Be e sọgbe nado tindo ojlo lọ nado nọgbẹ̀ dẹn ya? Gbau! Biblu dọ dọ Jiwheyẹwhe lọsu wẹ yí ojlo enẹ do ahun mẹ na mí. (Yẹwhehodọtọ 3:11) Biblu sọ dohia dọ “Jiwheyẹwhe wẹ owanyi.” (1 Johanu 4:8) Be Jiwheyẹwhe owanyinọ de na yí ojlo nado nọgbẹ̀ kakadoi do ahun mẹ na mí, eyin e yọnẹn dọ mí ma gán ya?

E họnwun dọ mẹde ma nọ jlo na kú. Biblu tlẹ dọ dọ “kẹntọ” de wẹ okú yin. (1 Kọlintinu lẹ 15:26) Mẹdelẹ nọ kú azán mape; mẹdevo lẹ nọ poyọnho whẹpo do kú. Amọ́, mímẹpo wẹ okú to tepọn. Mẹdelẹ ma tlẹ nọ jlo na lẹnnupọndeji paali bo tlẹ nọ dibu. Be kẹntọ ehe na wá yin didesẹ gbede ya? Be e gán yọnbasi nugbo ya?

Eyin a sè dọ e ma yin ojlo Jiwheyẹwhe tọn gbede dọ gbẹtọ ni kú, be e na paṣa we wẹ ya? Jenẹsisi he yin owe Biblu tọn bẹ kunnudenu lẹ hẹn he dohia dọ ojlo Jiwheyẹwhe tọn wẹ yindọ gbẹtọvi lẹ ni nọgbẹ̀ kakadoi to aigba ji. Jehovah Jiwheyẹwhe yí sọwhiwhe do wleawuna aigba, na gbẹtọ nido nọgbẹ̀ to e ji. Podọ, e dá sunnu tintan lọ Adam bo ze e do paladisi de mẹ, yèdọ jipa de to Edẹni. Enẹgodo, “Jiwheyẹwhe mọ nuhe e ko basi lẹpo podọ pọ́n! e yọ́n tlala.”—Jenẹsisi 1:26, 31.

Adam yin didá di mẹpipe to apajlẹ Jiwheyẹwhe tọn mẹ. (Deutelonomi 32:4) Evi lọsu ma do oblọ  depope; e yin mẹpipe to apọ̀nmẹ podọ to agbasa mẹ. Jehovah dọna yé dọmọ: “Mì yin sinsẹ́nnọ bo sudeji bosọ gọ́ aigba ji bo dugán do e ji, podọ mì dugán do whèvi hùmẹ tọn lẹ, nudida he nọ zlọn to agahomẹ lẹ po nudida he nọ sẹtẹn to aigba ji lẹpo po ji.”—Jenẹsisi 1:28.

E na biọ whenu to Adam po Evi po si nado ji ovi lẹ bo gọ́ aigba ji. Evi na ji ovi lẹ, bọ ovi etọn lẹ lọsu na ji ovi lẹ, kaka bọ yé na gọ́ aigba ji dile Jiwheyẹwhe jlo do. (Isaia 45:18) Eyin Adam po Evi po ma na nọgbẹ̀ dẹn, vlavo bo ma na mọ ovi po ovivi yetọn lẹ po, bo masọ yọ́n nuhe sọgodo na wá yin, be e na sọgbe dọ Jehovah ni ze todido enẹ donukọnna yé ya?

Sọ lẹnnupọndo gbedide lọ ji nado dugán do kanlin lẹ ji. Yè biọ to Adam si nado na yinkọ kanlin lẹ, podọ enẹ na yí whenu taun. (Jenẹsisi 2:19) Amọ́, nado dugán do yé ji na biọ dọ e ni yọ́n kanlin lẹ ganji bo yọ́n lehe e na penukundo yé go do. Ehe nasọ yí whenu susu taun.

Enẹwutu, gbedide Jiwheyẹwhe tọn dọ yé ni gọ́ aigba ji bo dugán do kanlin lẹ ji dohia dọ asu po asi po tintan lọ yin didá nado nọgbẹ̀ dẹn taun. Podọ Adam ka sọ nọgbẹ̀ dẹn nugbo.

Biblu dohia dọ gbẹtọvi lẹ ko dọ́jì wayi hú egbé. E dọ: “Ojlẹ he Adam nọgbẹ̀ na lẹpo yin owhe 930.” Enẹgodo, e donù sunnu ṣidopo devo lẹ go he nọgbẹ̀ zẹ̀ owhe 900 go! Mẹlọ lẹ wẹ Ṣẹti, Enọṣi, Kẹnani, Jalẹdi, Mẹtusela po Noa po. Yemẹpo wẹ nọgbẹ̀ jẹnukọnna Singigọ azán Noa gbè tọn, podọ Noa ko nọgbẹ̀ na owhe 600 whẹpo Singigọ lọ do jọ. (Jenẹsisi 5:5-27; 7:6; 9:29) Naegbọn yé do dọ́jì sọmọ?

Yemẹpo wẹ nọgbẹ̀ to ojlẹ de he mẹ gbẹtọvi lẹ ma ko dẹn do pipé-yinyin te. Enẹ wẹ na ko zọ́n bọ yé do dọ́jì domọ. Amọ́, kanṣiṣa tẹwẹ to pipé po jididọ́ po ṣẹnṣẹn? Podọ nawẹ okú na yin didesẹ gbọn? Nado mọ gblọndo lọ, mí dona yọ́n nuhewutu mí do nọ poyọnho bo nọ kú whẹ́.