E Blawu Dọ Mí Ma Gán Glo Okú
MÍ NI dọ dọ a to video de pọ́n gando hànsinọ he diyin bọ a yiwanna taun de go. To bẹjẹeji, a mọ whenue e to pẹvi, podọ whenue e to ohàn plọn, bo to zepọn bayi whlasusu. Enẹgodo, a mọ lehe e to hànji to mẹlẹ nukọn do, to gbejizọnlinzin yì otò susu mẹ, bo lẹzun mẹhe diyin pete. Amọ́ zande, a mọ yẹdide devo lẹ he do nuhe e wà to gbẹwhenu etọn lẹ hia bọ video lọ wá vivọnu to whenue e kú.
Apajlẹ ehe ma yin video de poun, amọ́ nuhe nọ jọ wẹ. Vlavo mẹlọ yin hànsinọ, wesetọ, wezundotọ, kavi mẹhe diyin devo depope, nudopolọ janwẹ nọ jọ do yé go. Mẹlọ sọgan ko wà nususu, amọ́ be e ma na ko wà nususu humọ eyin yọnhopipo po okú po ma sán ogbẹ̀ etọn dogli ya?
E blawu dọ nuhe to tepọn mímẹpo niyẹn. (Yẹwhehodọtọ 9:5) Mahopọnna vivẹnu depope he mí gán do, mí na gbẹ́ nọ poyọnho bo nọ kú janwẹ. Dehe sọ ylan wẹ yindọ, asidan kavi azọ̀n sinsinyẹn de sọgan sán gbẹzan mẹtọn dogli to ajiji mẹ. Dile Biblu dọ do, gbẹtọ taidi avìvì afọnnu tọn he “nọ sọawuhia na ojlẹ vude podọ to enẹgodo nọ busẹ.”—Jakọbu 4:14.
Na mẹdelẹ nọ mọdọ ogbẹ̀ ma do jide bọ yè gán kú to ajiji mẹ wutu, gbẹzan he yé nọ pò na wẹ “mì gbọ mí ni dù bo nù, na osọ wẹ mí na kú.” (1 Kọlintinu lẹ 15:32) Amọ́, be gbẹzan mọnkọ zinzan ma dohia dọ mílọsu kẹalọyi dọ mí ma gán glo okú ya? Hiẹ lọsu sọgan wá kanse dewe, titengbe eyin a to awufiẹsa mẹ dọ, ‘Be le ján gbẹ̀ nọ fó do a?’ Fie wẹ mí gán mọ gblọndo na kanbiọ ehe te?
Mẹsusu nọ dín gblọndo sọn dodinnanutọ lẹ dè. Dodinnanutọ lẹ po doto lẹ po ko de nudelẹ tọ́n he nọ zọ́n bọ gbẹtọ gán nọgbẹ̀ dẹn dogọ. Podọ wesetọ delẹ gbẹ́ to vivẹnudo nado mọ nuhe na zọ́n bọ gbẹtọ na nọgbẹ̀ dẹn taun. Mahopọnna nuhe yé detọ́n lẹ, kanbiọ delẹ gbẹ́ to ote dọ: Naegbọn mí do nọ poyọnho bo nọ kú? Be mí na wá gbawhàn okú tọn to gbèdopo ya? Hosọ he bọdego lẹ na dọhodo kanbiọ ehelẹ ji bo nasọ na gblọndo na kanbiọ lọ, Be le ján gbẹ̀ nọ fó do a?