OJLẸ sọ̀ na opli titengbe de to Jelusalẹm. Ahọlu Davidi ylọ ahọvi, ahọluzọnwatọ họ̀nmẹ tọn gọna sunnu huhlọnnọ etọn lẹpo pli. Homẹ yetọn hùn taun nado sè nulila vonọtaun de. Jehovah ko deazọ́nna visunnu Davidi tọn Sọlomọni nado gbá ohọ̀ daho de he na yin kinklandowiwe na sinsẹ̀n-bibasi Jiwheyẹwhe nugbo lọ tọn. Ahọlu Islaeli tọn he ko poyọnho lọ ko mọ yẹdide họ̀gbigbá tọn lọ yí to gbọdo glọ bo yí i na Sọlomọni. Davidi dọmọ: “Azọ́n lọ klo, na e ma yin tẹmpli gbẹtọ tọn, ṣigba Jehovah Jiwheyẹwhe tọn wẹ.”—1 Otàn. 28:1, 2, 6, 11, 12; 29:1.

Enẹgodo, Davidi kanse dọmọ: “Todin, mẹnu lẹ wẹ na desọn ojlo mẹ to egbé nado sẹwá nukọn po nunina de po to alọmẹ hlan Jehovah?” (1 Otàn. 29:5) Eyin a ko to finẹ to gbenẹgbe, nawẹ a na ko yinuwa gbọn? Be a na ko yin whinwhàn nado nọgodona azọ́n daho ehe ya? Islaelivi lẹ yawu yinuwa. Na nugbo tọn, yé “[hùnhomẹ] nado basi nunina sọn ojlo mẹ wá . . . , na ahun pipé de wẹ yé yí do basi nunina sọn ojlo mẹ wá lọ lẹ.”—1 Otàn. 29:9.

To owhe kanweko susu lẹ godo, Jehovah wleawuna nudevo he yiaga taun hugan tẹmpli lọ. E ze tẹmpli gbigbọmẹ tọn daho lọ dai, enẹ wẹ awuwledainanu lọ na gbẹtọvi lẹ nido nọ dọnsẹpọ ewọ to sinsẹ̀n-bibasi mẹ to dodonu avọ́sinsan Jesu tọn ji. (Heb. 9:11, 12) Nawẹ Jehovah to alọgọna gbẹtọvi lẹ nado gbọwhẹ hẹ ẹ to egbehe gbọn? E to mọwà gbọn azọ́n mẹhẹnzun devi tọn mítọn gblamẹ. (Mat. 28:19, 20) Kọdetọn azọ́n ehe tọn wẹ yindọ, plọnmẹ Biblu livi susu nọ yin anadena, devi fọtọ́n susu lẹ nọ yí baptẹm podọ agun yọyọ kanweko susu nọ yin didoai to whemẹwhemẹ.

Ṣigba, jideji mọnkọtọn nọ biọ dọ owe sinai do Biblu ji susu dogọ ni yin zinzinjẹgbonu, Plitẹnhọ Ahọluduta tọn lẹ ni yin gbigbá bo yin nukunpedego, podọ nọtẹn plidopọ lẹ tọn ni yin hihọ̀. Be hiẹ ma kọngbedopọ dọ azọ́n wẹndagbe-jijlá tọn mítọn klo bo nọ hẹn ale wá ya?—Mat. 24:14.

Wanyina Jiwheyẹwhe podọ na kọmẹnu gọna niyaniya-yinyin azọ́n yẹwhehodidọ Ahọluduta lọ tọn wẹ nọ whàn omẹ Jiwheyẹwhe tọn lẹ “nado sẹwá nukọn po nunina de po to alọmẹ hlan Jehovah” gbọn nunina sọn ojlo mẹ wá lẹ bibasi dali. Lehe e yin ayajẹnu do sọ nado nọ “yí nuhọakuẹ [mítọn] lẹ do gbògbéna Jehovah” podọ nado mọ lehe yè nọ yí nugbonọ-yinyin po nuyọnẹn po do zan nunina enẹlẹ do nado wazọ́n he klohugan lọ to whenuho gbẹtọvi tọn mẹ!—Howh. 3:9.