1. 1. SATANI LẸGBA. Angẹli atẹṣitọ lọ Satani wẹ yin adọ̀ wangbẹna he mí nọ mọ to egbehe lẹ tọn. Jiwheyẹwhe na và Satani gọna mẹhe nọ gbẹwannamẹ taidi ewọ lẹ sudo mlẹnmlẹn.—Salmu lẹ 37:38; Lomunu lẹ 16:20.

2. 2. AIHỌN SATANI TỌN HE GỌ́ NA WANGBẸNA. Jiwheyẹwhe na de mẹhe nọ wà nuylankan to aihọn ehe mẹ lẹpo sẹ̀, kakajẹ tonudọtọ he nọ hòmẹdu lẹ gọna sinsẹ̀ngán he nọ fọ́n wangbẹna dote lẹ ji. Jiwheyẹwhe nasọ và ajọwatọ nukunkẹnnọ he nọ hòmẹdu bosọ nọ tafú gbẹtọvi lẹ sudo.—2 Pita 3:13.

3. 3. MAPE GBẸTỌVI TỌN. Biblu dọ dọ gbẹtọvi lẹpo wẹ dugu mape tọn, bo nọ saba do linlẹn po numọtolanmẹ agọ̀ lẹ po bosọ nọ yinuwa to aliho he ma sọgbe mẹ. (Lomunu lẹ 5:12) Delẹ to jijọ mọnkọ lẹ mẹ wẹ nado nọ hẹnmẹdohomẹ bosọ nọ yí hogbe wangbẹna tọn lẹ zan na mẹdevo lẹ. Jiwheyẹwhe na gọalọna gbẹtọvi lẹ nado sukúndona linlẹn po nuyiwa mape tọn lẹpo po, bọ wangbẹna na busẹ kakadoi.—Isaia 54:13.

1. 1. MẸDEPOPE MA NA JIYA MAWADODO TỌN. Ahọluduta Jiwheyẹwhe tọn he yin gandudu dodo tọn de to olọn mẹ wẹ na deanana aihọn-gbẹ̀ lọ kakadoi. (Daniẹli 2:44) Nuvẹun po pọndohlan hẹngogo tọn lẹ po ma nasọ tin ba. Jiwheyẹwhe na de mawadodo he gbẹtọvi lẹ nọ jiya etọn todin lẹpo sẹ̀.—Luku 18:7.

2. 2. MẸLẸPO NA TINDO JIJỌHO. Mẹdepope ma nasọ jiya na danuwiwa po awhàn po wutu ba. (Salmu lẹ 46:9) Aigba lọ na yin nọtẹn hihọ́ tọn de fie gbẹtọ he yiwanna jijọho lẹ kẹdẹ na nọ nọ̀.—Salmu lẹ 72:7.

3. 3. MẸLẸPO NA NỌGBẸ̀ KAKADOI TO NINỌMẸ HE YỌ́N TLALA LẸ MẸ. Mẹhe to aigba ji lẹpo na nọ do owanyi nujọnu tọn hia ode awetọ. (Matiu 22:39) Mẹdepope ma nasọ jiya ba, podọ linlẹn kavi oflin ylankan lẹ ma tlẹ nasọ wá ayiha mẹ namẹ ba. (Isaia 65:17) To whenẹnu, gbẹtọvi lẹ na vò sọn wangbẹna si, bo na “mọ awuvivi susu to jijọho susugege mẹ.”—Salmu lẹ 37:11.

Be e na jlo we nado nọgbẹ̀ to aihọn mọnkọ mẹ ya? Etlẹ yin todin, mẹsusu wẹ to pinplọn nado jo wangbẹna do bo nọgbẹ̀ sọgbe hẹ nunọwhinnusẹ́n Biblu tọn lẹ. (Salmu lẹ 37:8) Nuhe Kunnudetọ Jehovah tọn livi susu lẹ to wiwà lẹdo aihọn pé niyẹn. Dile etlẹ yindọ yé wá sọn aṣa po ninọmẹ he gbọnvo taun lẹ po mẹ, ogbè yetọn topọ́ bọ yé sọ yiwanna ode awetọ.—Isaia 2:2-4.

Homẹ Kunnudetọ Jehovah tọn lẹ tọn na hùn nado má nuhe yé ko plọn gando lehe yè gán doakọnna mawadodo po akọ̀-ṣinṣinyan po do go ji hẹ we. Vudevude, nuhe a plọn lẹ gán gọalọna we nado yí owanyi do diọtẹnna wangbẹna. A na mọ lehe a gán yí homẹdagbe do yinuwa hẹ gbẹtọ wunmẹ lẹpo do, etlẹ yin mẹhe e taidi dọ yé ma nọ yọ́n dagbe kavi nọ do wangbẹna hia lẹ. Enẹ na zọ́n bọ a na do ayajẹ dogọ todin, podọ nuyiwa towe hẹ mẹdevo lẹ nasọ pọnte. Hú popolẹpo, a na plọn lehe a gán nọgbẹ̀ to Ahọluduta Jiwheyẹwhe tọn glọ do, whenue wangbẹna na ko busẹ mlẹnmlẹn.—Salmu lẹ 37:29.