HOSỌ HE JẸNUKỌN | ANGẸLI LẸ—BE YÉ TIN YA? NUHEWUTU E DO YIN NUJỌNU
Angẹli lẹ—Be Yé Sọgan Yinuwado Jiwe Ya?
To Sẹgbe whèmẹ dopo, Kenneth po Filomena po, he nọ nọ̀ Curaçao yì dla asu po asi po he yé nọ plọn Biblu hẹ de pọ́n.
“Whenue mí jẹ dọ́n,” wẹ Kenneth dọ, “ohọ̀n lọ to súsú bọ mọto yetọn ma to finẹ. Amọ́, ayiha ṣie dọna mi dọ ma ylọ alokan asi lọ tọn.”
Yọnnu lọ yí alokan lọ bo dọ dọ asu emitọn yì azọ́nmẹ. Ṣigba, to whenue nawe lọ doayi e go dọ Kenneth po Filomena po to ohọ̀n ji, e wá hùnhọ̀n na yé bo dọ yé ni biọ họmẹ.
Tlolo wẹ yé doayi e go dọ avivi wẹ e te dai. Dile Kenneth hodẹ̀ na yé nido bẹ oplọn lọ jẹeji, nawe lọ gọjẹ avivi ji. Enẹwutu, Kenneth po Filomena po kàn nuhe to jijọ sè e.
Nawe lọ basi zẹẹmẹ dọ emi ko basi tito nado hù emide to whèmẹ enẹ bo to wekanhlanmẹ mẹdetiti hùhù tọn kàn dai na asu emitọn bọ oylọ Kenneth tọn wẹ doalọtena emi. E dọna yé dọ emi nọ jẹflumẹ sinsinyẹn, enẹwutu yé má linlẹn tulinamẹ tọn delẹ hẹ ẹ sọn Biblu mẹ. Tulinamẹ enẹ wẹ whlẹn ogbẹ̀ etọn.
“Mí dopẹna Jehovah na e dike bọ mí gọalọna nawe he jẹflumẹ enẹ,” wẹ Kenneth dọ, “podọ titengbe na e sisẹ́ mí—vlavo gbọn angẹli de kavi gbigbọ wiwe Etọn gblamẹ—nado ylọ ẹ!” *
Be owhẹ̀ Kenneth po Filomena po tọn whẹ́n nado lẹndọ Jiwheyẹwhe wẹ dademẹ, vlavo gbọn angẹli de kavi gbigbọ wiwe, yèdọ huhlọn-yido-wazọ́n Etọn gblamẹ ya? Kavi be kosọ de poun wẹ oylọ Kenneth tọn yin ya?
Mí ma sọgan dọ taun. Ṣigba, nuhe mí yọnẹn wẹ yindọ Jiwheyẹwhe nọ yí angẹli lẹ zan nado gọalọna gbẹtọ lẹ to gbigbọ-liho. Di apajlẹ, Biblu dọ dọ Jiwheyẹwhe yí angẹli de zan nado deanana Filipi he yin Klistiani wẹndagbe-jlatọ de nado gọalọna ahọluzọnwatọ Etiopianu de he to anademẹ gbigbọmẹ tọn dín.—Owalọ lẹ 8:26-31.
Sinsẹ̀n susu wẹ nọ plọnmẹ dọ nudida gbigbọnọ mayinukundomọ lẹ tin, bọ delẹ nọ yin zẹẹmẹ-basina taidi nudida homẹdagbenọ he nọ wà ojlo Jiwheyẹwhe tọn lẹ kavi mẹhe nọ basi hihọ́na dopodopo mítọn lẹ. Mẹsusu yise dọ angẹli lẹ tin bosọ yise dọ nudida gbigbọnọ enẹlẹ nọ yinuwado yé ji to aliho dagbe mẹ. Etomọṣo, mẹsusu devo lẹ ma yise paali dọ angẹli lẹ tin.
Be angẹli lẹ tin nugbonugbo ya? Eyin mọ wẹ, fie wẹ yé wá sọn? Etẹwẹ yin nugbo lọ gando angẹli lẹ go? Be yé sọgan yinuwado jiwe ya? Mì gbọ mí ni gbadopọnna kunnudenu lẹ.
^ huk. 8 Jehovah wẹ oyín Jiwheyẹwhe tọn dile Biblu dohia do.—Salmu lẹ 83:18.
