N’whẹ́n to Puerto Limón po lẹdo etọn po mẹ, yèdọ tòdaho he tindo bato-glintẹn de to whèzẹtẹn-waji Costa Rica tọn. Mẹjitọ ṣie lẹ tindo ovi ṣinatọ̀n, bọ yẹn yin ovi ṣinawetọ. Otọ́ ṣie kú to whenue n’tindo owhe ṣinatọ̀n. Enẹgodo, onọ̀ ṣie wẹ pọ́n mí go whẹ́n.

N’yiwanna bọlu-hihò * taun. Taidi yọpọvu de, n’yiwanna aihundida lanmẹyiya tọn. To whenue n’to tintọ́n sọn aflanmẹ, n’kọnawudopọ hẹ pipli de he nọ hò bọlu nado daihun. To whenue n’do owhe 20 linlán bo to bọlu hò to pipli enẹ mẹ, mẹhe nọ dínmẹ do bọlu-hògbẹ́ mẹ de biọ to asi e nado hò bọlu to bọlu-hògbẹ́ otò tọn Nicaragua tọn mẹ. Ṣigba, na onọ̀ ṣie ma tindo agbasalilo bọ yẹn wẹ nọ penukundego wutu, n’ma jlo na yì nọ Nicaragua. Enẹwutu, n’gbẹ́ nuzedonukọnnamẹ enẹ. To nukọn mẹ, mẹhe nọ dínmẹ do bọlu-hògbẹ́ mẹ devo basi oylọna mi nado wá hò bọlu to bọlu-hògbẹ́ otò tọn Costa Rica tọn mẹ, yèdọ yẹn po hagbẹ ṣie he nọ hò bọlu delẹ po. N’kẹalọyi nuzedonukọnnamẹ ehe. N’nọ bọlu-hògbẹ́ otò tọn mẹ sọn 1949 jẹ 1952 bo hò bọlu whlasusu to Cuba, Mexique po Nicaragua po. N’nọ tindo kọdetọn dagbe taun to aliginglọnna bọlu pipli he pehẹ mí tọn mẹ, podọ mí ko dudeji whlasusu. N’nọ yiwanna dọ gbẹtọgun lẹ ni to yinkọ ṣie ké!

E blawu dọ n’sọ nọ zan gbẹzan fẹnnuwiwa tọn. Mahopọnna dọ họntọn yọnnu dopo wẹ n’tindo, n’nọ tọ́n hẹ yọnnu devo lẹ. N’sọ nọ nùahànmú. To gbèdopo, n’nùahànmú sọmọ bọ whenue n’fọ́n to wunkẹngbe, n’ma gán flin lehe n’lẹkọwa whégbè gbọn! N’sọ nọ hòakọ bo nọ hò loteli.

Gbẹzan enẹ zan wẹ n’te to whenue onọ̀ ṣie lẹzun Kunnudetọ Jehovah tọn. E tẹnpọn nado plọn mi nuyise etọn, amọ́ e ma pà ẹ to tintan whenu, na n’yiwanna aihundida lanmẹyiya tọn zẹjlẹgo wutu. Eyin n’to aihundida lọ plọn, huvẹ ma tlẹ nọ hù mi! Aihundida lọ kẹdẹ wẹ nọ duahunmẹna  mi. N’yiwanna bọlu-hihò lọ hú nudevo depope!

Ṣigba, to whenue n’do owhe 29, n’gbleawu sinsinyẹn to whenue n’tẹnpọn nado do bọlu de te to bọlu-hihò de whenu. To whenue n’jẹgangan, n’jo bọlu-hihò hẹ bọlu-hògbẹ́ otò tọn do. Etomọṣo, n’gbẹ́ nọ plọn bọlu-hihò mẹlẹ to okọ́ mítọn mẹ.

To 1957, n’kẹalọyi oylọ-basinamẹ de nado yì plidopọ de he Kunnudetọ Jehovah tọn lẹ to bibasi to bọlu-hòtẹn de he n’ko hò bọlu te pọ́n. Dile n’to aisinsin to mẹplidopọ lẹ mẹ, n’doayi e go dọ Kunnudetọ lẹ nọ na sisi ode awetọ to vogbingbọn mẹ na bẹwlu he nọ tin to gbẹtọgun he nọ wá finẹ to bọlu-hihò whenu lẹ ṣẹnṣẹn. Nuhe n’mọ to plidopọ enẹ ji lẹ whàn mi nado jẹ Biblu plọn ji hẹ Kunnudetọ lẹ bosọ nọ yì opli yetọn lẹ.

Nuplọnmẹ Biblu tọn susu he n’plọn lẹ yinuwado ji e. Di apajlẹ, Jesu dọ dọdai dọ to azán godo tọn lẹ mẹ, devi etọn lẹ na dọyẹwheho wẹndagbe Ahọluduta Jiwheyẹwhe tọn lẹdo aihọn pé. (Matiu 24:14) N’sọ plọn dọ Klistiani nugbo lẹ ma nọ yí lizọnyizọn yetọn do wàjọ. Jesu dọmọ: “Vọnu wẹ mì mọyi, vọnu wẹ mì ni namẹ.”—Matiu 10:8.

Dile n’to Biblu plọn, n’nọ yí nuhe e dọ lẹ jlẹdo nuhe n’to mimọ to Kunnudetọ Jehovah tọn lẹ ṣẹnṣẹn go. N’yiwanna vivẹnu vẹkuvẹku he yé nọ do nado lá wẹndagbe Ahọluduta Jiwheyẹwhe tọn lẹdo aihọn pé. N’mọdọ yé tindo gbigbọ nunamẹ tọn he Jesu na tuli etọn Klistiani lẹ. Enẹwutu, whenue n’hia Malku 10:21 bo mọ oylọ-basinamẹ Jesu tọn dọ, “Wá bo lẹzun hodotọ ṣie,” n’jlo nado lẹzun Kunnudetọ.

Ṣigba, e yí whenu pẹẹde to asi e nado tẹdo gbemima ṣie go. Di apajlẹ, na owhe susu n’ko yiwanna loteli hihò bo nọ hò to osẹ lẹpo mẹ. Amọ́, n’plọn to Biblu mẹ dọ Jiwheyẹwhe nọ gblewhẹdo mẹhe nọ sẹ̀n “yẹwhe Tadagbe tọn” lẹ po nukunkẹnnọ lẹ po. (Isaia 65:11; Kolosinu lẹ 3:5) Enẹwutu, n’magbe nado jo akọhiho do. Whenue n’jo akọhiho do, mẹhe hò sọha he n’nọ saba hò lọ wẹ dù to Sẹgbe tintan he bọdego! Gbẹtọ lẹ ṣàn mi kò, na n’ma hò to osẹ enẹ mẹ wutu, podọ yé sọ gbidikọna mi sinsinyẹn nado gọ̀ hò, amọ́ n’gbẹ́. N’masọ hòakọ pọ́n gbede ba.

N’pehẹ whlepọn devo gando “gbẹtọ-yinyin yọyọ” lọ go to azán he gbè n’yí baptẹm to plidopọ Kunnudetọ Jehovah tọn lẹ tọn de ji. (Efesunu lẹ 4:24) To whèjai, n’lẹkọyi hotẹli he n’te bo mọ họntọn yọnnu ṣie hoho lọ to ohọ̀n ṣie ji. E dọna mi dọ: “Sammy, wá mí ni dugbẹ!” Amọ́, n’dọna ẹn to afọdopolọji dọ, “Eyeo!” N’flinnu in dọ nujinọtedo walọ dagbe tọn Biblu tọn lẹ wẹ n’to gbẹnọ sọgbe hẹ todin. (1 Kọlintinu lẹ 6:18) E dawhá dọ, “Etẹ?” Enẹgodo, e dovọ́na nuhe Biblu dọ gando fẹnnuwiwa zanhẹmẹ tọn go bo tẹkudeji dọ mí ni gọ̀ haṣinṣan mítọn bẹ. Ṣigba, n’biọ họmẹ bo suhọ̀n. To egbehe, homẹ ṣie hùn nado dọ dọ, sọn 1958 gbọ́n he n’lẹzun Kunnudetọ, n’yí nugbonọ-yinyin do tẹdo diọdo he n’basi to gbẹzan ṣie mẹ lẹ go.

Nususu wẹ n’gán dọ gando ale he n’ko mọyi sọn anademẹ Biblu tọn lẹ hihodo mẹ go! Delẹ to ale enẹlẹ mẹ wẹ yindọ n’tindo họntọn nugbo susu todin, gbẹzan he tindo lẹndai de, gọna ayajẹ nugbo.

N’gbẹ́ nọ duvivi bọlu-hihò tọn, amọ́ pọndohlan devo wẹ n’tindo. To whenue n’nọ hò bọlu, n’diyin bo nọ mọ akuẹ, amọ́ onú ehelẹ ma nọ dẹn-to-aimẹ. Ṣigba, haṣinṣan ṣie hẹ Jiwheyẹwhe po pipli mẹmẹsunnu lẹ tọn he n’yin apadewhe etọn po na tin kakadoi. Biblu dọmọ: “Aihọn to jujuyi po ojlo etọn po ga, ṣigba mẹhe wà ojlo Jiwheyẹwhe tọn na gbọṣi aimẹ kakadoi.” (1 Johanu 2:17) Todin, n’yiwanna Jehovah Jiwheyẹwhe po omẹ etọn lẹ po hú nudevo depope!