1, 2. (a) Ale tẹwẹ devizọnwatọ Jiwheyẹwhe tọn lẹ to nukọnpọnhlan? (b) Etẹwẹ na gọalọna mí nado ze nukun mítọn do ale lọ ji? (Pọ́n yẹdide he tin to bẹjẹeji hosọ ehe tọn.)

TAIDI apọsteli Paulu, Klistiani he yin dide gbọn gbigbọ dali to egbehe lẹ tindo nukundido jiawu lọ nado mọ “ale oylọ olọn mẹ tọn he Jiwheyẹwhe nọ namẹ” lọ yí. (Flp. 3:14) Yé to nukọnpọnhlan nado sẹ̀n topọ hẹ Jesu Klisti to Ahọluduta olọn mẹ tọn etọn mẹ bo wazọ́n hẹ ẹ nado hẹn gbẹtọvi lẹ jẹ pipé kọ̀n. (Osọ. 20:6) Yanwle jiawu nankọ die he Jiwheyẹwhe basi oylọna omẹ enẹlẹ nado doafọna! Todido he gbọnvo de wẹ lẹngbọ devo lẹ tindo. Yé to nukọnpọnhlan nado mọ ale ogbẹ̀ madopodo tọn yí to aigba ji—todido ayajẹ tọn nankọ die!—2 Pita 3:13.

² Nado gọalọna Klistiani yiamisisadode hatọ lẹ na yé nido yin nugbonọ bo mọ ale lọ yí, Paulu dotuhomẹna yé dọmọ: “Mì nọ ze ayiha mìtọn do nuhe to aga lẹ ji to whepoponu.” (Kol. 3:2) Yé dona nọ ze ayiha yetọn do todido yetọn nado mọ ogú họakuẹ de yí to olọn mẹ ji. (Kol. 1:4, 5) Na nugbo tọn, ayihamẹlinlẹnpọn do dona he Jehovah zedonukọnna omẹ etọn lẹ ji nọ gọalọna  devizọnwatọ Jiwheyẹwhe tọn lẹpo nado ze nukun yetọn do ale lọ ji, vlavo yé tindo todido olọn mẹ tọn kavi aigba ji tọn.—1 Kọl. 9:24.

3. Owù tẹlẹ go wẹ Paulu na avase Klistiani hatọ lẹ gando?

³ Paulu sọ na avase Klistiani hatọ lẹ gando nuhe sọgan hò ale lọ yí sọn yé si lẹ go. Di apajlẹ, e kanwehlan agun he to Kolosi gando Klistiani lalo delẹ go he to tintẹnpọn nado mọ nukundagbe Jiwheyẹwhe tọn yí gbọn azọ́n Osẹ́n tọn lẹ gblamẹ kakati nido yin gbọn yise tintindo to Klisti mẹ dali. (Kol. 2:16-18) Paulu sọ dọhodo owù he gbẹ́ pò to aimẹ kakajẹ din bo sọgan hò ale lọ yí sọn mí si delẹ ji. Di dohia, e basi zẹẹmẹ lehe mí sọgan nọavùnte sọta ojlo mawé lẹ bo didẹ gbemanọpọ hẹ yisenọ hatọ lẹ bosọ duto nuhahun whẹndo tọn lẹ ji do tọn. Ayinamẹ he e na do whẹho ehelẹ ji gbẹ́ yọ́n-na-yizan kakajẹ egbé. Enẹwutu, mì gbọ mí ni gbadopọnna delẹ to avase he Paulu gbọn owanyi dali na to wekanhlanmẹ etọn hlan Kolosinu lẹ mẹ.

4. Nawẹ ojlo mawé lẹ sọgan hò ale lọ yí sọn mí si gbọn?

⁴ To whenue Paulu ko flinnu mẹmẹsunnu etọn lẹ gando todido jiawu yetọn go godo, e wlan dọmọ: “Enẹwutu, mì hù awutugonu mìtọn he to aigba ji lẹ, enẹ wẹ fẹnnuwiwa zanhẹmẹ tọn, mawé, ojlo zogbe zanhẹmẹ tọn, ojlo ylankan po nukunkẹn po.” (Kol. 3:5) Ojlo mawé lẹ sọgan dohuhlọn taun bo hò nuhọakuẹ gbigbọmẹ tọn lẹ yí sọn mí si. Mẹmẹsunnu de he ojlo mawé lẹ ko dọ̀n yì to ojlẹ de mẹ wayi dọ to whenue e lẹkọwa agun mẹ godo dọmọ: “Nuhe to kùnkùn mi to whenẹnu sinyẹn sọmọ bọ n’ma tlẹ lẹkọ pọ́n godo kaka bọ whenu do fẹ́.”

5. Nawẹ mí sọgan họ́ míde sọta ninọmẹ he gán ze mí do owù mẹ lẹ gbọn?

⁵ Na taun tọn, nujọnu wẹ e yin dọ mí ni to aṣeji to whenue mí wá mọ míde to ninọmẹ de mẹ he sọgan hẹn mí nado gbẹkọ nujinọtedo walọ dagbe tọn Jehovah tọn lẹ go. Di apajlẹ, tlolo he sunnu de po yọnnu de po biọ họntọn mẹ, nuyọnẹnnu wẹ e na yin dọ yé ni de dogbó he họnwun lẹ na yede gando nudelẹ go taidi alọdomẹgo, nùdonùgonamẹ kavi pọninọ to fihe mẹde ma te. (Howh. 22:3) Klistiani de sọgan sọ biọ owù mẹ to walọyizan-liho to whenue azọ́n hẹn ẹn yì fihe dẹn do whé na ojlẹ de kavi eyin e to azọ́nwadopọ hẹ omẹ vijinu awetọnọ de. (Howh. 2:10-12, 16) Eyin a wá mọ dewe to ninọmẹ mọnkọtọn mẹ, do dewe hia di dopo to Kunnudetọ Jehovah tọn lẹ mẹ, yinuwa to aliho he jẹna sisi mẹ bo nọ flindọ aihun gblewa tọn sọgan hẹn kọdetọn vẹadi lẹ wá. Owù lọ tlẹ sọgan sọ sinyẹn dogọ to whenue mí to jujugbọn ojlẹ apọṣimẹ kavi flumẹjijẹ tọn de mẹ. To ojlẹ mọnkọtọn lẹ mẹ, mí sọgan to mẹhe na vọ́ jide na mí gando míde go dín vẹkuvẹku. Mí tlẹ sọgan to mẹhe na jlọ mí dote to numọtolanmẹ-liho de dín sọmọ bọ mí na hùn míde do nùvo na mẹdepope he ko gbẹ́ na mí ayidonugo pẹẹde. Eyin enẹ jọ do gowe janwẹ, lẹhlan Jehovah po omẹ etọn lẹ po nado mọ alọgọ yí, na nude nikaa hò ale lọ yí sọn asi we.—Hia Salmu lẹ 34:18; Howhinwhẹn lẹ 13:20.

6. Etẹwẹ mí dona hẹn do ayiha mẹ gando ayidedai he mí nọ de lẹ go?

⁶ Nado hù ojlo mawé lẹ, mí dona gbẹ́ ayidedai mawé lẹ dai. Ayidedai egbezangbe tọn susu wẹ nọ bẹ nuhe yè yí do yọ́n Sodọmi po Gomọla hohowhenu tọn po lẹ hẹn. (Juda 7) Mẹhe nọ wleawuna ayidedai enẹlẹ nọ ze pọndohlan yetọn titi gando walọ dagbe go daga gbọn fẹnnuwiwa zanhẹmẹ tọn didohia taidi jọwamọnu he ma nọ hẹn kọdetọn ylankan depope wá dali. Mí ma gán kànflẹmẹ bo nọ kẹalọyi ayidedai depope he yin zizedonukọnna mí domọ poun. Ayidedai wunmẹ he mí nọ de lẹ ma dona glọnalina mí nado ze nukun mítọn do ale ogbẹ̀ tọn lọ ji.—Howh. 4:23.

7. Nuhahun tẹlẹ wẹ mí gán pehẹ to agun Klistiani tọn mẹ?

⁷ Mímẹpo wẹ na kọngbedopọ dọ dona de wẹ e yin nado tin to agun Klistiani tọn mẹ. Ohó Jiwheyẹwhe tọn pinplọn to opli mítọn lẹ ji gọna owanyi po homẹdagbe po he mí nọ yí do nọgodona ode awetọ nọ gọalọna mí nado zín nukun mítọn do ale lọ ji. Etomọṣo, to whedelẹnu dẹ́sọ-dẹ́mẹ lẹ sọgan hẹn kunṣẹn-kunṣẹn pẹẹde wá hagbẹ agun lọ tọn lẹ ṣẹnṣẹn. Eyin mí ma yawu didẹ nuhahun enẹlẹ, yé gán zọ́n bọ mí na jẹ ode awetọ hẹn do homẹ ji.—Hia 1 Pita 3:8, 9.

8, 9. (a) Jẹhẹnu tẹlẹ wẹ na gọalọna mí nado mọ ale lọ yí? (b) Etẹwẹ gán gọalọna mí nado dín jijọho to whenue Klistiani hatọ de hẹn homẹgble mí?

⁸ Nawẹ mí gán wagbọn bọ mẹhẹndohomẹ ma na hò ale lọ yí sọn mí si? Paulu dotuhomẹna Kolosinu lẹ dọmọ: “Taidi mẹdide Jiwheyẹwhe tọn lẹ, yèdọ mẹwiwe po mẹyiwanna lẹ po, mì yí owanyi sisosiso awuvẹmẹ tọn, homẹdagbe, whiwhẹ, walọmimiọn po homẹfa po dogo. Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po. Kẹdẹdile Jehovah jona mì sọn ojlo mẹ wá do, mọ wẹ mì dona nọ wà do ga. Ṣigba, hú popolẹpo, mì yí owanyi dogo, na enẹ wẹ gẹdẹ he nọ kọ̀n gbẹtọ lẹ dopọ to aliho pipé de mẹ.”—Kol. 3:12-14.

⁹ Owanyi po homẹdagbe po na gọalọna mí nado nọ jona ode awetọ. Di apajlẹ, eyin nuhe Klistiani hatọ de dọ kavi wà hẹn homẹgble mí, mí sọgan tẹnpọn nado flin whenue mílọsu dọho kavi yinuwa to aliho he ma jọmẹ de mẹ. Be homẹ mítọn ma nọ hùn do yisenọ hatọ he nọ gbọn owanyi po homẹdagbe po dali miọnnukundo nuṣiwa mítọn lẹ go ya? (Hia Yẹwhehodọtọ 7:21, 22.) Na taun tọn, mí nọ dopẹ́ na homẹdagbe Klisti tọn he whàn ẹn nado bẹ sinsẹ̀n-basitọ nugbo lẹ pli to kọndopọ mẹ. (Kol. 3:15) Mímẹpo wẹ yiwanna Jiwheyẹwhe dopolọ bo nọ lá owẹ̀n dopolọ bosọ nọ pehẹ avùnnukundiọsọmẹnu dopolọ lẹ. Gbọn homẹdagbe po owanyi po yíyí do jona ode awetọ dali, mí nọ yidogọna pọninọ agun lọ tọn bọ nukun mítọn nọ to ale ogbẹ̀ tọn lọ ji.

10, 11. (a) Naegbọn awuwhàn do ylan taun? (b) Nawẹ mí gán wagbọn bọ awuwhàn ma na hò ahọsumẹ lọ yí sọn mí si?

¹⁰ Apajlẹ avase tọn he to Biblu mẹ lẹ nọ flinnu mí dọ awuwhàn sọgan hò ale lọ yí sọn mí si. Di dohia, Kaini whànwu nọvisunnu etọn Abẹli bo hù i. Kola, Datani po Abilami po whànwu Mose bo diọnukunsọ ẹ. Podọ, Ahọlu Sauli whànwu Davidi na nuwadotana etọn lẹ wutu bo tẹnpọn nado hù i. Abajọ Ohó Jiwheyẹwhe tọn do dọmọ: “Fidepope he awuwhàn po wiwọ́ po te, finẹ wẹ bẹwlu po nuylankan lẹpo po na te ga.”—Jak. 3:16.

¹¹ Eyin mí wleawuna owanyi po homẹdagbe po to ahun mítọn mẹ, mí ma na yawu joawuna awuwhàn. Ohó Jiwheyẹwhe tọn dọmọ: “Owanyi nọ fahomẹ bo nọ yin homẹdagbenọ. Owanyi ma nọ whànwu.” (1 Kọl. 13:4) Nado glọnalina awuwhàn bọ e ma na doadọ̀do to ahun mítọn mẹ, mí dona dovivẹnu nado nọ pọ́n nulẹ hlan dile Jiwheyẹwhe nọ wà do bo nọ mọ mẹmẹsunnu po mẹmẹyọnnu mítọn lẹ po taidi hagbẹ agbasa dopolọ tọn, yèdọ agun Klistiani tọn. Ehe na gọalọna mí nado nọ vẹawu ode awetọ to kọndopọ mẹ hẹ ayinamẹ gbọdo lọ he dọmọ: “Eyin awutugonu dopo yin gigopana, awutugonu he pò lẹpo nọ jaya hẹ ẹ.” (1 Kọl. 12:16-18, 26) Enẹwutu, kakati nado whànwu, mí na nọ jaya to whenue mẹdevo lẹ mọ dona lẹ yí. Lẹnnupọndo apajlẹ Jonatani, visunnu Ahọlu Sauli tọn ji. Ewọ ma whànwu to whenue Davidi yin dide taidi mẹhe na hẹ ofìn ji to otọ́ etọn godo. Kakatimọ, e na tuli Davidi. (1 Sam. 23:16-18) Be mí gán nọ do homẹdagbe po owanyi po hia di Jonatani ya?

12. Ayinamẹ Owe-wiwe tọn tẹwẹ na gọalọna mí nado mọ ale lọ yí taidi whẹndo de?

¹² Nunọwhinnusẹ́n Biblu tọn lẹ yíyí do yizan mẹ sọgan hẹn jijọho po ayajẹ po wá na whẹndo de bo gọalọna yé nado mọ ale lọ yí. Ayinamẹ Owe-wiwe tọn he gando whẹndo go tẹlẹ wẹ Paulu na Klistiani Kolosi tọn lẹ? E dọmọ: “Mì asi lẹ emi, mì nọ yin mẹmẹglọ na asu mìtọn lẹ, dile e jẹ do to Oklunọ mẹ. Mì asu lẹ emi, mì nọ yiwanna asi mìtọn lẹ bo ma nọ gblehomẹ sinsinyẹn do yé go blo. Mì ovi lẹ emi, mì nọ setonuna mẹjitọ mìtọn lẹ to nulẹpo mẹ, na ehe wẹ nọ hẹn homẹ Oklunọ tọn hùn. Mì otọ́ lẹ emi, mì ma nọ hẹn homẹgble ovi mìtọn lẹ blo, na yé nikaa gbọjọ.” (Kol. 3:18-21) Matin ayihaawe, mí na kọngbedopọ dọ ayinamẹ gbọdo Paulu tọn hihodo na gbẹ́ hẹn ale wá na asu po asi po gọna ovi lẹ to egbehe.

13. Nawẹ asi Klistiani de sọgan dọ̀n asu mayisenọ etọn gbọn?

¹³ Eyin asi de wẹ a yin bo nọ mọdọ asu towe he yin mayisenọ ma to nuyiwa hẹ we to aliho he sọgbe mẹ lo? Be ninọmẹ lọ na pọnte eyin a nọ to jlẹdọ gando walọ etọn go ya? Eyin a tlẹ penugo bo hẹn ẹn nado wà nuhe dín a te, be mọwiwà na dọ̀n ẹn wá nugbo mẹ ya? E na vẹawu. Ṣigba, eyin a nọ na sisi tatọ́-yinyin asu towe tọn, a sọgan yidogọna jijọho to whẹndo lọ mẹ bo hẹn pipà wá na Jehovah, podọ enẹ tlẹ gán sọ dọ̀n asu towe wá sinsẹ̀n-bibasi nugbo mẹ; gbọnmọ dali mì omẹ awe lẹ sọgan mọ ale lọ yí.—Hia 1 Pita 3:1, 2.

14. Etẹwẹ asu Klistiani de dona wà eyin asi etọn he yin mayisenọ ma nọ na ẹn sisi?

 ¹⁴ Eyin asu de wẹ a yin bo nọ mọdọ asi towe he yin mayisenọ ma nọ na sisi we lo? Be a na hẹn ẹn nado na we sisi dogọ eyin a nọ dawhá dota na ẹn nado dohia dọ hiẹ wẹ yin ogán ya? Paali! Jiwheyẹwhe biọ to asi we nado nọ yí tatọ́-yinyin towe zan po owanyi po dile Jesu nọ wà do. (Efe. 5:23) Jesu nọ yí tatọ́-yinyin etọn zan do agun lọ ji to aliho owanyi po homẹfa po tọn mẹ. (Luku 9:46-48) Gbọn apajlẹ Jesu tọn hihodo dali, asu de sọgan dọ̀n asi etọn wá sinsẹ̀n-bibasi nugbo mẹ.

15. Nawẹ mẹmẹsunnu de dona nọ do owanyi hia asi etọn gbọn?

¹⁵ Ayinamẹ yin nina asu lẹ dọmọ: “Mì asu lẹ emi, mì nọ yiwanna asi mìtọn lẹ bo ma nọ gblehomẹ sinsinyẹn do yé go blo.” (Kol. 3:19) Asu owanyinọ de nọ doyẹyigona asi etọn gbọn todidoai na linlẹn etọn po hinhẹn ẹn deji dọ nuhe e dọ lẹ yin nujọnu to nukun emitọn mẹ po dali. (1 Pita 3:7) Dile etlẹ yindọ e ma gán nọ wà nuhe yọnnu lọ jlo to whelẹponu, e nọ saba basi nudide he sọgbe hẹ lẹnpọn dagbe lẹ gbọn linlẹn etọn kinkanse dali. (Howh. 15:22) Asu owanyinọ de nọ tindo sisi asi etọn tọn na e dovivẹnu nado jẹna wutu, e ma yin na e hẹn ẹn gánnugánnu nado si i wutu. Eyin asu de yiwanna asi etọn po ovi etọn lẹ po, e yọnbasi taun dọ whẹndo etọn ni sẹ̀n Jehovah to ayajẹ mẹ bo mọ ale ogbẹ̀ tọn lọ yí.

16, 17. Taidi jọja de, nawẹ a sọgan dapana homẹgble zẹjlẹgo do mẹjitọ towe lẹ go gbọn?

¹⁶ Eyin jọja aflanmẹ de wẹ a yin bo nọ mọdọ mẹjitọ towe he yin Klistiani lẹ ma nọ mọnukunnujẹ numọtolanmẹ towe lẹ mẹ bosọ nọ glọnalina we lo? Flumẹjijẹ towe tlẹ sọgan zọ́n bọ a na nọ kanse dewe eyin Jehovah sinsẹ̀n wẹ yin aliho gbẹninọ tọn dagbe hugan lọ nugbo. Amọ́, eyin a dike bọ flumẹjijẹ hẹn we jogbe sọn Jehovah sinsẹ̀n mẹ, bleun wẹ a na wá mọdọ mẹdevo de ma nọ hò towe pọ́n sọ mẹjitọ towe he nọ dibusi Jiwheyẹwhe lẹ po hagbẹ agun towe tọn lẹ po.

¹⁷ Eyin mẹjitọ towe lẹ ma nọ wọhẹ we gbede, be a ma na kanse dewe dọ yé ka nọ hò towe pọ́n nugbonugbo ya? (Heb. 12:8) Amọ́, e yọnbasi dọ aliho he mẹ mẹjitọ towe lẹ nọ domẹplọnlọ gowe te wẹ nọ vẹna we. Kakati nado to adidu gando mẹplọnlọ wunmẹ he a mọyi lọ go, tẹnpọn bo kẹalọyi dọ nude janwẹ na ko zọ́n bọ yé do yinuwa to aliho enẹ mẹ. Enẹwutu, nọ fahomẹ bo nọ wà nuhe go a pé lẹpo ma nado gblehomẹ zẹjlẹgo do nugbẹnamẹ yetọn go. Ohó Jiwheyẹwhe tọn dọmọ: “Mẹhe tindo oyọnẹn nọ de ohó pò, podọ mẹhe tindo wuntuntun na nọ gbọṣi abọẹ.” (Howh. 17:27) Yí do basi yanwle towe nado lẹzun Klistiani he whèwhín bo sọgan kẹalọyi ayinamẹ po homẹfa po bosọ mọaleyi sọn e mẹ, kakati nado to nuhà zẹjlẹgo gando aliho he mẹ ayinamẹ lọ yin nina te go. (Howh. 1:8) Dona de wẹ e yin nado tindo mẹjitọ yisenọ he yiwanna Jehovah nugbonugbo lẹ. Matin ayihaawe, ojlo yetọn wẹ nado gọalọna we nado mọ ale ogbẹ̀ tọn lọ yí.

18. Naegbọn a do magbe nado ze nukun towe do ale lọ ji?

¹⁸ Ayihamẹlinlẹnpọn do ale he to nukọnna mí lọ ji—vlavo ogbẹ̀ jọmaku to olọn mẹ kavi ogbẹ̀ madopodo to paladisi mẹ to aigba ji—nọ hẹn awuji mí taun. Todido dejidego de wẹ ehe bo sinai do opagbe he Mẹdatọ lọ lọsu do tlọlọ ji. Jiwheyẹwhe dọ gando Paladisi aigba ji tọn go dọmọ: “E họnwun dọ aigba na gọ́ na oyọnẹn Jehovah tọn.” (Isa. 11:9) Mẹhe na nọgbẹ̀ to aigba ji to whenẹnu lẹpo wẹ na nọ yin pinplọn gbọn Jiwheyẹwhe dali. Ale he jẹna vivẹnudido de wẹ ehe yin nugbo. Enẹwutu, ze ayiha towe do opagbe he Jehovah do lẹ ji bo ma dike nudepope ni hò ale lọ yí sọn asi we blo!