N’yin jiji to Mulhouse, to Agewaji-whèzẹtẹn France tọn, yèdọ lẹdo azọ́nwatọ lẹ tọn de he diyin na danuwiwa etọn. Nuhe n’flin gando ovu whenu ṣie go lẹ wẹ whẹgbè po danuwiwa po he nọ wá aimẹ to whẹndo lẹ mẹ to lẹdo lọ mẹ. To whẹndo mítọn mẹ, yè ma nọ yí nukun nujọnu tọn do pọ́n yọnnu lẹ podọ sunnu lẹ ma nọ saba whlé ohó yé. Yè plọn mi dọ azọ́n yọnnu lẹ tọn wẹ nado nọ dànú bo nọ penukundo sunnu lẹ po ovi lẹ po go.

Nulẹ ma bọawuna mi to ovu whenu. Whenue n’tindo owhe ao, otọ́ ṣie kú na e nọ nùahànmú wutu. Owhe atọ́n godo, dopo to mẹdaho ṣie sunnu lẹ mẹ hù ede. To owhe dopolọ mẹ, mẹde yin hùhù to nukun ṣie mẹ to nudindọn whẹndo tọn de whenu. Ehe hẹn mi jọsi taun. Hagbẹ whẹndo tọn lẹ plọn mi lehe yè nọ yí ohí po osò po do hoavùn do to whedepopenu he e biọ domọ. Taidi jọja he jẹflumẹ de, n’jẹ nulẹ dedo agbasa go ji bo jẹ ahànnu ji.

Whenue n’tindo owhe 16, n’nọ nù bia-hàn ogo 10 jẹ 15 to gbèdopo, podọ e ma dẹn bọ n’jẹ amasin adínọ lẹ zan ji. Nado mọ akuẹ bo họ̀ onú enẹlẹ, n’nọ sà ogàn-gbigble lẹ bo nọ jẹajo. To whenue n’tindo owhe 17, n’ko yì gànpamẹ whlasusu. To lẹndopọ mẹ, whla 18 wẹ n’yin wiwle na ajo po danuwiwa po wutu.

Whenue n’tindo owhe 20 linlán, ninọmẹ ṣie sọ vọ́ ylan dogọ. N’nọ nù marijuana biblá 20 to gbèdopo gọna héroïne po amasin adínọ devo lẹ po. Whlasusu wẹ n’ko dibla kú na n’nù amasin adínọ zẹjlẹgo wutu. N’wá jẹ amasin adínọ lẹ sà ji, enẹwutu n’nọ saba hẹn ohí po osò po. To gbèdopo, n’desòdo dawe de, ṣigba awọ̀ jẹ́ na ẹn bọ sòpẹ́n lọ jẹ gbànnú-ta etọn go bo flẹ! Whenue n’tindo owhe 24, onọ̀ ṣie kú bọ adi ṣie sọ vọ́ sinyẹn deji. Eyin afọzọ̀ntọ lẹ mọ mi ja, yé nọ bẹ obu bo nọ dasá ali jẹ awà awetọ ji. Avùnhiho zọ́n bọ n’nọ saba yí sẹfifo ṣie lẹ zan to ponọ-pámẹ kavi to dotowhé nado penukundo apà ṣie lẹ go.

To whenue n’tindo owhe 28, n’wlealọ. Dile mì sọgan ko lẹn do, n’ma nọ yinuwa hẹ asi ṣie po sisi po. N’nọ zun in bo nọ hò e. Mí ma nọ wà nudepope dopọ taidi asu po asi po. N’lẹndọ eyin n’gbẹ́ nọ bẹ aṣọ́donu he n’fìn lẹ na ẹn, ohó de ma wá. Ṣigba, nujijọ madonukun de wá aimẹ. Asi ṣie jẹ Biblu plọn hẹ Kunnudetọ Jehovah tọn lẹ ji. To oplọn tintan godo, e doalọtena azọ̀-nùnù bo gbẹ́ nado yí akuẹ he n’fìn lẹ bosọ gọ̀ aṣọ́donu he n’na ẹn lẹ jo na mi. Homẹgble  mi taun. N’jẹagọdo Biblu pinplọn etọn bo tlẹ nọ tún azọ̀ siga tọn do nukunmẹ na ẹn. N’sọ nọ to ṣinṣàn ẹn kò to kọmẹnu mítọn lẹ dè.

To zánmẹ gbèdopo he n’nùahànmú, n’domiyọ́n ohọ̀ mítọn. Asi ṣie whlẹn yẹn po viyọnnu mítọn owhe atọ́n mẹvi po sọn miyọ́n he to jiji lọ mẹ. Whenue n’mọ dee mẹ, n’wá jẹ owhẹ̀ do dee ji sinsinyẹn. To ahun ṣie mẹ, n’mọdọ Jiwheyẹwhe ma sọgan jona mi. N’flindọ yẹwhenọ de dọ to gbèdopo dọ zòmẹ wẹ mẹylankan lẹ jei. Doto ṣie he nọ penukundo apọ̀nmẹzọ̀n go tlẹ dọna mi dọmọ: “Towe ko fó! A ma gán vọ́ diọ gbede ba.”

To nujijọ miyọ́n tọn lọ godo, mí sẹtẹn jẹ mẹjitọ asi ṣie tọn lẹ pá. Whenue Kunnudetọ lẹ wá dla asi ṣie pọ́n, n’kanse yé dọ, “Be Jiwheyẹwhe sọgan jo ylando ṣie lẹpo na mi ya?” Yé do 1 Kọlintinu lẹ 6:9-11 hia mi to Biblu mẹ. Kandai lọ slẹ walọyizan he Jiwheyẹwhe jẹagọdo lẹ, amọ́ e yidogọ dọmọ: “Nuhe delẹ to mì mẹ yin dai niyẹn.” Hogbe ehelẹ na mi jide dọ n’sọgan gbẹ́ diọ. Enẹgodo, Kunnudetọ lẹ do 1 Johanu 4:8 hia mi bo hẹn mi deji dọ Jiwheyẹwhe yiwanna mi. Po tulinamẹ ehe po, n’biọ to Kunnudetọ lẹ si nado nọ plọn Biblu hẹ mi whla awe to osẹ dopo mẹ bọ n’jẹ opli Klistiani tọn lẹ yì ji. N’nọ hodẹ̀ hlan Jehovah whẹwhẹ.

To osun dopo gblamẹ, n’de nado jo amasin adínọ po ahàn sinsinyẹn po do. Ojlẹ vude godo, n’jẹ ahidi hẹ nuhahun delẹ ji. N’nọ kudlọ ylankan lẹ, ota nọ dù mi gọna awufiẹsa he mẹhe jlo na dealọ sọn aṣa mọnkọtọn lẹ mẹ nọ tindo lẹ. Etomọṣo, to ojlẹ dopolọ mẹ, n’mọdọ Jehovah hẹn alọ go na mi bo to huhlọnna mi. N’tindo numọtolanmẹ dopolọ taidi apọsteli Paulu. Paulu wlan gando lehe Jiwheyẹwhe gọalọna ẹn do go dọmọ: “To onú lẹpo mẹ, yẹn tindo huhlọn lọ gbọn ewọ he nọ na mi huhlọn dali.” (Filipinu lẹ 4:13) To nukọn mẹ, yẹnlọsu penugo nado jo azọ̀-nùnù do.—2 Kọlintinu lẹ 7:1.

Gbọnvona dọ Biblu gọalọna mi nado hẹn gbẹzan ṣie pọnte, e sọ hẹn ninọmẹ whẹndo tọn mítọn pọnte ga. Pọndohlan ṣie gando asi ṣie go diọ. N’jẹ sisi dohia ẹ ji bo nọ dọ “jaale” podọ “a wanu” na ẹn. N’sọ lẹzun otọ́ dagbe de na viyọnnu mítọn. To whenue n’plọn Biblu na owhe dopo godo, n’hodo apajlẹ asi ṣie tọn bo klan gbẹzan ṣie do wiwe hlan Jehovah bosọ yí baptẹm.

N’kudeji dọ nunọwhinnusẹ́n Biblu tọn lẹ wẹ whlẹn ogbẹ̀ ṣie. Hagbẹ whẹndo tọn ṣie he ma tlẹ yin Kunnudetọ lẹ lọsu yọnẹn dọ n’sọgan ko kú na amasin adínọ ṣiṣizan kavi to avùn de whenu.

Nuplọnmẹ Biblu tọn lẹ gando azọngban ṣie taidi asu podọ otọ́ go diọ gbẹzan whẹndo tọn ṣie pete. (Efesunu lẹ 5:25; 6:4) Mí jẹ nulẹ wà dopọ ji taidi whẹndo de. Todin, kakati nado nọ lẹndọ azọngban asi ṣie tọn wẹ nado nọ dànú, homẹ ṣie nọ hùn nado nọgodona ẹn taidi wẹndagbe-jlatọ whenu-gigọ́ tọn. Podọ homẹ etọn nọ hùn nado nọgodona mi nado hẹn azọngban ṣie di taidi mẹho agun tọn.

Owanyi po lẹblanu Jehovah Jiwheyẹwhe tọn po yinuwado gbẹzan ṣie ji taun. N’tindo ojlo vẹkuvẹku nado nọ dọhona mẹhe ko hẹn todido bu lẹ gando jẹhẹnu Jiwheyẹwhe tọn lẹ go, na aliho enẹ mẹ wẹ mẹsusu nọ pọ́n yẹnlọsu hlan te dai. N’yọnẹn dọ Biblu tindo huhlọn nado gọalọna mẹdepope nado tindo gbẹzan he wé bo tindo lẹndai de. Biblu ma plọn mi nado nọ yiwanna mẹdevo lẹ, yèdọ sunnu po yọnnu po bo nọ na sisi yé poun gba, ṣigba e sọ plọn mi nado nọ na sisi dee ga.