dọna devi etọn lẹ dọ yé na mọ ahọsumẹ yí na avọ́sinsan yetọn lẹ. Apọsteli nugbonọ lọ lẹ po mẹdevo lẹ po na dugán hẹ ewọ to olọn mẹ. Ṣigba, etlẹ yin todin, ahọsumẹ delẹ tin. Jesu dọmọ: “Mẹdepope he jo owhé lẹ do kavi nọvisunnu lẹ kavi nọviyọnnu lẹ kavi otọ́ kavi onọ̀ kavi ovi lẹ kavi aigba lẹ na oyín ṣie tọn wutu, na  mọyi do donu kanweko ji bo nasọ dugu ogbẹ̀ madopodo tọn.” (Mat. 19:29) Devi etọn lẹ na mọ dona he zẹ̀ avọ́sinsan depope he dopodopo yetọn lẹ sọgan ko basi go yí. Be otọ́, onọ̀, nọvisunnu, nọviyọnnu po ovi gbigbọmẹ tọn lẹ po ma họakuẹ taun hú nudepope he mí jodo kavi yí do sanvọ́ na Ahọluduta lọ tọn wutu ya?

6. Naegbọn Jehovah do dopà ahọsumẹ tọn na sinsẹ̀n-basitọ etọn lẹ?

⁶ Opà ahọsumẹ tọn he Jehovah do na sinsẹ̀n-basitọ etọn lẹ nọ gọalọna yé nado doakọnnanu to whenue tenọgli yetọn yin whiwhlepọn. Gbọnvona dona gbigbọmẹ tọn họakuẹ he sinsẹ̀n-basitọ nugbonọ Jehovah Jiwheyẹwhe tọn lẹ nọ duvivi etọn to egbehe lẹ, yé sọ to nukọnpọnhlan dona daho hugan lẹ po jejejininọ po to sọgodo. (1 Tim. 4:8) Mọwẹ, nujikudo mlẹnmlẹn mítọn dọ Jehovah “wẹ ahọsumẹtọ mẹhe to dindin in vẹkuvẹku lẹ tọn” na gọalọna mí nado hẹn yise he lodo de go.—Heb. 11:6.

7. Nawẹ todido sọgan yin yiyijlẹdo húnsingàn de go gbọn?

⁷ To Yẹwhehodidọ Osó ji tọn lọ mẹ, Jesu dọmọ: “Mì nọ jaya bosọ nọ gọ́ na ayajẹ, na daho wẹ ale mìtọn to olọn mẹ, na mọ wẹ yé ko dohomẹkẹn yẹwhegán he jẹnukọnna mì lẹ do.” (Mat. 5:12) Na nugbo tọn, gbọnvona mẹhe na mọ ahọsumẹ olọn mẹ tọn yí lẹ, todido ogbẹ̀ madopodo tọn to paladisi aigba ji tọn de mẹ yin whẹwhinwhẹ́n devo nado “nọ jaya bosọ nọ gọ́ na ayajẹ.” (Salm. 37:11; Luku 18:30) Todido mítọn sọgan tin taidi “húnsingàn de na alindọn mítọn, bo yin nujikudo tọn bosọ lodo” vlavo eyin todido olọn mẹ tọn wẹo kavi aigba ji tọn. (Heb. 6:17-20) Kẹdẹdile húnsingàn de nọ hẹn bato de dote gligli to yujẹhọn de whenu do, mọ wẹ todido dejidego ahọsumẹ de tọn sọgan gọalọna mí nado lodo to numọtolanmẹ-liho, to apọ̀nmẹ podọ to gbigbọ-liho do niyẹn. E sọgan gọalọna mí nado mọ huhlọn he mí na yí do doakọnna ninọmẹ sinsinyẹn lẹ.

8. Nawẹ todido mítọn sọgan de magbọjẹ pò gbọn?

⁸ Todido sinai do Biblu ji mítọn tindo huhlọn nado de magbọjẹ he pehẹ mí te lẹ pò. Taidi nusisá he nọ gbọ agbasa vivẹ́, opagbe Jiwheyẹwhe tọn lẹ nọ hòhuwhẹ ahun mítọn he jẹflumẹ. Homẹmiọnnamẹnu nankọ die nado ‘ze agbàn pinpẹn mítọn dlan Jehovah ji,’ to yinyọnẹn mẹ dọ ‘ewọ na penukundo mí go’! (Salm. 55:22) Mí sọgan deji mlẹnmlẹn dọ Jiwheyẹwhe sọgan wà “susu tlala hú nuhe mí biọ kavi lẹn lẹpo.” (Efe. 3:20) Yí nukun homẹ tọn do pọ́n—e ma yin susu, mọ e masọ yin susu tlala kẹdẹ gba, ṣigba “susu tlala hú nuhe mí biọ kavi lẹn”!

9. Etẹwẹ sọgan hẹn mí deji dọ mí na mọ dona Jehovah tọn yí?

⁹ Nado mọ ahọsumẹ lọ yí, mí dona do yise mlẹnmlẹn hia to Jehovah mẹ bo nọ setonuna anademẹ etọn lẹ. Mose dọna akọta Islaeli tọn dọmọ: “E họnwun dọ Jehovah na dona we to aigba he Jehovah Jiwheyẹwhe towe to nina we nado yí taidi ogú lọ ji, kiki eyin hiẹ setonuna ogbè Jehovah Jiwheyẹwhe towe tọn mlẹnmlẹn bo nọ yí sọwhiwhe do yìn gbedide ehe lẹpo he yẹn to nina we to egbé. Na Jehovah Jiwheyẹwhe towe na dona we kẹdẹdile e ko dopagbe etọn na we do.” (Deut. 15:4-6) Be a deji mlẹnmlẹn dọ Jehovah na dona we eyin a zindonukọn nado nọ sẹ̀n ẹn po nugbonọ-yinyin po ya? E họnwun dọ a tindo whẹwhinwhẹ́n dagbe nado hẹn jide mọnkọtọn go.

10, 11. Nawẹ Jehovah suahọ Josẹfu gbọn?

¹⁰ Biblu yin kinkandai na ale mítọn. E bẹ otàn susu hẹn, he do lehe Jiwheyẹwhe dona sinsẹ̀n-basitọ nugbonọ etọn lẹ nugbonugbo do hia. (Lom. 15:4) Josẹfu yin apajlẹ ayidego tọn de. Na mẹdaho etọn lẹ blasé gandego bọ to nukọn mẹ asi ogán etọn tọn sọ dolalo dokọna ẹn wutu, Josẹfu wá mọ ede to  gànpa Egipti tọn de mẹ. Be haṣinṣan etọn hẹ Jiwheyẹwhe sán wẹ ya? Paali! “Jehovah sọ tin hẹ Josẹfu bo nọ do owanyi nugbo hia ẹ . . . Jehovah tin hẹ Josẹfu podọ Jehovah nọ hẹn nuhe wà e te lẹpo tindo kọdetọn dagbe.” (Jen. 39:21-23) To ojlẹ whlepọn tọn enẹlẹ mẹ, Josẹfu yí homẹfa do nọtepọn Jiwheyẹwhe etọn.

¹¹ To owhe lẹ godo, Falo tún Josẹfu dote sọn gànmẹ bo yí afanumẹ whiwhẹnọ ehe do basi mẹbọdomẹgo ahọlu tọn to Egipti. (Jen. 41:1, 37-43) To whenue asi Josẹfu tọn ji visunnu awe na ẹn, “Josẹfu sọ ylọ oyín plọnji lọ tọn dọ Manasse, na e dọ dọ, ‘Jiwheyẹwhe ko hẹn mi wọn tukla ṣie lẹpo po owhé otọ́ ṣie tọn lẹpo po.’ Podọ e ylọ oyín awetọ tọn dọ Eflaimi, na e dọ dọ, ‘Jiwheyẹwhe ko hẹn mi yin sinsẹ́nnọ to aigba nukunbibia ṣie tọn ji.’” (Jen. 41:51, 52) Na Josẹfu yin nugbonọ na Jiwheyẹwhe wutu, taidi ahọsumẹ de, e mọ dona lẹ yí, he dekọtọn do ogbẹ̀ Islaelivi lẹ po Egiptinu lẹ po tọn whinwhlẹngán mẹ. Nuagokun lọ wẹ yindọ, Josẹfu yọnẹn dọ Jehovah wẹ suahọ emi bo dona emi.—Jen. 45:5-9.

12. Etẹwẹ gọalọna Jesu nado yin nugbonọ to whlepọn whenu?

¹² Mọdopolọ, Jesu Klisti setonuna Jiwheyẹwhe to whlepọn yise tọn voovo lẹ whenu, podọ e mọ ahọsumẹ yí. Etẹwẹ gọalọna ẹn nado pehẹ whlepọn enẹlẹ? Ohó Jiwheyẹwhe tọn basi zẹẹmẹ dọmọ: “Na ayajẹ he yin zizedonukọnna ẹn wutu, e doakọnna yatin de, bo ma hò winyan lọ pọ́n.” (Heb. 12:2) Ayihaawe ma tin dọ Jesu mọ ayajẹ na e penugo nado klan yinkọ Jiwheyẹwhe tọn do wiwe wutu. Humọ, e mọ nukundagbe Otọ́ etọn tọn po lẹblanulọkẹyi susu lẹ po yí taidi ahọsumẹ. Biblu dọ dọ e “ko sọ sinai to adusilọ ofìn Jiwheyẹwhe tọn mẹ.” Podọ to wefọ devo mẹ, mí hia dọmọ: “Jiwheyẹwhe ze e daga do otẹn he yiaga de mẹ bo gbọn homẹdagbe dali na ẹn oyín lọ he yiaga hú oyín devo lẹpo.”—Flp. 2:9.

13, 14. Etẹwẹ nọ yin numọtolanmẹ Jehovah tọn gando nuhe mí nọ wà na ẹn lẹ go?

¹³ Mí sọgan deji dọ Jehovah nọ yọ́n pinpẹn vivẹnu depope he mí do nado sẹ̀n ẹn tọn. E nọ mọnukunnujẹ ayimajai kavi obu depope he mí sọgan tindo mẹ. E nọ vẹawu mí eyin nuhahun akuẹ tọn húagbọ́ mí kavi to whenue agbasamalo kavi numọtolanmẹ mítọn lẹ jlo na dekanpona sinsẹ̀nzọn wiwe mítọn. Podọ mí sọgan deji mlẹnmlẹn dọ Jehovah nọ gbọn owanyi dali doayi nuhe sinsẹ̀n-basitọ etọn lẹ nọ wà nado yin nugbonọ na ẹn lẹ go.—Hia Heblu lẹ 6:10, 11.

¹⁴ Humọ, hẹn do ayiha mẹ dọ, mí sọgan dọnsẹpọ “Sisètọ odẹ̀ tọn” po jide po dọ ewọ na na ayidonugo ahunmẹdunamẹnu mítọn lẹ. (Salm. 65:2) “Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn” na gbọn alọtútlú dali na mí godonọnamẹ he mí tindo nuhudo etọn to numọtolanmẹ-liho podọ to gbigbọ-liho, vlavo gbọn sinsẹ̀n-basitọ hatọ mítọn lẹ gblamẹ. (2 Kọl. 1:3) Homẹ Jehovah tọn nọ hùn taun to whenue mí do awuvẹmẹ hia mẹdevo lẹ. “Mẹhe nọ do nukundagbe hia agbátọnọ to yinyan na Jehovah, Ewọ nasọ suahọ ẹ na nuhe e wà.” (Howh. 19:17; Mat. 6:3, 4) Enẹwutu, to whenue mí gbọn ṣejannabi matindo dali gọalọna mẹhe to nuhahun mẹ lẹ, Jehovah nọ pọ́n dagbe he mí wà hlan taidi akuẹ de he mí yàn na Ẹn. Podọ e dopà dọ emi na suahọ homẹdagbe he mí dohia tọn.

15. Ahọsumẹ tẹlẹ wẹ a to nukundo? (Pọ́n yẹdide he tin to bẹjẹeji hosọ ehe tọn.)

¹⁵ Todido lọ nado mọ ‘jẹgbakun dodowiwa tọn, ehe Oklunọ, whẹdatọ dodonọ lọ na na taidi ale de to azán enẹ gbè,’ nọ gọalọna Klistiani yiamisisadode lẹ nado doakọnnanu. (2 Tim. 4:7, 8) Ṣigba, eyin todido he gbọnvona enẹ wẹ Jiwheyẹwhe na we, ma lẹndọ na a ma họakuẹ sọmọ to nukun etọn mẹ wutu wẹ blo. “Lẹngbọ devo” Jesu tọn  livi susu wẹ yí jejejininọ do to nukọnpọnhlan ahọsumẹ sọgodo tọn lọ nado nọgbẹ̀ to paladisi mẹ to aigba ji. To finẹ, “yé [na] nọ mọ awuvivi susu to jijọho susugege mẹ.”—Joh. 10:16; Salm. 37:11.

16. Homẹmiọnnamẹ tẹwẹ mí mọ to 1 Johanu 3:19, 20 mẹ?

¹⁶ To whedelẹnu, mí sọgan nọ mọdọ mí ma to nususu wà kavi mí sọgan nọ kanse míde eyin homẹ Jehovah tọn nọ hùn do vivẹnudido mítọn lẹ go. Mí tlẹ sọgan nọ lẹndọ mí ma jẹ nado mọ ahọsumẹ depope yí. Ṣigba, mí ni ma wọn gbede blo dọ “Jiwheyẹwhe klohu ahun mítọn bosọ yọ́n nulẹpo.” (Hia 1 Johanu 3:19, 20.) E nọ suahọ avọ́sinsan wiwe depope tọn he wá sọn ahun he yin whinwhàn gbọn yise po owanyi po dali mẹ, mahopọnna lehe avọ́sinsan lọ sọgan taidi numadinu sọ to nukun mẹhe basi i tọn mẹ.—Malku 12:41-44.

17. Ahọsumẹ tẹlẹ sin vivi dù wẹ mí te to alọnu?

¹⁷ Etlẹ yin to azán godo tọn titonu ylankan Satani tọn he dózin ehelẹ mẹ, Jehovah to didona omẹ etọn lẹ. E nọ hẹn ẹn diun dọ sinsẹ̀n-basitọ nugbo lẹ to vùnvùn to paladisi gbigbọmẹ tọn yetọn mẹ, yèdọ ninọmẹ vonọtaun de he gọ́ na dona gbigbọmẹ tọn lẹ. (Isa. 54:13) Dile Jesu dopà etọn do, Jehovah nọ suahọ mí todin gbọn dotẹnmẹ nina mí nado yin apadewhe whẹndo owanyinọ de tọn dali, yèdọ whẹndo de he bẹ mẹmẹsunnu po mẹmẹyọnnu lẹ po hẹn lẹdo aihọn pé. (Malku 10:29, 30) Humọ, mẹhe nọ dín Jiwheyẹwhe vẹkuvẹku lẹ nọ mọ dona mayọnjlẹ lẹ yí taidi jijọho ahun mẹ tọn, pekọ po ayajẹ po.—Flp. 4:4-7.

18, 19. Etẹwẹ nọ yin numọtolanmẹ devizọnwatọ Jehovah tọn lẹ tọn gando ahọsumẹ he yé nọ mọyi lẹ go?

¹⁸ Lẹdo aihọn pé, devizọnwatọ Jehovah tọn lẹ sọgan dekunnu ahọsumẹ dagbedagbe he yé nọ mọyi sọn Jehovah dè lẹ tọn. Di apajlẹ, Bianca he nọ nọ̀ Allemagne dọmọ: “Hogbe lẹ nọ whè do mi nado dopẹna Jehovah na alọgọ etọn to magbọjẹ ṣie lẹ whenu, podọ na godonọnamẹ etọn to azán dopodopo ji. Bẹwlu po nuylankan lẹ po kẹdẹ wẹ gọ́ aihọn lọ mẹ. Ṣigba, dile n’to azọ́nwadopọ hẹ Jehovah pẹkipẹki, n’nọ mọdọ n’to hihọ́ mẹ to awà etọn lẹ glọ. Whedepopenu he n’basi avọ́sinsan mẹdetiti tọn lẹ na ẹn, dona he n’nọ mọyi lẹ nọ sù donu kanweko hú avọ́sinsan ṣie lẹ.”

¹⁹ Sọ lẹnnupọndo Paula he tindo owhe 70 bo nọ nọ̀ Canada ji, yèdọ mẹhe hò plibọ bo ma sọgan sẹtẹn na ede. E dọmọ: “Tẹnsisẹ glo ma zẹẹmẹdo dandan dọ yẹwhehodidọ glo gba. N’nọ duvivi wunmẹ sinsẹ̀nzọn voovo lẹ tọn taidi kunnudide to alokan ji po kunnudide mayin aṣa tọn po. Nado na tuli dee, n’tindo kandai-wema de he mẹ n’nọ kàn wefọ po linlẹn he n’mọ to owe mítọn lẹ mẹ po lẹ do, ehe n’sọgan gbadopọnna sọn ojlẹ de mẹ jẹ devo mẹ. N’nọ ylọ ẹ dọ ‘Kandai-Wema Gbẹ̀hẹndote Tọn Ṣie.’ Numọtolanmẹ gbigbọjọ tọn nọ yawu juwayi eyin mí ze ayiha do opagbe Jehovah tọn lẹ ji. Jehovah to finẹ whelẹponu nado gọalọna mí, mahopọnna ninọmẹ mítọn.” Ninọmẹ towe sọgan gbọnvona Bianca kavi Paula tọn. Etomọṣo, a sọgan lẹnnupọndo ahọsumẹ he hiẹ po mẹdevo lẹ po ko mọyi sọn Jehovah dè lẹ ji. Lehe e yọ́n do sọ nado lẹnnupọndo lehe Jehovah to ahọsu we to ojlẹ ehe mẹ do po lehe ewọ na wàmọ na we to sọgodo do po ji!

20. Etẹwẹ mí sọgan donukun eyin mí zindonukọn nado to Jehovah sẹ̀n po alindọn lẹpo po?

²⁰ Ma wọn gbede blo dọ odẹ̀ ahundopo tọn towe lẹ po awuvivo hodidọ tọn he a tindo hẹ Jiwheyẹwhe po “na hẹn ale daho de wá” na we. A sọgan kudeji dọ a na “mọ hẹndi opagbe lọ tọn yí to whenue [a] ko wà ojlo Jiwheyẹwhe tọn godo.” (Heb. 10:35, 36) Enẹwutu todin, mì gbọ mí ni zindonukọn nado nọ hẹn yise mítọn lodo bo nọ wazọ́n po alindọn lẹpo po taidi na Jehovah. Mí sọgan nọ wàmọ, to yinyọnẹn mẹ dọ Jehovah dè wẹ mí na mọ ahọsumẹ he jẹ lọ yí sọn.—Hia Kolosinu lẹ 3:23, 24.