A Gán Duvivi Ogbẹ̀ Tọn Todin
A GÁN duvivi sọgodo dagbe de tọn—yèdọ gbẹninọ matin awufiẹsa he azọ̀n, yọnhopipo po okú po nọ hẹnwa! Amọ́ to egbehe, nuhahun po awufiẹsa po kẹdẹ wẹ gọ́ ogbẹ̀ lọ mẹ. Be nude tin he gán gọalọna we todin ya? Biblu na ayinamẹ delẹ he gán zọ́n bọ a na do ayajẹ bọ gbẹzan towe na pọnte todin. Mí ni dọhodo nuhahun delẹ ji bo pọ́n lehe Biblu gán gọalọ do.
PEKỌ TINTINDO
Ayinamẹ Biblu tọn: “Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo lẹ po.”—Heblu lẹ 13:5.
Nususu lẹ wẹ to zoji to egbehe bọ aihọn nọ plọn mí dọ dandannu wẹ onú enẹlẹ. Amọ́, Biblu dohia dọ mí gán tindo “pekọ po nuhe [mí] tindo lẹ po.” Gbọnna?
Nọ dapana “wanyina akuẹ.” Mẹsusu wẹ nọ wà nudepope to egbé na “wanyina akuẹ” wutu, eyin e na tlẹ bẹpla agbasalilo, whẹndo, họntọnjiji, jijọ dagbe, podọ etlẹ yin yinkọ dagbe yetọn lọsu. (1 Timoti 6:10) Lehe e blawu do sọ! To popolẹpo mẹ, mẹhe yiwanna adọkun, akuẹ “ma na pekọna ẹn gbede.”—Yẹwhehodọtọ 5:10.
Nọ yiwanna gbẹtọ, e ma yin nutindo lẹ. Nugbo wẹ dọ nutindo lẹ nọ yọ́n-na-yizan. Amọ́, onú enẹlẹ ma gán yiwanna mí; gbẹtọ janwẹ gán yiwanna mí. “Họntọn nugbo” tintindo nọ yidogọna ayajẹ mítọn to gbẹ̀mẹ.—Howhinwhẹn lẹ 17:17.
EYIN MÍ NỌ HODO AYINAMẸ BIBLU TỌN LẸ, MÍ GÁN DUVIVI OGBẸ̀ TỌN TODIN
AKỌNDIDONA AZỌ̀N
Ayinamẹ Biblu tọn: “Amasin dagbe de wẹ ahun he gọ́ na ayajẹ yin.”—Howhinwhẹn lẹ 17:22.
Kẹdẹdile “amasin dagbe” nọ gbọ azọ̀n do, mọ wẹ ayajẹ gán wà dagbe na mí do. Amọ́, nawẹ mí gán do ayajẹ gbọn eyin mí to azọ̀njẹ?
Nọ do pinpẹn nutọn hia. Eyin mí nọ ze ayiha do nuhahun mítọn lẹ ji, “azán lẹpo” wẹ na lẹzun ylankan to nukun mítọn mẹ. (Howhinwhẹn lẹ 15:15) Kakatimọ, Biblu na mí tuli nado “nọ dopẹ́.” (Kolosinu lẹ 3:15) Plọn nado nọ yọ́n pinpẹn nudagbe lẹ tọn to gbẹ̀mẹ, mahopọnna lehe yé whè sọ. Nudelẹ taidi họyiyi whanpẹnọ owhè tọn, jẹhọn fifá kavi nukiko mẹyiwanna de tọn, gán zọ́n bọ a na do ayajẹ.
Nọ wà dagbe na mẹdevo lẹ. Eyin a ma tlẹ to gángán, “ayajẹ [nọ] sù to nunamẹ mẹ hú to mimọyi mẹ.” (Owalọ lẹ 20:35) To whenue mẹhe mí wà dagbe na lẹ dọnú etọn do mí, enẹ nọ na mí ayajẹ taun bo tlẹ nọ zọ́n bọ mí nọ de ayiha sọn nuhahun mítọn lẹ ji. Eyin mí wà dagbe na mẹdevo lẹ, e nọ wà dagbe na mílọsu.
HINHẸN ALỌWLE TOWE LODO
Ayinamẹ Biblu tọn: “Mọdona nuhe yin nujọnu hugan lẹ.”—Filipinu lẹ 1:10.
Asu po asi po he ma nọ zan whenu susu dopọ lẹ gán wá jo yede do. Enẹwutu, nuyọnẹnnu wẹ dọ yé ni ylọ alọwle yetọn dọ nujọnu, na e yin dopo to nuhe yin nujọnu hugan to gbẹ̀mẹ lẹ mẹ.
Mì nọ wanu dopọ. Kakati nado nọ wà nuhe a yiwanna lẹ poun, mì nọ dovivẹnu nado nọ wà nulẹ dopọ. Biblu dọ dọ: “Omẹ awe pọnte hú mẹdopo.” (Yẹwhehodọtọ 4:9) Mì nọ dànú, daihun, disa, kavi tlẹ deayidai dopọ.
Mì nọ do owanyi hia ode awetọ. Biblu na tuli asu po asi po nado yiwanna bo nọ na sisi ode awetọ. (Efesunu lẹ 5:28, 33) Nukiko yẹsẹ, mẹgbigbòfán kavi onú kleun de nina ode awetọ gán hẹn alọwle de lodo. E họnwun dọ asu po asi po lẹ kẹdẹ ṣẹnṣẹn wẹ kọndopọ zanhẹmẹ tọn dona nọ wá aimẹ te.—Heblu lẹ 13:4.
A Gán Sọ Pọ́n Hosọ Ehelẹ
FỌ́N!
Nuhe Nọ Hẹn Ayajẹ Wá—Etẹlẹ Wẹ?
Be a nọ mọ dewe taidi ayajẹnọ ya? Etẹwẹ nọ hẹn mẹde tindo ayajẹ?
WHẸNDO TOWE SỌGAN YIN AYAJẸNỌ
Dín Anademẹ Jiwheyẹwhe Tọn Nado Tindo Alọwle Ayajẹnọ
Kanbiọ kleunkleun awe delẹ kinkanse dewe sọgan gọalọna we nado hẹn alọwle towe pọnte dogọ.
