LEHE MÍ GÁN GBAWHÀN WANGBẸNA TỌN DO
2 | Ma Nọ Yiahọsu Blo
Nuhe Biblu Plọn Mí:
“Mì nọ yí oylan do suahọ oylan tọn na mẹdepope blo. . . . Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo. . . . Mì yiahọsu na mìde blo, . . . na e ko yin kinkandai dọmọ: “‘Ṣie wẹ ahọsuyi; yẹn na suahọ etọn,’ wẹ Jehovah dọ.”—LOMUNU LẸ 12:17-19.
Nuhe E Zẹẹmẹdo:
Dile etlẹ yindọ jọwamọnu wẹ e yin nado gblehomẹ to whenue mẹde yinuwa hẹ mí to aliho he ma sọgbe mẹ, Jiwheyẹwhe ma nọ yigbena dọ mí ni yiahọsu. Kakatimọ, e jlo dọ mí ni nọtepọn emi nado jla mawadodo lẹpo do to madẹnmẹ.—Salmu lẹ 37:7, 10.
Nuhe A Gán Wà:
Eyin gbẹtọvi lẹ yiahọsu, ehe nọ zọ́n bọ wangbẹna sọ nọ sinyẹn dogọ. Enẹwutu, to whenue mẹde ṣinuwa do we kavi gbleawuna we, ma yiahọsu blo. Tẹnpọn nado duto dewe ji, bo yinuwa to aliho he na yidogọna jijọho mẹ. To ninọmẹ delẹ mẹ, e gán pọnte hugan nado wọnji whẹho lọ go. (Howhinwhẹn lẹ 19:11) Na nugbo tọn, eyin a mọdọ e na jla nude do, a gán de nado dọhodo whẹho lọ ji. Di apajlẹ, eyin yè wadanu do gowe, a gán de nado jẹwhẹ na ponọ lẹ kavi aṣẹpatọ devo lẹ.
Mí na gbleawuna míde eyin mí yiahọsu
Bọ eyin e taidi dọ aliho de ma tin nado didẹ whẹho lọ to jijọho mẹ lo? Kavi etẹwẹ a na wà eyin a ko wà nuhe go a pé lẹpo nado didẹ nuhahun lọ to jijọho mẹ bọ e glo? Ma yiahọsu blo. Na enẹ gán hẹn ninọmẹ lọ vantan wutu. Kakatimọ, gbawhàn wangbẹna tọn. A gán plọn nado ganjẹ aliho he mẹ Jiwheyẹwhe na didẹ whẹho lọ te go. “Ganjẹ ewọ go, e nasọ yinuwado ota towe mẹ.”—Salmu lẹ 37:3-5.
A Gán Sọ Pọ́n Hosọ Ehelẹ
BIBLU NỌ DIỌ GBẸZAN MẸTỌN
N’jlo Na Hoavùn Sọta Mawadodo
Rafika biọ ogbẹ́ gufọntọ lẹ tọn de mẹ nado hoavùn sọta nuyiwa mawadodo tọn lẹ. Amọ́, e wá mọ opagbe he Biblu do dọ jijọho po whẹdida dodo po na tin to gandudu Ahọluduta Jiwheyẹwhe tọn glọ.
GBLỌNDO NA KANBIỌ SINAI DO BIBLU JI LẸ
Etẹwẹ Biblu Dọ Gando Ahọsuyiyi Go?
Ayinamẹ he to Biblu mẹ lẹ ko gọalọna mẹsusu nado duto ojlo lọ nado yiahọsu ji.
