SỌN hohowhenu gbọ́n wẹ avọ́sinsan lẹ ko yin adà tangan sinsẹ̀n-bibasi nugbo tọn de. Islaelivi lẹ nọ basi avọ́sinsan kanlin tọn lẹ, podọ Klistiani lẹ yin yinyọnẹn na “avọ́sinsan pipà tọn” he yé nọ basi lẹ. Etomọṣo, avọ́sinsan wunmẹ devo lẹ sọ tin he go Jiwheyẹwhe nọ hùnhomẹ do taun. (Heb. 13:15, 16) Avọ́sinsan ehelẹ nọ hẹn ayajẹ po dona lẹ po wá, dile apajlẹ he bọdego lẹ dohia do.

Hanna he yin devizọnwatọ nugbonọ hohowhenu tọn de jlo vẹkuvẹku nado ji visunnu de, ṣigba e ma penugo nado jivi. E dopà na Jehovah to odẹ̀ mẹ dọ eyin emi penugo bo ji visunnu de, emi na “yí i na Jehovah to gbẹzan etọn lẹpo mẹ.” (1 Sam. 1:10, 11) To nukọn mẹ, Hanna wá mọhò bo ji visunnu de he nọ yin Samuẹli. To whenue Hanna ko deanọ́na Samuẹli godo, e plan ẹn yì gòhọtúntún mẹ, kẹdẹdile e ko dopà etọn do. Jehovah dona Hanna na gbigbọ mẹde-yido-sanvọ́ tọn etọn. E tindo lẹblanulọkẹyi lọ nado ji ovi atọ́n devo lẹ, bọ Samuẹli sọ lẹzun yẹwhegán podọ dopo to Biblu kantọ lẹ mẹ.—1 Sam. 2:21.

Taidi Hanna po Samuẹli po, Klistiani lẹ lọsu tindo lẹblanulọkẹyi lọ to egbehe nado yí ogbẹ̀ yetọn do wà sinsẹ̀nzọn na Mẹdatọ yetọn. Jesu dopà dọ mí na mọ ahọsumẹ yí to gigọ́ mẹ na avọ́sinsan depope he mí basi nado sẹ̀n Jehovah.—Malku 10:28-30.

To owhe kanweko tintan whenu, mẹmẹyọnnu de he nọ yin Dọlka yin yinyọnẹn na “azọ́n dagbe lẹ po nunina lẹblanu tọn” etọn lẹ po—enẹ wẹ avọ́sinsan he e nọ basi nado gọalọna mẹdevo lẹ. Ṣigba, e blawu dọ “e jẹazọ̀n bo kú,” bọ ehe hẹn agun lọ pete biọ awubla mẹ. To whenue devi lẹ sè dọ Pita ma dẹn do finẹ, yé vẹ̀ ẹ dọ ni wá to afọdopolọji. Yí nukun homẹ tọn do pọ́n lehe yé na ko gọ́ na ayajẹ do to whenue Pita fọ́n Dọlka sọnku—yèdọ fọnsọnku tintan he yin bibasi gbọn apọsteli de dali to Owe-wiwe lẹ mẹ! (Owalọ 9:36-41) Jiwheyẹwhe ma wọn avọ́sinsan Dọlka tọn lẹ. (Heb. 6:10) Nuyiwa alọtútlú tọn etọn lẹ yin kinkandai to Ohó Jiwheyẹwhe tọn mẹ taidi apajlẹ dagbe de na mí nado hodo.

To aliho dopolọ mẹ, apọsteli Paulu ze apajlẹ dagbe dai na nuhe dù whenu po ayidonugo etọn po nina mẹdevo lẹ. E kanwehlan mẹmẹsunnu etọn he to Kọlinti lẹ dọmọ: “Na yẹn tọn, yẹn na yí ayajẹ do yí dee zan bo na yí dee zan to gigọ́ mẹ na mì.” (2 Kọl. 12:15) Paulu plọn sọn numimọ mẹ dọ mẹdetiti yíyí do sanvọ́ do mẹdevo lẹ tamẹ nọ hẹn ayajẹ wá, podọ hú popolẹpo, e nọ hẹnmẹ tindo dona po nukundagbe Jehovah tọn po.—Owalọ 20:24, 35.

E họnwun dọ homẹ Jehovah tọn nọ hùn eyin mí yí whenu po huhlọn mítọn po zan nado nọgodona nuhe gando Ahọluduta lọ go lẹ bo gọalọna yisenọ hatọ lẹ. Ṣigba, be aliho devo lẹ tin nado nọgodona azọ́n yẹwhehodidọ Ahọluduta lọ tọn ya? Mọwẹ! Gbọnvona tuklajijẹ owanyi tọn mítọn, mí gán yí nunina sọn ojlo mẹ wá mítọn lẹ do gbògbéna Jiwheyẹwhe. Nunina enẹlẹ nọ yin yiyizan do azọ́n yẹwhehodidọ lẹdo aihọn pé tọn lọ tamẹ, ehe bẹ nukunpipedo mẹdehlan po mẹdevo he to sinsẹ̀nzọn whenu-gigọ́ tọn vonọtaun mẹ lẹ po go hẹn. Humọ, nunina sọn ojlo mẹ wá mítọn lẹ sọ nọ yin yiyizan nado wleawuna owe lẹ po video lẹ po bo basi lẹdogbedevomẹ yetọn, nado gọalọna mẹhe go nugbajẹmẹji jọ do lẹ, podọ nado gbá Plitẹnhọ Ahọluduta tọn yọyọ lẹ. Mí sọgan kudeji dọ “mẹhe yin alọtlútọ na nọ yin didona.” Hú popolẹpo, mí nọ gbògbéna Jehovah to whenue mí na ẹn nuhọakuẹ mítọn lẹ.—Howh. 3:9; 22:9.