MÍ NI dọ dọ a to zọnlinzin gbọn ali he dozinvlu de ji to zánmẹ. Mahopọnna dọ ozán ko kú, a ma dibu, na a tindo tọṣi he nọ mọnú ganji de to alọ mẹ. Eyin a tá ẹ hlan kọmẹ, a nọ mọ nuhe to nukọn towe lẹ hezeheze. Podọ eyin a tá ẹ hlan nukọn, a nọ mọnú hlan fidindẹn.

To aliho de mẹ, Biblu taidi tọṣi enẹ. Dile mí mọ do to hosọ he wayi lẹ mẹ, Ohó Jiwheyẹwhe tọn sọgan gọalọna mí nado duto nuhahun he mí to pipehẹ todin lẹ ji—enẹ wẹ nuhahun egbesọ tọn lẹ he mẹlẹpo to pipehẹ to aihọn he ma tindo jide ehe mẹ. Amọ́, Biblu sọ nọ wà onú devo ga. E sọ nọ gọalọ nado mọnú hlan sọgodo nado yọ́n aliho he mí na hodo bo tindo ayajẹ po pekọ tẹgbẹ tọn po. (Salmu lẹ 119:105) Gbọnna?

Gbọ mí ni gbadopọnna aliho awe delẹ he mẹ Biblu nọ gọalọna mí nado tindo todido na sọgodo te: 1 E nọ gọalọna mí nado yọ́n nuhewutu mí do togbẹ̀, podọ 2 e nọ plọn mí lehe mí na jihọntọn hẹ Mẹdatọ mítọn kakadoi do.

Biblu na mí ayinamẹ dagbe lẹ nado duto nuhahun mítọn lẹ ji, etomọṣo e ma yin owe ayinamẹ tọn de poun. Biblu ma na mí tuli nado nọ ze ayiha do nuhahun mítọn lẹ kẹdẹ ji, kakatimọ e plọn mí nado nọ mọnú zẹ̀ yé go. Enẹ wẹ na zọ́n bọ mí na tindo pekọ to gbẹ̀mẹ.

Di apajlẹ, pọ́n hogbe Biblu tọn ehelẹ, he dọmọ: “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Be a sọgan flin whenue a nanú mẹde ya? Kavi vlavo whenue a dotoaina mẹde bọ e dọ nuhahun etọn lẹ na we ya? Be homẹ towe ma hùn dọ a gọalọna mẹdevo ya?

 Mí nọ mọ ayajẹ daho hugan yí to whenue mí nanúmẹ bo ma donukun ale de. Wekantọ dopo dọmọ: “Eyin yè nanúmẹ, yè ma nọ nọma mọaleyi hugan nuhe yè namẹ—titengbe eyin yè wàmọ bo ma donukun ale de.” Amọ́, eyin mí nanúmẹ—titengbe mẹhe ma gán penugo nado suahọ etọn mí lẹ—mí nọ mọ ahọsumẹ de yí dandan. Mí nọ lẹzun apadewhe pọngbọ lọ tọn. Gbọnmọ dali, mí to azọ́nwadopọ hẹ Mẹdatọ mítọn, he nọ pọ́n walọ dagbe mọnkọ lẹ hlan taidi ahọ́ de he e na sú mí. (Howhinwhẹn lẹ 19:17) E nọ yọ́n pinpẹn nuhe mí wà na agbátọnọ lẹ tọn taun, podọ e dopagbe nado yí ogbẹ̀ madopodo to paladisi mẹ to aigba ji do suahọ etọn mí—yèdọ todido nujọnu tọn de na sọgodo!—Salmu lẹ 37:29; Luku 14:12-14. *

Humọ, Biblu plọn mí dọ mí sọgan yọ́n nuhewutu mí do togbẹ̀ eyin mí nọ sẹ̀n Jiwheyẹwhe nugbo lọ, Jehovah. Ohó etọn na tuli mí nado nọ na ẹn pipà po gbégbò he e jẹna po bo nọ setonuna ẹn. (Yẹwhehodọtọ 12:13; Osọhia 4:11) Eyin mí wàmọ, mí nọ wà nudagbe de dotana, enẹ wẹ yindọ: Homẹ Mẹdatọ mítọn tọn nọ hùn do mí go. Ohó etọn na tuli mí dọmọ: “Yin nuyọnẹntọ bo hẹn homẹ ṣie hùn.” (Howhinwhẹn lẹ 27:11) Yí nukun homẹ tọn do pọ́n—eyin mí hodo anademẹ Biblu tọn lẹ bo yí nuyọnẹn do basi nudide, mí nọ hẹn homẹhun Otọ́ owanyinọ mítọn olọn mẹ tọn. Etẹwutu? Na e nọ hò mítọn pọ́n bo jlo dọ mí ni hodo anademẹ etọn lẹ nado mọaleyi. (Isaia 48:17, 18) Nado dọ hójọhó, etẹwẹ nasọ namẹ ayajẹ hugan nado sẹ̀n Nupojipetọ wẹkẹ lọ tọn bo nọgbẹ̀ to aliho he na hẹn homẹ etọn hùn mẹ?

Biblu sọ plọn mí nado jihọntọn hẹ Mẹdatọ mítọn. Owe-wiwe lẹ dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.” (Jakọbu 4:8) To whedelẹnu, mí sọgan tindo ayihaawe eyin e yọnbasi nado jihọntọn hẹ Mẹdatọ ganhunupotọ lọ nugbonugbo. Amọ́, Biblu na mí jide dọ eyin mí “dín Jiwheyẹwhe,” mí na “mọ ẹn nugbonugbo,” na “ewọ ma dẹn do dopodopo mítọn.” (Owalọ lẹ 17:27) Ayinamẹ dagbe taun wẹ Biblu na gando họntọnjiji hẹ Jiwheyẹwhe na sọgodo mítọn wutu go. To aliho tẹ mẹ?

Lẹnnupọndo ehe ji: Mahopọnna vivẹnu depope he mí na do, depope to mí mẹ ma sọgan họ̀ngán sọn kẹntọ godo tọn—yèdọ okú si. (1 Kọlintinu lẹ 15:26) Amọ́, Jiwheyẹwhe yin madopodo. E ma na kú gbede, podọ e jlo dọ họntọn etọn lẹ lọsu ni nọgbẹ̀ kakadoi. Biblu yí hogbe he bọawu bo gọ́ na zẹẹmẹ ehelẹ zan nado do nuhe Jehovah nọ jlo na mẹhe to dindin in lẹ hia dọmọ: “Na hiẹ ni duvivi ogbẹ̀ tọn kakadoi.”—Salmu lẹ 22:26.

Nawẹ a sọgan jihọntọn hẹ Jiwheyẹwhe kakadoi gbọn? Nọ hia Ohó etọn, Biblu nado plọnnu gando ewọ go. (Johanu 17:3; 2 Timoti 3:16) Nọ dín alọgọ etọn nado mọnukunnujẹ Owe-wiwe lẹ mẹ. Biblu na mí jide dọ eyin mí nọ to nuyọnẹn ‘biọ Jiwheyẹwhe zọnmii,’ ewọ na na mí. * (Jakọbu 1:5) Humọ, dovivẹnu nado yí nuhe a plọn lẹ do yizan mẹ, bo dike Ohó Jiwheyẹwhe tọn ni yin “miyọ́ngbán de na afọ” towe podọ “hinhọ́n de na ali” towe—todin podọ kakadoi.—Salmu lẹ 119:105.