Dagbe po Oylan po: Nudide de He A Dona Basi
Nujinọtedo walọ dagbe tọn he mí nọ de nado nọgbẹ̀ sọgbe hẹ lẹ na yinuwa do gbẹzan mítọn ji to aliho ayidego tọn mẹ. Jehovah Jiwheyẹwhe yọ́n ehe ganji. Nue zọ́n niyẹn bọ e do jlo dọ mí ni nọ nọgbẹ̀ sọgbe hẹ nujinọtedo emitọn lẹ.
Jehovah jlo dọ mí ni do jijọho po ayajẹ po to gbẹ̀mẹ.
“Yẹn Jehovah wẹ Jiwheyẹwhe towe, Mẹhe nọ plọn we nado zan gbẹzan he na hẹn ale wá na we, Mẹhe nọ deanana we to aliho he ji hiẹ dona zinzọnlin gbọn. Eyin hiẹ na yìn gbedide ṣie lẹ wẹ! To whenẹnu, jijọho towe na wá taidi tọ̀sisa de bọ dodowiwa towe na wá taidi agbówhẹn ohù tọn lẹ.”—Isaia 48:17, 18.
Taidi Mẹdatọ mítọn, Jiwheyẹwhe yọ́n aliho dagbe hugan he mẹ mí dona nọgbẹ́ te. E jlo dọ mí ni hodo anademẹ emitọn, na e na yin dagbe na mí wutu. Eyin mí setonuna gbedide Jiwheyẹwhe tọn lẹ, e ma na biọ dọ mí ni kanse míde eyin vlavo nudide mítọn na hẹn ale wá kavi lala. Mí na nọ basi nudede he sọgbe lẹ to whelẹponu, yèdọ dehe nọ hẹn jijọho po ayajẹ po wá lẹ.
Jehovah ma nọ biọ nuhe zẹ̀ huhlọn mítọn go sọn mí si.
“Gbedide ehe, he yẹn to nina we to egbé ma vẹawuna we zẹjlẹgo, mọjanwẹ e ma dẹn do we do niyẹn.”—Deutelonomi 30:11.
Gbẹninọ sọgbe hẹ nujinọtedo walọ dagbe tọn Jiwheyẹwhe tọn lẹ gán biọ dọ mí ni diọ aliho he mẹ mí no lẹnnupọn bosọ nọ yinuwa te. Etomọsọ, Jehovah ma nọ biọ nususu zẹjlẹgo sọn mí si. To popolẹpo mẹ, taidi Mẹdatọ mítọn, e yọ́n nuhe mí penugo nado wa lẹ. Podọ, dile mí wá yọ́n Jehovah, mí na mọdọ “gbedide etọn lẹ ma pẹnagbànme.”—1 Johanu 5:3.
Jehovah dopà nado gọalọna mẹhe de nado nọgbẹ̀ sọgbe hẹ nujinọtedo etọn lẹ.
“Yẹn, Jehovah Jiwheyẹwhe towe, yẹn na hẹn adusilọ towe go, yèdọ Mẹhe to didọna we dọ, ‘A dibu blo. N’na gọalọna we.’”—Isaia 41:13.
Mí gán nọgbẹ̀ sọgbe hẹ nujinọtedo walọ dagbe tọn Jiwheyẹwhe tọn lẹ, na ewọ na gọalọna mí wutu. Ewọ gán yí Ohó etọn Biblu zan nado gọalọna mí, ehe nọ na mí tuli po todido po.
Gbẹtọ livi susu lẹdo aihọn pé wẹ mọdọ gbẹninọ sọgbe hẹ nujinọtedo Biblu tọn lẹ ko hẹn gbẹzan yetọn lẹ pọnte. Naegbọn a ma na plọnnu dogọ gando ayinamẹ dagbe he to Biblu mẹ lẹ go? A gán bẹjẹeji po alọnuwe lọ Duvivi Ogbẹ̀ Tọn Kakadoi! po, ehe tin-to-aimẹ vọnu to jw.org ji. E bẹ nupinplọn ehelẹ hẹn:
-
Nawẹ Biblu Sọgan Gọalọna We Gbọn?
-
Biblu Nọ Namẹ Todido
-
Be A Gán Dejido Biblu Go Ya?
Dile a to dogbapọnna Ohó Jiwheyẹwhe tọn Biblu, a na mọdọ nuhe to e mẹ lẹ gbẹ́ yọ́n-na-yizan bọ yè “sọgan ganjẹ yé go to whepoponu, yèdọ todin podọ kakadoi.” (Salmu lẹ 111:8) Nujinọtedo walọ dagbe tọn he to Biblu mẹ lẹ hihodo wẹ yin aliho gbẹninọ tọn dagbe hugan lọ. Amọ́, Jiwheyẹwhe ma na hẹn mí po huhlọn po nado wàmọ. (Deutelonomi 30:19, 20; Jọṣua 24:15) Nudide de wẹ he dopodopo mítọn dona basi.
