Wẹndagbe Ahọluduta Jiwheyẹwhe tọn ko to yinyin lilá to filẹpo, dile Jesu dọ do. (Matiu 24:14) Biblu dọ to Daniẹli mẹ dọ Jiwheyẹwhe wẹ ze Ahọluduta ehe dai. Weta 2tọ dọ dọdai gandudu gbẹtọ tọn huhlọnnọ debọdo-dego delẹ tọn, bẹsọn Babilọni hohowhenu tọn ji kaka wá azán mítọn gbè. Wefọ 44 dọ nuhe na jọ to sọgodo dọmọ:

“Jiwheyẹwhe olọn tọn na ze ahọluduta de dai he ma na yin vivasudo gbede. Ahọluduta ehe ma nasọ yin jijodo na akọta devo depope. E na gídí ahọluduta ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.”

Dọdai Biblu tọn ehe po devo lẹ po dohia dọ Ahọluduta Jiwheyẹwhe tọn na diọtẹnna gandudu gbẹtọ tọn lẹ bo na hẹn jijọho po vivomẹninọ po wá na gbẹtọ lẹ to aigba ji. Nawẹ nulẹ na te to Ahọluduta lọ glọ? Pagbe dagbe delẹ die he na mọ hẹndi to madẹnmẹ.

• AWHÀN MA NA TIN BA

  Salmu lẹ 46:9: “[Jiwheyẹwhe] to awhàn hẹnwa opodo lẹdo aigba pé. E wẹ́n ogá bo sán owhán do flinflin; e yí miyọ́n do mẹ̀ awhàn-kẹkẹ lẹ.”

  Pọ́n lehe aihọn lọ na yọ́n do eyin akuẹ gọna nuyọnẹn he nọ yin yiyizan nado wleawuna awhànfunnu todin lẹpo wá yin yiyizan nado nọ hẹn ale wá na gbẹtọ lẹ kakati nado nọ hù yé! Pagbe ehe na mọ hẹndi to Ahọluduta Jiwheyẹwhe tọn glọ.

• AZỌ̀N MA NA TIN BA

  Isaia 33:24: “Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’”

  Pọ́n lehe aihọn lọ na yọ́n do eyin mẹde masọ nọ jẹ ahun-zọ̀n, kansẹẹ, ovà kavi azọ̀n devo depope. Dotowhé po amasin po ma nasọ tin ba. Mẹhe na to aigba ji to whenẹnu lẹpo na to ganji to agbasa mẹ.

• NÚDÙDÙ NA PÉ MẸLẸPO

  Salmu lẹ 72:16: “Jinukun susugege na tin to aigba ji; e na gọfla to osó lẹ ji aga.”

  Aigba na nọ de jinukun he na pé mẹlẹpo tọ́n bọ mẹlẹpo na nọ mọ dù. Huvẹ ma na tin podọ mẹlẹpo na nọ mọ núdùdù hunsindagbe tọn dù.

• AWUFIẸSA, AWUBLA PO OKÚ PO MA NA TIN BA

  Osọhia 21:4: “[Jiwheyẹwhe] nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”

   Ehe dohia dọ gbẹtọ lẹ na lẹzun mẹpipe bo na nọgbẹ̀ kakadoi to paladisi mẹ to aigba ji! Pagbe he Mẹdatọ owanyinọ mítọn, Jehovah Jiwheyẹwhe do niyẹn.

Be onú ehe lẹpo gán jọ nugbo ya? Mẹsusu wẹ na yigbe dọ ogbẹ̀ dagbe sin opà wẹ Biblu do, amọ́ nudelẹ nọ zọ́n bọ e nọ vẹawuna yé nado yise dọ gbẹtọ gán nọgbẹ̀ kakadoi. Enẹ ma yin nupaṣamẹ, na mẹde ma ko nọgbẹ̀ kakadoi pọ́n nado dọhona mí gandego.

Gbẹtọ lẹ ko jiya na ylando po okú po wutu bo ko mọ awufiẹsa sọmọ bọ mẹsusu ko wá mọ ẹn di jọwamọnu. Amọ́, e ma yin nuhe Mẹdatọ mítọn, Jehovah Jiwheyẹwhe jlo na gbẹtọ lẹ niyẹn.

Na mí nido dejido opagbe Jiwheyẹwhe tọn lẹpo go, ewọ dọ gando opagbe he e ko do lọ go dọmọ: “E ma na lẹkọwa dè e yaya, ṣigba, e họnwun dọ e na wà nudepope he nọ hẹn homẹ ṣie hùn dotana, podọ e na tindo kọdetọn dagbe dandan to nuhe mẹ n’do e hlan te.”​—Isaia 55:11.

Biblu dọ dọ Jehovah Jiwheyẹwhe “ma sọgan dolalo.” (Titu 1:2) Na ewọ ko dopà nudagbe ehelẹ tọn wutu, mí dona kanse míde dọ: Be gbẹtọ lẹ sọgan nọgbẹ̀ kakadoi to Paladisi mẹ to aigba ji nugbonugbo ya? Etẹwẹ mí dona wà nado duale pagbe he Jiwheyẹwhe do lẹ tọn? To hosọ he na bọdego lẹ mẹ, a na mọ gblọndo na kanbiọ ehelẹ.