Delphine, he yin nùdego to hosọ he wayi mẹ dọ dọ nuhahun emitọn lẹ zọ́n bọ emi ko dibla tlọ biọ ahàn sinsinyẹn ṣiṣizan mẹ. Biblu ma jẹagọdo ahàn sinsinyẹn nùnù do jlẹkaji, amọ́ e dọmọ: “A tin to mẹhe nọ nù ovẹn susu lẹ ṣẹnṣẹn blo.” (Howhinwhẹn lẹ 23:20) Ahàn sinsinyẹn ṣiṣizan nọ hẹn azọ̀n sinsinyẹn lẹ wá, nọ hẹn haṣinṣan lẹ gble bo nọ dekọtọn do okú azán mape tọn mẹ na gbẹtọ livi susu lẹ to whemẹwhemẹ. Gbẹtọ lẹ sọgan ko dapana susu nuhahun ehelẹ tọn eyin yé ko hodo ayinamẹ nuyọnẹn tọn he Biblu na lẹ.

Nuhe Delphine wà niyẹn. E wá dọ todin dọmọ: “N’mọdọ ahàn sinsinyẹn ma de nuhahun ṣie lẹ sẹ̀. N’yí ayinamẹ nuyọnẹn tọn he tin to Filipinu lẹ 4:6, 7 mẹ do yizan mẹ, ehe dọmọ: ‘Mì yin magbọjẹnọ na nudepope blo, ṣigba mì nọ hẹn obiọ mìtọn lẹ zun yinyọnẹn na Jiwheyẹwhe.’ Eyin linlẹn agọ̀ lẹ jẹ finfọn ji to zánmẹ bo jẹ magbọjẹ do na mi ji, n’nọ hodẹ̀ hlan Jehovah. N’nọ dọ numọtolanmẹ ṣie lẹpo na ẹn, yèdọ adi, flumẹjijẹ po awubla ṣie lẹ po, bo nọ vẹ̀ ẹ nado gọalọna mi nado wleawuna pọndohlan dagbe. To wunkẹngbe, n’nọ tẹnpọn nado wọnji numọtolanmẹ enẹ lẹpo go. Aṣa enẹ gọalọna mi nado nọ ze ayiha do nuhe n’tindo lẹ ji kakati nido yin do nuhe n’ma tindo lẹ ji. N’basi dide ma nado nù ahàn sinsinyẹn gbede ba. Na jijọho he n’wá tindo lọ họakuẹ na mi taun wutu, n’masọ jlo na hẹn ẹn bu.”

Fẹnnuwiwa yin dopo to nuhe nọ hẹn flumẹjijẹ po awubla po wá hugan lẹ mẹ. Amọ́, anademẹ Biblu tọn lẹ sọgan gọalọna mí nado dapana nuhahun mọnkọ lẹ eyin mí duto nuhe nọ hẹnmẹ jẹ fẹnnuwiwa kọ̀n lẹ ji—di apajlẹ, aihun gblewa tọn po yẹdide fẹnnuwiwa tọn lẹ po. “E bọawu nado jẹ aihun gblewa tọn dà ji,” wẹ jọja de he nọ yin Samuel dọ. “To whedelẹnu, onú mẹlọ tọn ma nọ jẹ ṣie ji, amọ́ n’gán mọdọ e tindo ojlo na mi—bọ ehe nọ zọ́n bọ n’nọ jẹ aihun gblewa tọn dà ji.” Samuel mọdọ yè nọ saba sawhẹ aihun gblewa tọn dokọna ẹn, to whenue e ma tlẹ ko do linlẹn mọnkọ, bọ ehe nọ zọ́n bọ e nọ gbọ bo nọ jẹ aihun gblewa tọn dà ji. Amọ́, walọ enẹ dotukla ẹ taun. E wá dọmọ: “Nuylankan wẹ, na e nọ zọ́n bọ yè nọ wleawuna ojlo ṣejannabi tọn.”

Whenue Samuel hia hosọ de to nọtẹn Intẹnẹt tọn jw.org ji, enẹ hẹn ẹn nado lẹnnupọndo Howhinwhẹn lẹ 20:11 ji, he dọmọ: “Etlẹ yin yọpọvu [kavi “yọpọ sunnu,” nudọnamẹ odò tọn] de wẹ, gbọn nuyiwa etọn lẹ dali wẹ e nọ yin yinyọnẹn, eyin walọ etọn lẹ wé-ṣeke bo sọgbe.” Nawẹ enẹ gọalọna ẹn gbọn? Samuel wá mọdọ aihun gblewa tọn ma yin walọ dagbe mọ e masọ sọgbe. E dọmọ: “N’sọ wá mọdọ eyin jọja de nọ daihun gblewa tọn, e ma na wá yin alọwlemẹ dagbe. N’jẹ nulẹnpọn do nuhe na wá yin numọtolanmẹ asi sọgodo tọn ṣie tọn ji eyin e mọdọ n’to aihun gblewa tọn dà hẹ yọnnu devo. Ehe zọ́n bọ n’wá mọdọ aṣa ylankan wẹ. Nugbo lọ dọ e nọ bọawu ma dohia dọ e sọgbe.” Samuel wá diọ. Didapana aihun gblewa tọn ko sọ gọalọna ẹn nado dapana fẹnnuwiwa.

Owù he mẹ Antonio uwọ tin te gando fẹnnuwiwa go tlẹ sọ sinyẹn humọ: E ko tlọ biọ yẹdide fẹnnuwiwa tọn pinpọn mẹ. Dile e tlẹ ko wlealọ hẹ yọnnu he e yiwanna ganji de, e gbẹ́ nọ joawuna walọyizan enẹ gbọzangbọzan. E dọ dọ nulinlẹnpọn do 1 Pita 5:8 ji gọalọna emi taun. Wefọ lọ dọmọ: “Mì gbọṣi lẹnpọn dagbenọ-yinyin mẹ, mì nọ aṣeji! Kẹntọ mìtọn Lẹgba to dindanpe di kinnikinni de he to lìlì bo to mẹhe e na tlẹndu dín.” Antonio dọmọ: “Yẹdide fẹnnuwiwa tọn tin to filẹpo, podọ yé gán gbọṣi ayiha mẹ namẹ. Wefọ enẹ gọalọna mi taun nado lẹnnupọndo fie whlepọn enẹlẹ nọ wá sọn ji. N’dona plọn nado nọ yawu flindọ Lẹgba dè wẹ yẹdide enẹlẹ nọ wá sọn. Todin, n’ko wá yọnẹn dọ Jehovah kẹdẹ wẹ gán gọalọna mi nado ‘gbọṣi lẹnpọn dagbenọ-yinyin mẹ bo nọ aṣeji’ nado sọgan duto whlepọn enẹlẹ ji to ayiha mẹ, to ahun mẹ podọ to alọwle ṣie mẹ.” Antonio mọ alọgọ he sin hudo e do yí bo ko gbẹ́ walọ ylankan enẹ dai pete. Enẹ ko sọ gọalọna ẹn nado dapana nuhahun he tlẹ ylan humọ lẹ.

E họnwun dọ Biblu bẹ ayinamẹ yọ́n-na-yizan lẹ hẹn he sọgan gọalọna mí nado dapana nuhahun sinsinyẹn lẹ. Amọ́, eyin nuhahun lọ lẹ ko doadọ̀do bo gbọṣi aimẹ lo? Gbọ mí ni pọ́n lehe Ohó Jiwheyẹwhe tọn sọgan gọalọna mí nado duto yé ji do.